Ш.Түвдэндорж ҮХАА-н сайдаар томилогдсон учир Хууль зүйн байнгын хорооны даргын суудал эзгүйрээд байгаа. Тиймээс Хууль зүйн байнгын хороог хэнээр удирдуулах вэ гэдэг асуудал ид хүчээ авч байна. АН-ын бүлгээс УИХ-ын гишүүн Д.Ганбатыг нэр дэвшүүлээд байгаа бол танхимаас Ж.Батзандан гишүүн нэрээ дэвшүүлж өрсөлдөхөөр болсон.

АН-ын бүлгийн зүгээс Д.Ганбатыг зүтгүүлсэн хэвээр байна. Тэгвэл МАН болон МАХН-МҮАН-ын "Шударга ёс" эвслийн бүлэг Ж.Батзанданг дэмжинэ гэж буй. Ж.Батзандан гишүүний хувьд шударгаар өрсөлдөх боломжоор хангаж өгөхийг намынхаа удирдлагуудаас хүсч фракцийн зарчмаар албан тушаал хувиарладаг байдлыг таслан зогсоох ёстой гэж хэлж байгаа юм.

Харин АН-ынхан өөрсдийн байр суурийг хамгаалж үлдэхийн тулд УИХ-ын гишүүн Д.Ганбатыг Хууль зүйн байнгын хорооны даргын түр орлон гүйцэтгэгчээр ажиллуулахаар болжээ. Үүнийг нь УИХ-ын дарга З.Энхболд өнөөдөр захирамжилсан байна.