Монгол Улсын төлөөлөгчдийн тэргүүн Байгаль орчны Ассамблейн чуулганы хуралдаанууд болон товчоог даргалж, төлөөлөгчид Ази, Номхон далайн бүлэг, бүх гишүүдээс бүрдсэн хороо, Ассамблейн Ерөнхийлөгчийн нөхдийн бүлэг, Дотоод журмыг шинэчлэх ажлын хэсэгт ажиллав. Монгол Улсын Ерөнхийлөгч НҮБ-ын Байгаль орчны Ассамблейн анхдугаар чуулганд илгээсэн илгээлтийг чуулганы оролцогчдод уламжилж, нарийн бичгийн дарга нарын газарт гардуулав.
Байгаль орчин, ногоон хөгжлийн сайд С.Оюун НҮБ-ын радио (UN Radio), Хятадын CCTV, Хонконгийн Phoenix TV-д тус тус ярилцлага өгөв. Хэвлэл мэдээллийнхэн Ассамблейг даргалагчийн хувьд тавьж буй зорилт, НҮБ-ын Байгаль орчны Ассамблей бий болсноор НҮБ-ын Байгаль орчны хөтөлбөр илүү үр дүнтэй, хүртээмжтэй ажиллах боломж, Mянганы хөгжлийн зорилт болон 2015 оноос хойшхи хөгжлийн зорилт, байгаль орчинд тулгамдаж буй бэрхшээл, сорилт, ялангуяа зэрлэг ан, амьтан, ургамлын хууль бус худалдааны талаар сонирхож байв.
Сайд С.Оюун, БОНХЯ-ны ГХАХ-ийн дарга Д.Батболд нар хөгжиж буй орнуудын “77+Хятад” бүлгийн дарга, Тайландын Байнгын төлөөлөгч Итипорн Бонпраконг, Латин Америк болон Карибын орнуудын бүлгийн дарга, Колумбийн Элчин сайд Мариа Югения Корриа нартай уулзав.
Мөн тэрээр “Ногоон эдийн засгийн санхүүгийн механизм” сэдэвт симпозиумд оролцож, ногоон эдийн засгийн санхүүжилтийн асуудлыг шийдвэрлэхдээ тухайн улсын санхүүгийн зах зээлийг хөгжүүлэх, ногоон эдийн засгийн тухай ойлголтыг хүмүүст хүргэх, тэдний байгаль орчинд хандах хандлагыг өөрчлөхийн чухлыг онцлов. Энэ нь хөгжиж буй орнуудад тулгарч буй түгээмэл сорилт болох нь хэлэлцүүлгээс харагдаж байлаа.
Сайд С.Оюун “Даян дэлхийн ногоон өсөлтийн хүрээлэн”-ийн гүйцэтгэх захирал Иво де Боер, НҮБ-ын Байгаль орчны Ассамблейн даргаар ажиллаж байсан Суданы Байгаль орчны сайд Хасан Хилал, НҮБ-ын Байгаль орчны хөтөлбөрийн дэргэд суугаа Энэтхэгийн Байнгын төлөөлөгч Ёгешвар Варма болон НҮБ-ын Байгаль орчны хөтөлбөрийн иргэний нийгмийн бүлгийн төлөөлөгчидтэй уулзав. Мөн Перу, Франц, Польшоос хамтран зохион байгуулсан сайд нарын оройн зоогт оролцов. Сайд нар уур амьсгалын өөрчлөлтийн асуудлыг тухайлан хэлэлцлээ.
