Татвар төлөгчдийн мөнгөөр хөл бөмбөгийн дэлхийн аваргын тэмцээн үзэхээр Бразилийг зорьсон НИТХ-ын тэргүүлэгчдийн асуудал цахим ертөнцийг шуугиулж олон нийтийн дургүйцлийг ихээр хүргээд байгаа билээ.

    Нэр бүхий 18 төлөөлөгчдийг Бразиль, Куба улсад туршлага судлуулахаар явуулах тухай НИТХ-ын тогтоол цахим ертөнцөд ил болсонд зарим төлөөлөгчид нь “бантаж” явалгүй үлдсэн. Өнгөрөгч долоо хоногт МАН-аас нийслэлд сонгогдсон иргэдийн хурлын тэргүүлэгчид мэдээлэл хийж “Бид нар яваагүй шүү, тэд нар муухай байгаа биз” гэсэн аягтай зүйлийг хэвлэлийнхэнд ярьж сайрхаад авсан. Тэд мундагтаа биш уг асуудал ил болж олон нийтийн анхааралд өртсөн болохоор л аргагүй яваагүй үлдсэн гэж тайлбарлахад буруутахгүй. Учир нь нийслэл дүүргийн удирдлагууд, ИТХ-ын тэргүүлэгчид жил бүр л улаан цагааны нам гэлтгүй Тайлан, Дубайгаар зугаалдаг болсон нь нууц биш. Тэгэхээр МАН-ынхан татвар төлөгчид, ард түмэндээ хайртайдаа яваагүй гэвэл түүн шиг эндүүрэл байхгүй. Хурал дээрээ “Бразил явья” гээд гараа өргөөд сууж байсныг нь гэрчлэх хүн олон.

    Ямартай ч татвар төлөгчдийн мөнгөөр алс холын Куба, Бразилийг зоригчдод хариуцлага тооцох ёстой гэсэн байр суурь УИХ-ын даргаас эхсүүлээд нийгмийн дэмжлэгийг авч тэдэнд акт тогтоож, торгууль хүлээлгэх нь тодорхой болж байна.

    Эх сурвалжуудын мэдээллэж байгаагаар Бразил явах 18 төлөөлөгчид зориулж 183 сая төгрөгийн зардлыг нийслэлийн төсвөөс зарцуулахаар болсон бөгөөд онгоцны бизнес ангиллын тасалбар, таван одтой зочид буудлын төлбөрийг урьдчилаад хэдийн төлсөн гэнэ. Энэ хэмжээний мөнгийг холбогдох хүмүүсээр төлж барагдуулах тухай яриа дээр дооргүй яригдаж эхэлж байна. Гэвч Бразил явсан эдгээр эрхмүүд өөрсдөө дур мэдэн хэний ч зөвшөөрөлгүй тийшээ явчихаагүй. Тиймээс энэ асуудлаар зөвхөн явсан нөхдөд нь хариуцлага тооцож дүр эсгээд өнгөрч боломгүй мэт. Хэрвээ хариуцлага тооцох бол холбогдох бүх албан тушаалтанд хамруулж бодитой хариуцлага тооцох шаардлагатай.

    Тухайлбал тэднийг Бразил, Куба улсаар аялуулах тогтоолд гарын үсэг зурсан НИТХ-ын дарга Д.Баттулга хамийн түрүүнд хариуцлагаа хүлээх ёстой хүн мөнөөс мөн. Гэтэл “Энэ үйл явдал надад болон НИТХ-д томоохон сургамж боллоо. Аудитын хүмүүст торгууль акт тавихаа түр азнаач. Тодорхой алдаа гарсан. Тэр хүмүүсийг ирэхээр нь албан шаардлага хүргүүлнэ” гэж асуудалд огт хамааралгүй хөндлөнгийн хүн шиг зүйл яриад зогсож байгаа нь тун зохимжгүй үйлдэл юм. 183 сая төгрөг үрлэгдэн байж сургамж авдаг ийм дарга байх шаардлагатай ч юмуу? Үгүй ч юмуу? Ийм зүйл нийслэл дээр болж байхад дуугүй хараад сууж байсан хотын дарга Э.Бат-Үүлд ч энэ асуудал хамааралгүй биш. Толгой зөвшөөрөөгүй байхад хөл тийм хол туучна гэж юу байхав.

    Түүнчлэн Бразил явахаар билет, зочид буудлынхаа төлбөрийг төлсөн ч олон нийтийн шахалтаас болоод явж чадаагүй сайн дүр эсгэгчдэд онгоцны тасалбараа “үхүүлсэн” зочид буудлын төлбөрөөс алданги хүлээлгэсэн бол тэр хэмжээний торгууль алдангийг нь холбогдох этгээдүүдээс гаргуулах хэрэгтэй. Иргэний үнэмлэхээ өгч билетээ бичүүлэхээсээ өмнө эх орноо бодох ёстой биз дээ.