Сүүлийн хэдэн өдөр манай улс зочин, гийчин ихтэй өнжлөө. ОХУ-ын Холбооны Хурлын Холбооны зөвлөлийн дарга хатагтай В.И.Матвиенко энэ сарын 22-23-ны өдрүүдэд Монгол улсад албан ёсны айлчлал хийгээд буцсан бол өчигдөр Хятадын Гадаад хэргийн сайд Ван И хүрэлцэн ирлээ. Түүний айлчлал өнөөдөр өндөрлөнө.

УИХ-аар төмөр замын асуудлыг нухацтай хэлэлцэж эхлэнгүүт Орос, Хятадын нөлөө бүхий улс төрчид манай оронд давхиад ирж буй олны анхаарлыг ихээхэн татаж байна. Дээрх хоёр айлчлалыг эртнээс төлөвлөсөн гэж албаны хүмүүс хэлж байгаа. Гэвч эх сурвалжуудын мэдээлж буйгаар эдгээр нь төлөвлөсөн айлчлал биш бөгөөд манай төмөр замын асуудалд оролцохоор ирсэн нь энэ аж. Ингэхдээ өөр, өөрсдийн улсын бодлого, эрх ашгийг Монголын төмөр замын бодлогод тусгах зорилготой ирсэн нь мэдээж.

ОХУ-ын бол өргөн царигтай төмөр замтай. Тиймдээ ч манайд тавигдах шинэ төмөр замыг өргөн царигтай тавиулах тал дээр нөлөөлөх гэж оролдож байгаа. Харин Хятадуудын хувьд өөрийн улстай адилаар нарийн царигтай байх асуудлаар мөн манайхантай ярилцаж байгаа. В.И.Матвиенко, Ван И нарын хэн, хэн нь саяын айлчлалаар төмөр замын асуудлаар тэр дундаа царигийн талаар манай удирдлагуудтай ярилцжээ.

Харин манайхан төмөр замын бодлогын асуудлаа өчигдөр л байнгын хороогоор хэлэлцлээ. УИХ-ын Эдийн засгийн байнгын хороо өчигдөр хаалттай хуралдаж “Төрөөс төмөр замын тээврийн талаар баримтлах бодлогын хэрэгжилтийг хангах зарим арга хэмжээний тухай” УИХ-ын тогтоолын төслийг хэлэлцээд Засгийн газрын бодлогыг дэмжихээр болсон.

Энэ нь нарийн царигийг дэмжсэн гэсэн үг. Гэхдээ уг асуудал УИХ-ын чуулганаар эцэслэн шийдэгдэнэ. Одоогоор АН болоод “Шударга ёс” эвслийн бүлэг нарийн царигийг дэмжинэ гэдгээ илэрхийлээд байгаа. Харин МАН энэ талаар одоог хүртэл байр сууриа илэрхийлээгүй байна. Гэхдээ төмөр замын царигийн асуудал шийдэгдтэл нилээн маргаан дэгдэх нь ойлгомжтой.

 Хэрвээ манай улс төмөр замын асуудлаа шийдчихвэл нүүрсээ асуудалгүй экспортолдог болохоос гадна эдийн засагт үнэлж барашгүй эерэг үр нөлөө гарах юм. Бид жижиг эрх ашгаас болж уг асуудлаа олон жил гацаасан. Харин энэ удаад яах эсэх нь удахгүй тодорхой болох биз ээ.