“Бразилийн 18”-ийн талаар дөнгөж сая НИТХ-ын МАН-ын бүлгийн гишүүд мэдээлэл хийлээ. НИТХ-ын нэр бүхий гишүүд Хөлбөмбөгийн ДАШТ-тэй эхлэхтэй зэрэгцээд туршлага судлахаар Бразил болон Кубыг зорьсон.

Тэднийг явуулах тухай тушаал гарсан цагаасаа олны хэл ам дагуулсан бөгөөд улсын мөнгөөр хөлбөмбөг үзэх нь гэсэн хардлага газар авсан юм. Энэ нь ч батлагдаж тэд одоо Бразилд хөлбөмбөг үзэж явна. Эдгээр 18 гишүүний дотор НИТХ-ын МАН-ын бүлгийн таван гишүүний нэр байсан. Харин тэд Бразил яваагүй гэдгээ баталж өнөөдөр мэдээлэл хийсэн нь энэ. Тэдний хэлж буйгаар улсын Эдийн засаг хүндэрч, урсгал зардлаа хэмнэх УИХ-ын тогтоол гарсан байхад Бразил руу хөлбөмбөг үзэхээр явах нь зохимжгүй аж. Тиймээс үргүй зардлаа хэмнэхийн тулд яваагүй гэсэн тайлбарыг хэллээ.

МАН-ын бүлгийн гишүүн Г.Мөнхбаяр "НИТХ-ын 18 гишүүн улсын зардлаар Бразил явж хөлбөмбөг үзэх нь" гэдэг мэдээлэл гарсны дараагаар явахаа больсон юм биш. Уг мэдээлэл сенсааци дэгдээхээс өмнө явахгүй гэдгээ илэрхийлээд нэрээ татаад авчихсан байсан" гэж хэлэв.

НИТХ-ын МАН-ын бүлгээс Нийслэлийн данхайсан бүтцийг багасгаж, урсгал зардлыг хэмнэхийг Нийслэлийн засаг даргаас  шаардаж  шаардлага хүргүүлжээ. Гэтэл шаардлагад нь ямар нэгэн хариу ирүүлээгүй байна. Тиймээс шаардлагад нааштай хариу иртэл хэлэлцэж буй  асуудлуудаар завсарлага авахаар болсон гэв.