"Шударга ёс" эвслийн бүлэг хуралдаж хэлэлцсэн асуудал, гаргасан шийдвэрийнхээ талаар сэтгүүлчдэд мэдээлэл өглөө. Мэдээллийг бүлгийн дарга Н.Батцэрэг хийв.

Бүлгийн хуралдаанаар хамгийн эхэнд Ашигт малтмалын тухай хуулийн төсөлд нэмэлт өөрчлөлт оруулах тухай хуулийн төслийг авч хэлэлцсэн байна. Тодруулбал, томоохон уул уурхайн ордуудад төрөөс баримтлах байр суурь ямар байх талаар нухацтай хэлэлцжээ. Уг асуудлаар салбарын мэргэжилтэн болон эрдэмтэн судлаачдын саналыг ч сонссон байна. Ингээд төсвийн мөнгөөр хайгуул хийсэн бол стратегийн ордуудад төрийн эзэмших хувь 51-ээс доошгүй байх ёстой. Харин хөрөнгө оруулагчид өөрсдийн зардлаар хайгуул хийсэн бол 34-50 хувь хүртэл байх нь зөв гэсэн шийдвэрт хүрчээ.

Мөн сүүлийн үед олны анхаарлыг татаад буй "Төрөөс төмөр замын тээврийн талаар баримлах бодлого"-ын талаар хэлэлцэж, Засгийн газрын өргөн барьснаар дэмжихээр болжээ. Засгийн газраас өргөн барьсан тогтоолын төсөлд УБТЗ-ын үндсэн төмөр замтай холбосон  замыг 1535 мм буюу өргөн, харин томоохон ордуудаас урд хөрш рүү гарах замыг нарийн царигтай байхаар заасан байдаг. Энэ талаар бүлгийн дарга Н.Батцэрэг "Төмөр замын асуудлаа шийдээгүйн улмаас нүүрсний үнэ уналтад орсон. Тиймээс Засгийн газрын өргөн барьсан тогтоолыг даруй шийдвэрлэх ёстой" гэв.

Мөн Эдийн засгийн ил тод байдлыг дэмжих тухай хуулийн төслийн талаар хэлэлцжээ. Ингээд уг хуулийн төсөлд заагдсан концессоор хийгдэх ажлуудыг дэмжихээр болсон байна. Харин бусад зүйл заалтуудыг дахин бүлгийн хурлаар ярилцахаар болсон байна.

УИХ-ын гишүүн Ц.Оюунбаатар тэргүүтэй нийт 24 гишүүний өргөн барьсан Өршөөлийн тухай хуультай ижил агуулга бүхий хуулийн төслийг Засгийн газраас өргөн барьсан. Тэгвэл энэ асуудлыг судлуулахаар тус намын бүлэг ажлын хэсэг гаргахаар болжээ. Ажлын хэсгийн ахлагчаар УИХ-ын гишүүн Ц.Оюунбаатар ажиллах юм байна. Өршөөлийн тухай хуульд авлига, хээл хахууль болон эдийн засгийн гэмт хэрэгт холбогдсон этгээдүүд хамрагдахгүй гэсэн заалт байгаа гэдгийг бүлгийн дарга Н.Батцэрэг онцоллоо.