Монголын төр, нийгмийн нэрт зүтгэлтэн Дансранбилэгийн Догсомын  мэндэлсний 130 жилийн ойд зориулсан эрдэм шинжилгээний бага хурал энэ сарын 26-ны өдөр Төрийн ордны “Б” танхимд болох юм байна. Хуралд УИХ-ын гишүүн Б.Бат-эрдэнэ, Хэнтий аймгийн МАН-ын хорооны дарга Н.Ганбямба, Хэнтий аймгийн Баян-Овоо сумын ИТХ-ын дарга Д.Ганбаатар болон Хэнтий нутгийн төлөөлөл, Д.Догсомын аавын дүү Төртогтохын зээ Б.Батмөнх, Ардын жүжигчин П.Цэрэндагва нар оролцон үг хэлэх юм. Хурлыг нээж  МАН-ын ерөнхий нарийн бичгийн дарга Ж.Мөнхбат, “Стратеги” Академийн захирал, доктор Я.Төмөрбаатар үг хэлнэ. Мөн Д.Догсом агсаны амьдрал, үйл ажиллагаа, түүхэн гавъяаны талаар  ШУТИС-ийн  Нийгмийн технологийн сургуулийн  Түүх соёл судлалын багийн багш, дэд профессор Д.Наранцацрал, ШУА-ийн Түүхийн хүрээлэнгийн Орчин үеийн Монголын түүхийн салбарын эрхлэгч Түүхийн ухааны доктор, дэд профессор  Н.Хишигт, МУИС-ийн Хүмүүнлэгийн сургуулийн Түүхийн тэнхимийн багшТүүхийн ухааны доктор, профессор Д.Дашдулам, Монголын Үндэсний музейн ЭША Ж.Наранчимэг нар илтгэл тавьж санал өрнүүлэх юм байна.

Д.Догсом 1884 оны долдугаар сарын 20-доор Халхын Сэцэн хан аймгийн Эрдэнэдалай вангийн хошууны нутаг Шинэ булаг буюу одоогийн Хэнтий аймгийн Баян-Овоо суманд төржээ. Тэрээр Богд хаант Монгол Улсын үед Сангийн яаманд бичээч, Цэргийн яаманд эх зохиох түшмэлээр ажиллахын сацуу Монгол Улсын тусгаар тогтнолын асуудлаар 1915 онд Хиагт хотноо болсон Монгол, Орос, Хятад гурван этгээдийн бага хуралд монголын төлөөлөгчдийн эх зохиох түшмэлээр, 1915-1916 онд Засгийн газраас томилсон газар дэлхийн баялгийг шинжлэх комисст тус тус ажиллаж байжээ. 1921 оны Ардын хувьсгал, болон зүүн хүрээний нууц бүлгэм байгуулагдахад түүний гүйцэтгэсэн үүрэг их бөгөөд ном зохиолд тэр бүр дурдагдаагүй байдаг байна. Улс төрийн хилс хэргээр хэлмэгдсэн түүнийг 1962 оны нэгдүгээр сарын 25-нд цагаатгажээ.


Хурлын хөтөлбөр

10:00    Нээлт.

10:00    “Стратеги” Академийн захирал, доктор Я.Төмөрбаатар нээж үг хэлнэ.

10:10    МАН-ын Ерөнхий нарийн бичгийн дарга Ж.Мөнхбат үг хэлнэ.

10:20    “1921 оны Монголын хувьсгалд Д.Догсомын гүйцэтгэсэн үүрэг” илтгэл.
ШУА-ийн Түүхийн хүрээлэнгийн Орчин үеийн Монголын түүхийн салбарын эрхлэгч Түүхийн ухааны доктор, дэд профессор  Н.Хишигт

10:40    “ХХ зууны монголчуудын сэтгэлгээний уламжлал ба  Д. Догсом” илтгэл /МУИС-ийн Хүмүүнлэгийн сургуулийн Түүхийн тэнхимийн багш/

        Түүхийн ухааны доктор, профессор Д.Дашдулам,
        Монголын Үндэсний музейн ЭША Ж.Наранчимэг

11:00    Асуулт хариулт

11:20    “Улс төрийн хэлмэгдүүлэлт ба Д.Догсом” илтгэл
Улс төрийн талаар хэлмэгдэгсдийн судалгааны төвийн ЭША Докторант Тайжууд Х.Мөнхбаяр

11:40    “Дансранбилэгийн Догсомд холбогдох уран бүтээлийн өв” илтгэл
ШУТИС-ийн  Нийгмийн технологийн сургуулийн  Түүх соёл судлалын багийн багш

Дэд профессор, Ph.D  Д.Наранцацрал

12:00 Асуулт, хариулт

12:20 Чөлөөт ярилцлага

13:00 Хаалт