Эдийн засгийн бүрэн тусгаар тогтнолд хүрэхийн тулд  төмөр замын нарийн, өргөн царигийн алийг нь сонгох вэ гэдэг асуудал  нийгэмд  маргаан, талцал, үл ойлголцол бий болгоод байна. Үүнтэй холбоотойгоор эрх баригчид хийгээд энгийн ард ч өөр хоорондоо маргалдаж, зөв буруу ойлголцсоор байгаа юм. Тэгвэл сүүлийн үед  хэвлэл мэдээллийн хэрэгслээр хүмүүсийн тархийг угаах бодлого ч хүчтэй явагдаж эхэллээ.

Өөрөөр хэлбэл, өргөн царигтай төмөр зам барина гэдэг дээр хатуу зогсож чадсан ҮХАА-н сайд асан Х.Баттулгын хүссэнээр зарим нэг нэвтрүүлгийг бэлтгэж байна гэх яриа газар авч байна. Тэрбээр анхнаасаа л  үзэл бодолдоо тууштай байна гэдгээ илэрхийлсээр ирсэн. Мөн өөрийн энэ санал шийдвэрийнхээ төлөө юу эсийг хийж чадахаа ч энэ удаад харуулж байх шиг байна . Х.Баттулга гишүүний ачаар монголын ард түмэн өөр хоорондоо талцах дээрээ тулж, залуус нь нэг л омогшсон, эх орноо гэсэн хүмүүс болж хувирлаа.  

Тиймээс Засгийн газрын зүгээс Х.Баттулгын "найруулсан" нэвтрүүлгийг шалгах үүрэг даалгавар өгөөд байна. Тодруулбал, сүүлийн үед зарим телевиз, хэвлэл мэдээллийн хэрэгслээр байнга цацагдаж байгаа “Зуун чухал сэдэв” нэвтрүүлэг нь Монгол Улсын үндэсний аюулгүй байдал, эдийн засгийн тусгаар тогтнол, манай орны мөнхийн хөрш болсон хоёр улстай харилцах харилцаанд сэв суулгахуйц агуулгатай, гүтгэлэг, заналхийллийн шинжтэй байгаатай холбогдуулан Монгол Улсын Засгийн газраас мэдэгдэл хүртэл  гаргалаа.

Тус мэдэгдэлд, Олон нийтийн мэдээллийн хэрэгсэл, цахим сүлжээгээр худал хуурмаг мэдээлэл, өөрсдийнхөө үзэл бодлыг зохион байгуулалтайгаар түгээн иргэдийг талцуулан хагаралдуулж байгаа нь бидний цөөхөн монголчуудын дунд байж болшгүй үзэгдэл хэмээн онцоллоо.

 Тиймээс үндэсний аюулгүй байдалд харш, хэт туйлширсан үзэл бодлоо олон нийтэд тулгаж, нэвтрүүлэгт оролцсон иргэдийн яриаг өөрсдийн хүсэл зорилгод нийцүүлэн эвлүүлсэн, занан сүрдүүлсэн нэвтрүүлэг, нийтлэл, ярилцлагуудын талаар хууль хяналтын байгууллагад хандаж шийдвэртэй арга хэмжээ авахаар болоод байна.

Мөн зарим эх сурвалжийн хэлж буйгаар нэвтрүүлэгт оролцсон хүмүүсийг ч шалгаж эхлэх аж. Тэд ийн нэг талыг барьж мэдээлэл тараасан нь цаанаа ямар ашиг сонирхол үйлчилж байна. Улмаар нэвтрүүлгийг хэн санхүүжүүлсэн гээд багагүй зүйлийг шалгуулахаар зэхжээ.
Учир нь нэвтрүүлэгт оролцсон "төлөөлөгчид" нарийн царигтай болно гээд байгаа нь эрх баригчдын санааг Хятадын бодлого, хятадуудад тэлэх боломжийг олгож байгаа мэтээр тайлбарлаж байгаа юм. Бүр тодруулбал, эрх баригчид баллаж сүйтгэсэн улс орныхоо өмнө хүнд байдалд орсон учир  хар амиа хоохойлохын тулд нарийн царигийг дуу нэгтэйгээр "тийм" гэсэн. Энэ нь 1910 онд Хятадын анхны ерөнхийлөгч Сүн Ят Сэний гаргаж байсан санаа. Түүнийг нь 2014 онд манай улс хэрэгжүүлэх гэж байна. Зураг төсөл бүх юм нь яг таг таарч байгаа нь тохиромжтой цагийг хүлээгээд суудаг хятадуудыг бодлогыг хэрэгжүүлж буй улс төрийн тохироо мэтээр ярьсан юм.

Мөн тухайн нэвтрүүлэгт оролцогчид дунд УИХ-ын гишүүн Ж.Энхбаяр, Г.Батхүү нар байсан бөгөөд тэд бид Х.Баттулгын дэмжээд буй өргөн царигийн асуудлаар нэвтрүүлэгт ороогүй. Шал өөр нэвтрүүлэгт орсон байхад биднийг ашигласан гэж үзэж байгаа аж.

Ерөнхий сайд Н.Алтанхуяг болон түүний баг “Гашуунсухайт-Тавантолгой” чиглэлийн төмөр замыг нарийн царигаар тавихаар бодлогоо тодорхойлж намын бүлэг дээрээ нэгдсэн шийдэлд хүрсэн ба МАН болон бусад намууд ч үүнээс өөр хувилбар байхгүй гэдэгтэй үндсэндээ эвлэрсэн. Гэтэл намынхаа бодлогыг сөрж нэгэнт бүтэл муутай болох нь нотлогдсон өргөн царигийн үлгэрээ “Хятадын айдас”-аар хачирлан олон нийтийн санаа бодлын эмзэг цэгийг дарж ард түмнийг АН, Н.Алтанхуягийн Засгийн газрын эсрэг чиглүүлэх ажлыг Х.Баттулга зохион байгуулсаар байгаа бөгөөд энэ удаад түүний эл үйлдлийг зүгээр өнгөрөөхгүй бололтой.

 Дашрамд хэлэхэд, уг нэвтрүүлгийг хөтлөн хүргэсэн Го.Бадарч "Хэрвээ УИХ, Засгийн газар нарийн царигаар төмөр зам тавих шийдвэр гаргавал хэн яман банзаар орж үйлчлүүлсэн, хэнтэй уулзсан, хэдэн төгрөг авч өгөлцсөн гээд бүх асуудлыг хоёр дахь нэвтрүүлгээрээ гаргана" гэлээ. Тэгвэл үүнийг зарим иргэд Го.Бадарч гуайн амнаас гарч буй  үг ч  Х.Баттулгын санаа гэж ярьцгааж байна.

Ингээд эрх баригчид Х.Баттулгыг шалгуулахаар болж, Х.Баттулга эрх баригдчын “но”-г дэлгэнэ гэж сүрдүүлж эхэллээ