УИХ дахь МАН-ын бүлгээс мэдээлэл хийлээ. Мэдээллийг бүлгийн дарга С.Бямбацогтоос гадна УИХ-ын гишүүн Ч.Хүрэлбаатар, Ё.Отгонбаяр нар өгөв. Тус бүлэг хуралдаанаараа энэ долоо хоногт байнгын хороо, УИХ-ын чуулганаар хэлэлцэх хэд, хэдэн хуулийн төслийг хэлэлцжээ. Тодруулбал, Гэмт хэргийн тухай хууль, Эдийн засгийн өршөөлийн тухай хууль, Ашигт малтмалын тухай хууль, Өрийн удирдлагын тухай хууль, Газрын тухай хуулийг хэлэлцэж саналаа нэгтгэсэн байна.

Нэн ялангуяа Газрын тухай хуулийг нухацтай хэлэлцжээ. Тус хуулийн талаар бүлгийн дарга С.Бямбацогт хэлэхдээ “Газрын тухай хууль бол монгол хүн бүрийн санаа тавих хууль мөн. Үндсэн хуулинд заасан эрхийнхээ дагуу энэ талаар санал бодлоо илэрхийлэх ёстой. Үүргээ биелүүлж, эх орон, тусгаар тогтнол, газар шорооныхоо төлөө үзэл бодлоо илэрхийлсэн иргэнийг хууль хяналтын байгууллагад шалгуулна зэргээр сүрдүүлж байгаа нь буруу” гэлээ.
Тус хууль дахь Гадаадын иргэнд газрыг 60-100 жилээр газрыг эзэмшүүлнэ гэсэн заалтыг УИХ-ын гишүүн С.Отгонбаяр эсэргүүцэж твиттер хуудсаараа жиргэхдээ олон нийтийг жагсаал, цуглаанд оролцохыг уриалсан. Түүний уг үйлдлийг АН-ын бүлгээс буруушааж, холбогдох хууль хяналтын байгууллагуудыг хяналтдаа авахыг сануулсан билээ. Тэгвэл үүнийг МАН-ын бүлэг тэр дундаа УИХ-ын гишүүн Ё.Отгонбаяр эсэргүүцэж буйгаа энэ үеэр илэрхийллээ. Ё.Отгонбаяр гишүүн энэ талаар “Ер нь Газрын тухай хуулиар үзэл бодлоо илэрхийлснийх нь төлөө хууль хяналтын байгууллагаар шалгуулна гэж хэлсэнд нь дургүйцэж байна. Ингэж хэлснийхээ төлөө АН-ын бүлгийн дарга Д.Эрдэнэбат уучлал гуйх ёстой. Газрыг гадны иргэнд янз бүрийн аргаар эзэмшүүлнэ гэж тодорхой заачихаад тэгэж хэлж болохгүй. Мөн бэлчээрийг малчдад эзэмшүүлж болохгүй” гэв.


Газрын тухай хуулиар УИХ-ын гишүүн Ч.Хүрэлбаатар ярихдаа “Газрын тухай хууль нь Үндсэн хуулийг зөрчсөн. Тодруулбал үндсэн хуулийн 6.5-т зааснаар Төрөөс гадаадын иргэн хуулийн этгээд харъяалалгүй хүн газрыг тодорхой хугацаатайгаар хуульд заасан бусад нөхцлөөр ашиглуулж болно гэж заасан байдаг. Гэтэл Засгийн газраас өргөн барьсан Газрын тухай хуулийн 75.5-т Гадаадын хөрөнгө оруулалттай аж, ахуй нэгжид газар эзэмших эрхийг худалдана гэсэн байна. Өчигдөр АН-ын бүлгийн даргын өгч буй мэдээллээр 2002 оны хуульд ч гэсэн ийм заалт байсан гэж байгаа. Харин 2002 оны хуулийн 6.4-т гадаадын байгууллага, хуулийн этгээдэд газрыг ашиглуулна гэсэн байгаа” гэв.

Тиймээс Газрын тухай хуулийг татаж авахыг тус бүлгээс шаардлаа. Мөн гадны иргэнд эзэмшүүлсэн газар маргаан дагуулбал олон улсын шүүхээр шийдвэрлэнэ гэж уг хуульд тусгасаныг эсэргүүцэж байна гэлээ.

Мөн Эдийн засгийн ил тод байдлын тухай хуулийг хэлэлцээд уг хуулийн төслийг дэмжихгүй гэдэг дээр саналаа нэгтгэсэн байна. Учир нь уг хуулийн нэрээр авлигачдыг өршөөх гэж байна гэж бүлгийн дэд дарга С.Бямбацогт хэлэв. Тэрбээр мөн шударгаар татвараа төлсөн бизнес эрхлэгчдийг орхигдуулсан мөртлөө улсад татвар төлж үзээгүй хууль бусаар хөрөнгөжсөн, авлигал авсан нөхдүүдийг өршөөх хуулийг оруулж ирж буй нь Үндсэн хуулинд заасан шударга ёсны зарчмыг алдагдуулж байгаа гэв. Мөн уг хуулиар  мөнгө угаах, терроризмыг санхүүжүүлсэн хөрөнгийг Монголд оруулж ирэх үүд хаалгыг нээж өгсөн гэлээ. Харин шударгаар эд хөрөнгөө мэдүүлж, татвараа төлсөн иргэн, аж ахуй нэгжийг өршөөх заалт уг хуулинд байхгүй байгаа аж. Мөн нуусан эд хөрөнгөө ил болгосон аж ахуй нэгжид шинэ мэдээллийн сан үүсгэж нууцлах, хөрөнгө оруулгын мэдээллийг санг нь устгаж энэ хэргээр дахин эрүүгийн хэрэг үүсгэх, захиргааны хариуцлага хүлээлгэх, гүйцэтгэх ажиллагаа явуулах, хэвлэл мэдээллээр бичсэн тохиолдолд иргэнийг 5 сая төгрөгөөр байгууллагыг 50 сая төгрөгөөр торгоно гэж тусгажээ. Өөрөөр хэлбэл хууль бусаар орлого олсон бүх хүний мэдээллийг нууцалж бүр өршөөх юм байна. С.Бямбацогт энэ талаар гэр, аж ахуй нэгжээ авч явахын тулд татварын мэдүүлгээ буруу мэдүүлсэн хуурамч тайлан гаргасан газруудыг төр өршөөх асуудлыг хөндөөгүй байж авлигачдыг өршөөхийн тулд хууль оруулж ирж байгааг МАН-ын бүлэг дэмжихгүй гэлээ.