Засгийн газрын хэрэгжүүлэгч агентлаг, хөрөнгө оруулалтын газар, МҮХАҮТ болон БНХАУ-ын ӨМӨЗО-ны Худалдааны танхимтай хамтран Монгол Улс болон БНХАУ-ын ӨМӨЗО хоорондын худалдаа, хөрөнгө оруулалтын хамтын ажиллагааг өргөжүүлэх зорилгоор “Монгол Улс–ӨМӨЗО Хөрөнгө оруулалтын чуулга уулзалт 2014” уулзалтыг ирэх сарын 2-4-ний өдрүүдэд МҮХАҮТ дээр зохион байгуулах гэж байна. Энэхүү уулзалтанд БНХАУ-аас эрчим хүч, зам тээвэр, барилга, уул уурхай, хүнс, хөдөө аж ахуй, харилцаа холбоо, худалдаа, банк санхүү, байгаль орчины салбарын нийт 200 орчим хөрөнгө оруулагчид, бизнес төлөөлөгчид хүрэлцэн ирэх бөгөөд уг чуулга уулзалтын үеэр хөрөнгө оруулалт шаардагдаж буй төсөл, хөтөлбөрүүдийг танилцуулах, бизнесийн хамтын ажиллагаагаа өргөжүүлэх, бизнесийн түншээ олох боломжтой тул энэ чиглэлээр үйл ажиллагаа эрхэлдэг манай дотоодын аж ахуйн нэгж, байгууллагуудыг оролцох боломжтой. Уг арга хэмжээг үнэ төлбөргүй зохион байгуулж байгаа бөгөөд оролцох хүсэлтэй аж ахуйн нэгж, байгууллагуудыг Хөрөнгө оруулалтын газар болон МҮХАҮТ дээр бүртгэж байна.