УИХ дахь “Шударга ёс” эвслийн бүлэг өчигдөр хуралдсан. Хуралдаанаар хэлэлцсэн асуудлуудын талаар бүлгийн дэд дарга З.Баянсэлэнгэ дөнгөж сая мэдээлэл хийлээ. Тус бүлэг нийт найман асуудлыг хэлэлцжээ.

Бүлгийн хурлаар хамгийн эхэнд “Цагаан суваргын ордын төрийн эзэмшлийн хувь тогтоох тухай” хуулийн төслийг хэлэлцээд төр хувь эзэмших ёстой гэдэгт саналаа нэгтгэсэн байна. Уг ордын хайгуулыг төсвийн мөнгөөр хийсэн учир төр тодорхой хэмжээний хувийг заавал эзэмших ёстой гэж тус бүлэг үзэж байгаа аж. Хэрвээ төр хувь эзэмшихгүй бол чухал орд нэг гэр бүлийн эзэмшилд очихоор байна гэж бүлгийн дэд дарга З.Баянсэлэнгэ хэллээ.

Эдийн засгийн ил тод байдлын тухай хуулийг хэлэлцэх эсэхийг энэ долоо хоногт Байнгын хороо, УИХ-ын чуулганаар хэлэлцэнэ. Уг хуулийг Засгийн газраас энэ сарын 9-ны өдөр өргөн барьсан билээ. Өмнө нь тус хуультай адил агуулгатай Эдийн Өршөөлийн тухай хуулийг Шударга ёс эвслийн бүлгийн гишүүд бусад гишүүдийн хамтаар өргөн барьсан. Гэтэл УИХ-ын гишүүдийн өргөн барьсан Эдийн засгийн өршөөлийн тухай хуулийг хэлэлцээгүй мөртлөө Засгийн газраас өргөн барьсан хуулийг шуурхай хэлэлцээд явж байгаа нь буруу гэв. Цаашид ийм зүйл гарвал хэлэлцэх эсэхээс татгалзаад явна гэлээ.

Мөн тус бүлгээс улс орны макро эдийн засгийн бодлого, хөтөлбөр, төлөвлөгөө боловсруулах ажлын хэсгийг байгуулсан байна. Тус ажлын хэсгийг УИХ-ын гишүүн Ц.Цолмон ахалж ажиллах аж. Тус бүлэг макро эдийн засгийг тойрсон асуудлаар санаа шийдэл гаргаж эдийн засагт хувь нэмэр оруулахаар бэлтгэж байгаа гэв.

Үүний дараа бүлгийн дэд дарга З.Баянсэлэнгэ сэтгүүлчдийн асуултад хариуллаа.

-  УИХ-ын сонгуулийн тухай хуулийн ажлын хэсэг ажиллаж байна. Сонгуулийн тухай хуулинд танай бүлэг ямар байр суурьтай байгаа вэ?

- Бүлэг хоёр намаас бүрддэг. Сонгуулийн тухай хууль, Улс төрийн намуудын тухай хууль, Улс төрийн намуудын санхүүжилтын тухай хуулинд ажлын хэсэг гараад өөрсдийн нам дээр яригдаж байгаа. Бүлэг энэ асуудлаар нэгдсэн шийдвэрээ гаргаагүй байгаа. Оруулж ирж буй хуулийн төслүүдийг ч хараагүй байна.