Нийслэлийн иргэдийн төлөөлөгчдийн хурлын тэргүүлэгч гишүүд татвар төлөгчдийн мөнгөөр Бразил, Куба улсаар аялах болсон нь олон нийтийн эгдүүцлийг туйлын их хүргэж энэ асуудалд эрх баригчид ямар нэгэн хариуцлага тооцохгүйгээр өнгөрөх аргагүй болсон билээ. УИХ-ын дарга З.Энхболд “Дарханы иргэдийн төлөөлөгчид Дубайруу аялаад ирснийг аудитын газар шалгаад хувиас нь зардлыг нь гаргуулахаар болсон, Нийслэлийн иргэдийн хурлын тэргүүлэгчид ч мөн энэ мөнгийг хувиасаа төл” гэж ил цагаан мэдэгдснээр асуудал улам өндрөө авсан.

    НИТХ-ын дарга Д.Баттулга “Энд тодорхой алдаа гарсан, бидэнд их сургамж боллоо, Аудитын дүгнэлт гаргахыг түр азнаач. Явсан хүмүүсийг ирэхээр албан шаардлага хүргүүлнэ” гэж байр сууриа илэрхийлсэн. Гэвч Аудитын байгууллага үүнд шалгалт хийж Бразил явсан нөхдөөс өөрсдөөс нь мөнгийг нь гаргуулахаар шийдвэрлэсэн билээ.

    Эх сурвалжийн мэдээллэж байгаагаар НИТХ-ын тэргүүлэгч 18 гишүүн Бразил улсруу явахад 183 сая төгрөгийг нийслэлийн төсвөөс зарцуулсан байна.

    Улс орны эдийн засгийн байдал хүндрэлтэй, төсвийн орлого 300 тэрбум төгрөгөөр тасалдаж, томоохон хувийн хэвшлийн компаниуд үүд хаалгаа барих дээрээ тулж байхад татварын төлөгчдийн мөнгийг ингэж үргүй зарж, аялж зугаалах нь зохимжгүй үйлдлэл юм.

    Тэгвэл төсвөө хэтрүүлэн зарцуулсан сайд нарт ямар хариуцлага тооцох вэ? гэсэн асуулт үүнээс урган гарч байна. Үндэсний Аудитын газраас Монгол Улсын 2013 оны нэгдсэн төсвийн зарцуулалтанд хийсэн аудитын дүгнэлтээ саяхан УИХ-д хүргүүлж энэ нь гишүүдийн дунд багагүй маргаан дэгдээгээд байна.

    Тодруулбал Засгийн газрын сайд нар 200-500 сая төгрөгөөр төсвөө хэтрүүлсэн болох нь шалгалтын явцад тогтоогджээ. Сөрөг хүчний зүгээс төсвөө хэтрүүлсэн сайд нарын нэрсийг ил болгохыг шаардах болсон. Мөн огт машин унах эрхгүй 222 төрийн албан хаагч татвар төлөгчдийн мөнгөөр автомашин хөлөглөж байсан зөрчлийг илрүүлсэн байна. УИХ-аас төсвийн ерөнхийлөн захирагчдын хөрөнгө оруулалтын зардалд тусгаагүй худалдан авах эрхийг ТӨХ-ны 220 дугаар тогтоолоор олгосноор Хөдөлмөр нийгмийн хамгааллын яам 1 тэрбум 428 сая төгрөгөөр орон нутгийн хөдөлмөрийн хэлтсүүдэд авто машин худалдаж авсан нь төсвийн тухай хуулийн холбогдох заалтыг зөрчжээ. Төсвийн хугацаанд 695 тэрбум төгрөгийн зөрчил илэрсний 175 тэрбум төгрөгийн материаллаг зөрчлийг залруулсан гэдгийг онцолсон байна.

    Энэ мэтээр хууль тогтоомж зөрчиж, олгогдоогүй эрхийг эдэлж татвар төлөгчдийн мөнгөөр дур мэдэн худалдан авалт хийсэн сайд нарт ямар хариуцлага тооцох ёстой вэ? гэсэн асуулт өөрийн эрхгүй урган гарч байна. Бразил явсан нийслэлийн ИТХ-ын тэргүүлэгчид, Дарханы ИТХ-ын тэргүүлэгчдэд тооцсон хариуцлагын жишгээр бол сайд нар хэтрүүлэн хэрэглэсэн төсвөө хувиасаа төлөх нь шударга ёсонд нийцэх юм. Хууль аливаа албан тушаалтанд ижил тэгш үйлчлэх ёстой. Аймаг нийслэлийн албан тушаалтнуудад нэг янзаар үйлчлээд, сайд нарт өөрөөр үйлчлэх ёсгүй.

    Тиймээс татвар төлөгчдийн мөнгөөр дураараа дургиж, төрийн тансаглаллыг дэвэргэж байгаа сайд нартай хариуцлага тооцож зөрчил гаргасан төлбөрийг хувиас нь төлүүлэх нь шударга ёсонд нийцнэ.