УИХ-ын гишүүн Х.Болорчулуун Газрын тосны тухай хуулийн талаар сэтгүүлчдэд мэдээлэл хийлээ. Тэрбээр уг хуулийн төслийн ажлын хэсгийг нэг жил гаруй ахалж ажилласан бөгөөд эцсийн шийдвэр УИХ-ын чуулганы хуралдаанаар гарах үед  гишүүдийн олонхийн дэмжлэг авч чадаагүй. Гэтэл Засгийн газраас Газрын тосны тухай хуулийн шинэчилсэн найруулгын төслийг дахин өргөн барьсан. Шинээр өргөн барьсан хуулийн төслийг өчигдөр Эдийн засгийн байнгын хорооны хуралдаанаар хэлэлцэн дэмжсэн нь ёс зүйгүй үйлдэл гэлээ.

Засгийн газраас өргөн барьсан хуулийн төсөл нь  Монгол Улсад ашиггүй, өмнөх хуулинд байсан чухал заалтуудыг авч хаясан гэв. Тэрбээр энэ талаар "Газрын тос олборлодог дэлхийн бусад орнуудын тухайн улсын эзэмших хувь нь 70 хувь хүртэл байдаг. Гэтэл манай улсад 24-хөн хувь байгаа нь харамсалтай. Түүгээр зогсохгүй газар нутаг, тэр том тал нутгийг сүйтгэснийхээ төлөө 24 хувийн ашгийг Монгол Улсад өгдөг. Бид энэ байдлыг өөрчлөе гэж байсан ч шинэ хуулиар ийм зүйл орж ирээгүй байна. Шинэ хуульд газрын тосны ашгийн хувь  хэмжээг тухайн Засгийн газар нь тогтооно гэсэн байна. Уг нь тодоохой хувь хэмжээ заах ёстой байсан. Энэ мэт олон эсэргүүцэж шалтгаан шинэ хуулинд байна" гэсэн юм.

Мөн Монгол Улсын эзэмших хувь нь 50 хүртэл хувь болох, төлбөрийг зөвхөн Монгол Улсын банкаар дамжуулах зэрэг олон чухал заалтуудыг оруулж ирсэн байсан ч шинэ хуулинд тусгаагүй байна. УИХ-ын чуулганы хуралдааны үеэр гишүүд газрын тосны төлбөрийг Монгол Улсын банкаар дамжуулах нь зүйтэй гэж байсан боловч эсэргээрээ орж ирсэн байна гэлээ.