УИХ дахь бие даагчдын зөвлөлөөс мэдээлэл хийлээ. Мэдээллийн дараа УИХ-ын гишүүн Ц.Даваасүрэн сэтгүүлчдийн сонирхсон асуултад хариулт өглөө.

-Эдийн засгийн хөгжлийн сайд Н.Батбаярыг огцруулах эсэх асуудлыг энэ долоо хоногт хэлэлцэнэ. Уг асуудалд танай бүлэг ямар байр суурьтай байна вэ?

-Эдийн засагт үүсээд буй асуудал нь валютын ханштай холбоотой гэж үзэж байгаа. Тиймээс Монголбанкны ерөнхийлөгч болон Эдийн засгийн хөгжлийн сайд үүнд хариуцлага хүлээх ёстой. Энэ асуудлыг хэлэлцэх үеэр байр сууриа тодорхой илэрхийлнэ. 

-Мөнгөний бодлогоо барьж чадаагүй Золжаргалыг огцруулахаас урьтаж, Эдийн засгийн хөгжлийн сайд Н.Батбаярыг огцруулах гэж буй нь Засгийн газрыг тогтворгүй байлгах гэсэн зорилго гэж зарим хүмүүс үзэж  байна.  Энэ талаар та юу хэлэх вэ?

- Сонгуульд ялах гэсэн зорилготойгоор Засгийн газарт тогтворгүй байдал үүсгэж байгаа бол дэмжихгүй. Эдийн засгийн хямрал бол бидний зовлон. Үүний ард гарахын төлөө хичээх ёстой. Түүнээс энэ зовлонгоор далимдуулж хүслээ биелүүлдэг байж болохгүй. Бидний мөнгөний бодлого дээр баримталсан гурван зорилгын нэг нь валютын ханш байсан. Энэ агуулгаараа бид хариуцаж буй эзэнтэй нь хариуцлага тооцох асуудлыг хөндсөн. Түүнээс биш энэ нь хэн нэгний хүслээ биелүүлэх хэрэгсэл байж болохгүй. Энэ асуудлыг нэлээд нарийвчилж үзэж байж байр сууриа илэрхийлнэ.

-Банкуудад тодорхой арга хэмжээ авч валютыг удирдах боломжийг олгосон. Гэтэл зөвхөн интервенцээр валютын ханшийг тогтоох гэж оролдоод байна. Энэ талаар ямар бодолтой байна вэ?

-Банкны салбараар дамжуулан мөнгөний бодлогоор экспорт, импортыг дэмжих зээлийг зөвхөн Засгийн газар олгох ёстой. Гэтэл Монголбанк  гурван их наяд төгрөгийн зээлийг  барилгын салбарт өгсөн. Энэ нь зөвхөн импортын хэрэглээг өндөр болгочихсон.  Иймээс л бид Монголбанкны Ерөнхийлөгчийг огцруулах хүсэлт гаргасан.

-Энэ санал хэдийгээр хэлэлцэгдэх бол?

-Үүнийг бил хүлээж л байна. С.Ганбатаар гишүүн УИХ-ын даргад албан тоот хүргүүлсэн.