Чуулганы үдээс өмнөх /2014.06.19/ хуралдаанаар Нийтээр тэмдэглэх баярын болон тэмдэглэлт өдрүүдийн тухай хуульд өөрчлөлт оруулах тухай, Үндэсний их баяр наадмын тухай хуулийн зарим заалтыг хүчингүй болсонд тооцох тухай, Дипломат албаны тухай хуульд нэмэлт оруулах тухай хуулийн төслүүд /Засгийн газар 2014.05.16-ны өдөр өргөн мэдүүлсэн, төрийн ёслолын журмыг Монгол Улсын Ерөнхийлөгч батлах тухай/ -ийг хэлэлцэх эсэх асуудлыг хэлэлцлээ.Энэ төслийн агуулга нь төрийн ёслолын журмыг Ерөнхий сайд биш Монгол Улсын Ерөнхийлөгч батлах тухай юм.
Уг хуулийн төслийн талаар Ж.Энхбаяр “Бид парламентын засаглалтай улс орон. Яагаад ёслолын арга хэмжээг Ерөнхийлөгчийн институцэд шилжүүлж байгааг ойлгохгүй байна. Өнөө өмнө тавгын идээг 10 үеэр өрж байсан. Түүн шиг алдаа гарвал ерөнхийлөгч хариуцлага хүлээх юм уу. Засгийн газар нь ажлаа хийгээд, хариуцлагаа үүрээд л явж байг. Гүйцэтгэх засаглал нь өөрсдөөсөө хариуцлагаа зайлуулаад байгаа юм уу. Энэ ямар учиртай юм бэ” хэмээсэн бөгөөд Засгийн газрын хэрэг эрхлэх газрын дарга Ч.Сайханбилэг үүнд нь хариулт өгч “Энэ их энгийн зохицуулалт. Хуульд буй Засгийн газар гэдгийг Ерөнхийлөгч гэж сольж байгаа. Засаглалын эрх мэдэл булаалдах асуудал байхгүй. Бид журмаа баталдаг, журманд хариуцлагын асуудлаа тусгагдаад л явна. Том өөрчлөлт орохгүй. Төрийн ёслолын алба ажилдгаараа л ажиллаад явна” хэмээн тайлбарласан юм.
Үүний дараа хуулийн төслүүдийг Төрийн байгуулалтын байнгын хорооны хуралдаанаар дэмжээгүй саналыг дэмжих нь зүйтэй гэсэн саналын томьёоллоор санал хураалт явуулсныг хуралдаанд оролцсон 64 гишүүнээс 45 нь буюу 70,3 хувийн саналаар дэмжих нь зүйтэй гэж үзсэнээр анхны хэлэлцүүлэгт бэлтгүүлэхээр холбогдох байнгын хороонд шилжүүллээ.
