Эдийн засгийн хөгжлийн сайд Н.Батбаяр олон хүнийг хөлдөө чирж мэдэхээр боллоо. Түүнийг сайдаас нь огцруулах асуудлыг сөрөг хүчнийхэн хоёр дахь удаагаа тавьчихаад байгаа. Огцруулах уу, авч үлдэх үү гэдгийг өнөөдрийн чуулганаар хэлэлцэж шийдвэрлэнэ. Өнгөрсөн долоо хоногт Н.Батбаяр сайдыг огцруулах асуудлыг тодорхойгүй шалтгаанаар хойшлуулсан  УИХ-ын дарга З.Энхболдын шийдвэрийн цаад учир тодорхой болсон. Тодруулбал АН-ынхан түүнийг авч үлдэх эсэх дээрээ саналаа нэгтгээгүй байсан аж. Өмнө нь нэг удаа олонхоороо Н.Батбаяр сайдыг авч үлдэж байсан.

Тэгвэл энэ удаа Н.Батбаярыг явуулах саналтай гишүүд АН дотор олон байгаа аж. Тухайлбал УИХ-ын гишүүн З.Энхболд, С.Одонтуяа, Г.Баярсайхан, Ж.Батзандан, М.Батчимэг, Д.Зоригт, Х.Баттулга нар Н.Батбаяраас болж намын нэр хүнд унаж байна хэмээн ярьсан байна. Ерөнхийлөгч ч гэсэн түүнтэй хариуцлага тооцохыг эртнээс сануулсаар байгаа. Ер нь Ерөнхийлөгч болон АН-ын нэр бүхий гишүүд сөрөг хүчний шаардлагаар бус санал хураалт явахаас өмнө өөрөө ажлаа өгөхийг Н.Батбаяраас шаардсан байна. Энэ мэт Н.Батбаярыг огцруулах хүсэлтэй олон нийтийн хүрээ тэлсээр.

Олон хүн түүнд хариуцлага тооцох гэж аргаа барж, үйлээ үзэж, үгээ хэлж яваа. Бараг л үсээ зулгаахаас наагуур юм болж байна. Харин Н.Батбаяр хариуцлага хүлээх шинжгүй байгаагаас гадна харин ч бултаж, зугатаж өдийг хүрсэн. Сандал, суудлаасаа салж өгөхгүй нам наалдсан Н.Батбаярт яагаад ч хариуцлага хүлээлгэж чадахгүй байгаа учир түүнийг огцруулах ажиллагааг улам хүчтэй, далайцтай явуулахаар болжээ. Тодруулбал, Хууль хяналтын байгууллагын оролцоотойгоор түүнийг дарж авахаар шийдсэн байна. Үүнийг илтгэх хэд, хэдэн үйл явдал ч өнгөрсөн хоёр өдөрт болж өнгөрөв. Тухайлбал, Хөгжлийн банкны Гүйцэтгэх захирал Н.Мөнхбат, “Гудамж төсөл”-ийн захирал Б.Батболд нарыг АТГ-аас шалгаж эхэллээ.

Н.Мөнхбатын хувьд нэгэн цагт Н.Батбаярын туслахаар ажиллаж байсан нэгэн. Харин Б.Батболд бол Н.Батбаярын эртний найз. Одоо Эдийн засгийн хөгжлийн яамнаас хэрэгжүүлж буй гол, гол төслийг удирдаж яваа хүмүүс. Хөгжлийн банкны Н.Мөнхбатыг “Чингис”, “Самурай” зэрэг бондын хөрөнгийн зарцуулалтыг АТГ-аас анхааралдаа авсан талаар өнгөрсөн тавдугаар сард тус газрынхан мэдэгдэж байсан бөгөөд үүнтэй холбогдуулж шалгаж буй гэнэ. Мөн "Гудамж" төслийн захирал Б.Батболдыг уг бондын хөрөнгөөр санхүүжсэн “Гудамж төсөл”-тэй нь холбон шалгаж байгаа аж.

Мөн   АТГ-ынхан өчигдөр Эдийн засгийн хөгжлийн яаманд шалгалт явуулаад  бичиг баримтуудыг хураан авч өрөөнүүдийг битүүмжилсэн. Тус яамны Төрийн нарийн бичгийн дарга Б.Шинэбаатарын өрөөнөөс өнгөрсөн баасан гаригт тагнах, чагнах, дүрсжүүлэх төхөөрөмж илэрсэн нь ч үүнтэй холбоотой аж. Уг төхөөрөмжийг АТГ-ын Гүйцэтгэх албанаас тавьж, хууль тогтоомжийн хүрээнд тагнаж, чагнасан байх бүр магадлалтай юм. Тэгэхээр АТГ-аас Эдийн засгийн яамыг аль хэдийнээс овоо хараандаа авсан гэсэн үг.

Цаашид Н.Мөнхбат, Б.Батболд, Б.Шинэбаатараар дуусахгүй бондын мөнгөтэй холбогдсон арилжааны банкны захирлууд болон төсвийн мөнгөөр ажил хийсэн олон хүмүүс АТГ-т дуудагдаж магадгүй сурагтай байна. Энэ мэтээр Н.Батбаярыг огцруулах ажиллагаа улс орныг хамарсан үйл явц болох нь.