УИХ-ын Эдийн засгийн байнгын хороо өнөөдөр хаалттай хуралдаж, Төрөөс төмөр замын тээврийн талаар баримтлах бодлогын хэрэгжилтийг хангах зарим арга хэмжээний тухай УИХ-ын тогтоолын төслийг хэлэлцээд олонхи гишүүн дэмжсэнээр “Төслийг хэлэлцэх нь зүйтэй” хэмээн үзэж, чуулганы хуралдаанд оруулахаар болсон.

Хаалттай хуралдааны уур амьсгал ямар болсон, голчлон хэлэлцэгдсэн асуудлуудын талаар УИХ-ын гишүүн Ж.Энхбаяраас асуухад “Х.Баттулга гишүүн хоёр жилийн дотор 1000 гаруй км замыг тавиад дуусна гэж ярьж байсан. Гэтэл өнөөдрийн байдлаар нэг км байтугай нэг метр ч төмөр зам тавигдаагүй байна. Одоо бүр улс орныг талцуулсан тусгай нэвтрүүлгүүд явагдаж эхэллээ. Нэг нэгнээ хятадын эрлийз, хурлийз болгоод ард түмнээ хоёр хувааж байна. Энэ нь үндсэндээ АН доторх, фракци хоорондын зөрчил, эрээ цээрээ алдаж байгаагийн илрэл юм. Шулуухан хэлэхэд салбар хариуцсан сайд нь энэ бодлогыг дэмжихгүй, гарын үсэг зурахгүй гэдгээ илэрхийллээ. Ерөнхий сайд нь харин  салбарынхаа сайдыг гуйгаад сууж байна. 2010 онд энэ бодлого гарсан. Тэр бодлого дээр бүх зүйл нь тодорхой байгаа. Хэрэгжүүлэх арга хэмжээг Засгийн газар хийх үүрэгтэй” гэлээ.

Төмөр замын царигийн асуудал дээр Засгийн газар хоёр хуваагдчихаад буйг энэ үйл явдал дахин нотоллоо.