Татвар төлөгчдийн 90 сая төгрөгөөр жааз худалдаж авсан агентлагуудыг тойрсон хэл ам тасрахгүй нь.

Энэ сарын эхээр нэр бүхий хэвлэл мэдээллийн хэрэгслүүд Засгийн газрын дэргэдэх есөн агентлагийг шилдгээр шалгаруулж өргөмжлөл гардуулан чухам юм болсон.  Уг үйл явдлын дараагаар нөгөө шилдэг гэх есөн агентлагт нь олон нийт шившигтэй гэсэн нэрийг хайрласан билээ. Учир нь   шилдэгийн шилдгүүд бус хамгийн муу дүнтэй ажилладаг цаашилбал үйл ажиллагаа нь доголдолтой агентлагуудыг тодруулсанд байгаа юм. Ганц муу ажилладагаар зогсохгүй татвар төлөгчдийн мөнгөөр шилдэг гэх өргөмжлөлийг худалдаж авсан нь гал дээр тос нэмж орхисон билээ.

 Энэ талаарх мэдээллийг сэтгүүлч Б.Ганчимэг олон нийтэд дэлгэж дуулиан тарьсан. Мөн үүнийг нь ШӨХТГ-ын дарга О.Магнай баталж “10 сая төгрөгөө буцааж өгөөрэй. Ичдэггүй юм уу” хэмээн жиргэсэн. Тэр бүү хэл уг асуудал УИХ-ын чуулганы хуралдааны үеэр яригдаж Ерөнхий сайдыг байж суух газаргүй болгосон юм. УИХ-ын дарга З.Энхболд л гэхэд “Шилдэг гэх өргөмжлөл нь 10 сая төгрөгийн үнэтэй юм гэнэ лээ. 10 сая төгрөгөө аваад жаазыг нь буцааж өгүүл” гэж Их хурлын индэр дээрээс хэлсэн.

Энэ мэт олон нийтийн шүүмжлэлийг дагуулаад байсан уг асуудлыг УИХ-ын гишүүн С.Ганбаатар дахин сөхлөө. Тодруулбал, тэрбээр шилдэг гэх өргөмжлөлийг мөнгөөр худалдаж авсан есөн агентлагын даргыг халах шаардлагыг удахгүй Ерөнхий сайд Н.Алтанхуяг, Шадар сайд Д.Тэрбишдагва нарт хүргүүлэхээр бэлтгэж эхэлсэн байна. Түүний уг санаачлагыг дэмжиж байгаа гишүүд олон байгаа аж.

Тэрбээр энэ талаар “Мэргэжлийн хяналтын ерөнхий газар, Цөмийн энергийн газрыг шилдэг агентлаг болчихсон гэхэд итгэж ядаад байх юм.  Эдгээр есөн агентлагийн дарга нарыг ард түмний мөнгөөр тоглосонд хариуцлага тооцож халах хэрэгтэй. Эдгээр агентлагууд бүгд Ерөнхий сайд болон Шадар сайдын мэдлийн байгууллагууд. Тэгэхээр хариуцсан сайдууд нь арга хэмжээ авах ёстой. Та нар ард түмний мөнгөөр тоглохоо больцгоо” хэмээн өөрийн твиттер хуудаснаа жиргэжээ.

Эх сурвалжуудын мэдээлж буйгаар уг асуудал Ерөнхий сайд Н.Алтанхуягийн уурыг барсан гэнэ. Ерөнхий сайд үүнээс болж маш их уурласан бөгөөд агентлагийн дарга нартайгаа хариуцлага тооцно гэж ярьсан ч Шадар сайд Д.Тэрбишдагвын мэдлийн хүмүүсээр оролдож чадахгүй байгаа аж. Энэ мэт бүлэг, фракцийн мэдэлд байдаг хүмүүс нь Ерөнхий сайдад захирагдахгүй байгаа учраас асуудал гацаанд ороод байгаа юм байна. Үүнээс болж Засгийн газар дээр  нилээн маргаан болсон гэнэ.

Ямартай ч уг асуудал зүгээр нэг өнгөрөхгүй нь тодорхой боллоо.