УИХ-ын гишүүн Ж.Батзандан бухимдаж явна. Учир нь түүнийг Хууль зүйн байнгын хорооны даргад өрсөлдөхөд намынх нь зүгээс янз бүрийн хаалт, халхавчийг тавьж байгаа аж. Гэхдээ тэрбээр бууж өгөлгүй Хууль зүйн байнгын хорооны даргад нэр дэвшинэ гэдгээ дуулгаад байгаа. 

 Тодруулбал, Үйлдвэр, хөдөө аж ахуйн сайдаар Хууль зүйн байнгын хорооны дарга Ш.Түвдэндорж томилогдсоноор тус байнгын хорооны даргын суудал  эзгүйрээд байгаа. Түүний оронд хэнийг томилох вэ гэдэг асуудал АН дотор багагүй зөрчил үүсгээд байгаа юм.

АН-ын бүлгээс Д.Ганбатыг ХЗБХ-ны даргаар санал болгож байгаа боловч УИХ-ын гишүүн О.Баасанхүү танхимаас УИХ-ын гишүүн Ж.Батзанданг нэр дэвшүүлсэн. Гэтэл Ж.Батзанданг нэр дэвшингүүт Ардчилсан намын бүлгээс “Нэг намын бүлгээс хоёр хүн нэр дэвшиж байгаа тул бүлгээр ярилцах шаардлага үүслээ” хэмээн завсарлага авсан.

 Харин УИХ-ын гишүүн Ж.Батзандан энэ талаар хэвлэлийн бага хурал хийж "ХЗБХ-ны даргад АН-ын гишүүдийг чөлөөтэй өрсөлдөх боломжоор хангаж өгөөч. Өрсөлдөх боломжийг хангаж ХЗБХ-ны даргын асуудлыг яаралтай шийдвэрлэхэд АН-ын бүлгээс тэр дундаа дарга Д.Эрдэнэбат элдэв саад болохгүй байхыг хүсье. Хэн нь томилогдох нь чухал биш. Сонгон шалгаруулалтыг хоёроос дээш гишүүнээс сонгож явуулах ёстой. Нэг хүнийг нэр дэвшүүлээд шууд томилдог бус олон хүн өрсөлдүүлж, сонгох нь ардчилалын зарчим” гэж хэлсэн нь олны анхаарлыг ихээхэн татсан юм.

Д.Ганбатыг томилох нь АН-д ашигтай. Учир нь фракцийн зөрчил бага ч гэсэн буурна. Ер нь сүүлийн үед АН фракцийн зарчмаар албан тушаал хувиарладаг болсон. Энэ нь Ш.Түвдэндоржийн томилгооноос илүү мэдрэгдсэн. Тэгвэл Ш.Түвдэндоржид албан тушаал амалж амыг нь таглан Х.Баттулгыг ганцаардуулах үйл явц одоо Д.Ганбат дээр хэрэгжих гэж байна. Д.Ганбатын хувьд хуулийн салбарын хүн биш байж Хууль зүйн байнгын хороог даргалах гэж буй нь зарим гишүүдийн зүгээс ирэх эсэргүүлийг улам дэвэргэж магадгүй юм.  Ер нь АН сүүлийн жилүүдэд шударга, өрсөлдөөнөөс илүүтэй фракцийн зарчмыг харж албан тушаал хувиарладаг болсон нь олны дургүйцлийг ихээхэн хүргэж байна. Хуучин бол МАН-аас л ийм үйлдэл гардаг байлаа. Харин МАН энэ алдаагаа засч чадаж байгаа гэдэг нь бүлгийн дарга С.Бямбацогтийг сонгох үйл явцаас тод харагдсан. Бүлгийн даргаа сонгох үед МАН-аас Су.Батболдыг нэр дэвшүүлсэн. Харин танхимаас С.Бямбацогт нэр дэвшиж өрсөлдөөд ялсан. Нам доторх уламжлал нэрээр олон жил өрсөлдөөнгүй албан тушаалд томилдог байсан асуудал энэ намаас бага ч гэсэн арилж буйн ганц жишээ энэ болсон юм. Тэгвэл АН эсрэгээрээ болж.

Тийм ч учраас АН-д зайлшгүй байх ёстой чөлөөт өрсөлдөөн гэгч зүйлийг бий болгож ажиллах тухай албан бичгийг УИХ-ын Ж.Батзандан намынхаа удирдлагуудад хүргүүлжээ. 

УИХ-ын гишүүн Ж.Батзандан энэ талаар “УИХ-ын тухай хуульд Байнгын хорооны даргыг байнгын хорооны гишүүд дундаас нэр дэвшүүлж сонгоно гээд заачихсан. Харамсалтай нь сүүлийн жилүүдэд төрийн албан тушаалыг өрсөлдөөний зарчмаар бус фракцийн хувиарлалтаар хийдэг болсон. Энэ ужиг зуршлыг засах ёстой. Манай намын дотоод зохион байгуулалт, эрх мэдлийн буруу хувиарлалтаас болж хямрал даамжирч байгаа. Ялангуяа мэргэжлийн бус хүнээр мэргэжлийн байгууллага удирдуулснаас болж хямрал илүү нүүрлэж байна. Ийм үед АН-ыг засч залруулахын төлөө өөрийн биеэ золиослоод ч хамаагүй зүтгэнэ. Манай дарга нар энэ гажуудлаа хэвийн зүйл гэж ойлгох болж” гэжээ.

Түүнийг ингэснийх нь төлөө хариуцлага тооцож магадгүй талаар ч тэрбээр ярьжээ. Магадгүй намаас нь хөөх асуудлыг хөндөж магадгүй юм байна. Гэхдээ тэрбээр  чөлөөт өрсөлдөөний зарчмаар Хууль зүйн байнгын хорооны даргад нэр дэвших бодлоосоо ухрахгүй гэнэ. Мөн эзэмшсэн мэргэжилдээ тулгуурлан өөрийгөө Хууль зүйн байнгын хороог удирдаад явж чадна гэж үзэж байгаа аж. 

Ж.Батзандан гишүүн “Манай намын олон гишүүн фракцийн зарчмаар албан тушаал хуваарилах нь улс орны эрх ашигт хор хохирол учруулдаг гэдгийг ойлгосон. Одоо бид энэ чөтгөрийн тойргоосоо гарах хэрэгтэй. Энэ гажуудлаа засахгүй бол АН өөрийгөө хохироогоод зогсохгүй улс орныг хохирооно. Мэргэжлийн ажил дээр мэргэжлийн хүнийг л томилох ёстой. Фракци энд огт хамаагүй” гэв.