Ш.Түвдэндорж ҮХАА-н сайдаар томилогдсон учир түүний оронд УИХ дахь Хууль зүйн байнгын хороог хэн даргалах вэ гэдэг асуудал өнгөрсөн өдрүүдэд олны анхааралд байлаа. АН-ын бүлэг хуралдаж УИХ-ын гишүүн А.Ганбатыг Хууль зүйн байнгын хорооны даргад нэр дэвшүүлсэн. Ингээд А.Ганбатыг томилох асуудлыг хэлэлцэх гэтэл Ш.Түвдэндорж Хууль зүйн байнгын хорооны даргаасаа чөлөөлөгдөх хүсэлтээ албан ёсоор өгөөгүй учраас уг асуудал өчигдрийг хүртэл хойшлоод байсан юм. Тэгвэл Ш.Түвдэндорж өчигдөр ажлын цаг дуусангуут Байнгын хорооны даргын албан тушаалаасаа чөлөөлөгдөх өргөдлөө өгчээ.

Учир нь түүнийг сайдаар томилогдсон шийдвэр дээр Ерөнхийлөгчийн хориг тавих хугацаа өчигдөр 17.00 цагт дууссан байна. Тэрбээр өмнө нь Ерөнхийлөгчийг хориг тавьж магадгүй гэдгээс айгаад Байнгын хорооны даргын ажлаа өгөхгүй байгаад байжээ. Энэ талаараа хэвлэлд өгсөн ярилцлагадаа дурдсан байна.

Хэрвээ Ерөнхийлөгч хориг тавьсан бол тэрбээр ҮХАА-н сайд, Байнгын хорооны даргын аль ч албан тушаалд үлдэхгүй байсан юм. Тиймээс ҮХАА-н сайдаас буусан ч Байнгын хорооны даргын ажилтайгаа үлдэхийн тулд өргөдлөө өгөхгүй асуудлыг сунжруулаад байж.

Албан тушаал ч хүчтэй юм аа.