Өчигдөр Монгол Улсын Ерөнхийлөгч Ц.Элбэгдорж өөрийн хүсэлтээр УИХ-ын гишүүн Х.Баттулгыг өрөөндөө урьж хэвлэл мэдээллийн өмнө нээлттэй уулзсан. Урьд өмнө төрийн тэргүүн өөрийн хүсэлтээр УИХ-ын гишүүнийг өрөөндөө урьж уулзаж байсан ийм тохиолдол үгүй. Төрийн ордон, яаман дээрээ харагдахаа байсан Х.Баттулга гишүүн ч болзсон цагтаа Ерөнхийлөгчийн өрөөнд бэлэн байлаа.

Ерөнхийлөгч Ц.Элбэгдоржийн Х.Баттулгад өгсөн зөвлөгөө олон нийт, улс төрчдийн анхаарлыг ихэд татаж саарал ордны гол ярианы сэдэв болов. Тэрээр “Улс үндэстний гадаад бодлого нэгдмэл байх ёстой, хөршөө муулдаг сайн хөршийн бодлого гэж байдаггүй юм, нүүрсний төмөр замыг нарийн царигаар тавих ёстой, та улс төрд төлөвшиж байсан сайн жишгийг эвдэж, хамт зүтгэж байгаа нөхдөө харийн гар хөл гэж хэлж байгаа чинь зохимжгүй байна. Өөрөө хийж хэрэгжүүлж чадаагүй ажлаа өрөөлийг хийхэд нь битгий саад бол” гэж тун хатуухан үг дайгаад авсан.

            Ялангуяа 100 сэдэв нэвтрүүлгийг үзсэн учраа мэдэхгүй хүүхэд залуусын толгойд шууд утгаар ойлголт бууж, нэгнийгээ эрлийз хурлийзаар цоллож, талцал хуваагдал ирж байгаад Ерөнхийлөгч ихэд эмзэглэж байгаагаа илэрхийлсэн.

            Ийнхүү Х.Баттулгын захиалгаар хийлгэсэн нэвтрүүлэг төрийн тэргүүний сэтгэлийг ч зовоох боллоо. Өмнө нь АН-ын бүлгийнхэн энэ асуудлаар хуралдаж Х.Баттулгад шахалт үзүүлэх шийдвэрт хүрсэн ба түүний араас удалгүй Монгол Улсын Засгийн газраас мэдэгдэл гаргаж, хөрш орнуудтай харилцах харилцаанд ноцтой сөрөг нөлөөтэй, ард иргэдээ талцуулан хуваасан түүний үйлдлийг буруушааж байгаагаа мэдэгдсэн билээ.

            Х.Баттулгын захиалж хийлгэсэн нэвтрүүлэг, түүний гол утга агуулга болох “өргөн төмөр зам” бодлогыг УИХ, Засгийн газар, Монгол Улсын Ерөнхийлөгчийн аль аль нь дэмжихгүй нь нэгэнт тодорхой болсон. Харин учир явдал нэгэнт тодорхой болчихоод байхад Х.Баттулга гишүүн буулт хийх ямар хүсэл сонирхолгүй байгаагаа илэрхийллээ.

            Тэрээр Ерөнхийлөгч Ц.Элбэгдоржтой уулзаж байхдаа нэг ч үг дугараагүй. Багшдаа загнуулж байгаа хүүхэд шиг л төлөв томоотой үзэгдсэн. Гэтэл Ерөнхийлөгчийн өрөөнөөс гармагцаа “Хөршөө мууллаа гэх юм... түүхээ л ярьсан даа уг нь... түүхээ мартах уу?” гэж жиргэв. Мөн “Үзээгүй нь үзээрэй, үзсэн нь нэг нь шээрлээрэй, үнэлэлт дүгнэлт өгөөрэй” хэмээн жиргэж өөрийн захиалгат нэвтрүүлгээ дахин цацав. Энэ мэт үйлдлээрээ Х.Баттулга Ерөнхийлөгч Ц.Элбэгдоржийн үгийг ч авахгүй гэдгээ илэрхийллээ.

            Уг нь тэд МоАХ-ны гаралтай нэг фракцын улстөрчид. Х.Баттулга “Алтангадас”-ынхантай муудалцаж намдаа нэлээд ганхаад байгаа ийм цагт Ерөнхийлөгчөөс гал татах нь улстөрчийнхөө хувьд тийм ч зөв алхам биш. Гэвч түүний зүтгүүлээд байгаа “өргөн төмөр замын” ард маш том эрх ашиг нуугдаж, Ерөнхийлөгчийн үгийг хүртэл авахгүйд хүргэжээ. Харин Монгол Улсын Ерөнхийлөгч бүх ард түмний эв нэгдлийг илэрхийлэгчийн хувьд байр сууриа илэрхийлж, Засгийн газрын бодлогыг хамгаалж байна. Төмөр замын асуудлаархи тэдний тус тусын байр суурь тэдгээрийг улам холдоход хүргэж болзошгүй боллоо. Түүнээс улбаалж АН-ын улстөрийн өнцөг, хувь заяа ч огт төсөөлөөгүйгээр эргэж болох юм.

            Х.Баттулгыг АН-д хөлөө олж, байр сууриа эзлэхэд хамгийн их тусалсан хүн гарцаагүй Ерөнхийлөгч Ц.Элбэгдорж. Тэд өмнө нь ямарваа бодлогын асуудлаар ингэж зөрчилдөж байсан удаагүй. Ц.Элбэгдорж 2007 онд автомашины осолд ороход эмнэлэг рүү биш Х.Баттулга руу залгасан гэдэг. Х.Баттулга ч гэмтлийн эмч нарыг аваад нисдэг тэрэг хөлслөн яаран очсон гэдэг. Харин өнөөдөр тэд том бодлого, том эрх ашгийн үүднээс зөрчилдөх болжээ. Цаашдаа тэдний харилцаанд ямар өөрчлөлт гарах вэ? гэсэн асуулт улстөрчдийн сонирхолыг маш ихээр татах боллоо.