УИХ-ын Эдийн засгийн байнгын хорооны өнөөдрийн хуралдаанаар өнөөдөр Газрын тосны тухай хуульд өөрчлөлт оруулах хуулийн төслийн эцсийн хэлэлцүүлгийг хийх байсан ч хойшлууллаа.

Учир нь уг хуулийг боловсруулж буй ажлын хэсэг нь дахин хуралдах шаардлагатай гэв. Энэ үеэр УИХ-ын гишүүн Ц.Нямдорж нилээн бухимдангуйгээр “УИХ-ын тухай хуульд зааснаар байнгын хороо долоо хоног бүрийн мягмар, лхагва гаригт хуралдаж, чуулганы нэгдсэн хуралдааныг пүрэв, баасан гаригт хуралдуулдаг дэгтэй. Дэгийг зөрчин, дуртай цагтаа байнгын хороо хуралдуулдаг болж байна. Газрын тосны тухай хуулийг ажлын хэсэг ярилцах шаардлагатай байгаа, ажлын хэсгийн зарим шийдээгүй асуудлыг байнгын хороогоор шууд шийднэ гэж юу байдаг юм. Энэ чинь маш чухал хуулийн төсөл, хөнгөн хуумгай хандаж болохгүй. Үүнийхээ оронд Эдийн засгийн хөгжлийн сайд Н.Батбаярыг огцруулах асуудлыг яагаад УИХ-аар хэлэлцэхгүй гацаагаад байгаа юм. Тэр УИХ-ын дарга чинь дэндэж байгаа юм биш үү, өөрийнхөө дураар сайдад хариуцлага тооцох асуудлыг хойшлуулдаг, дараа нь бүлэг нь завсарлага авдаг. Ингэж явсаар сар болох нь. Хуульд зааснаар сайдад хариуцлага тооцох асуудлыг УИХ 14 хоногийн дотор багтаан шийдвэрлэх ёстой. Гэтэл хаврын чуулганыг завсарлуулах нэрээр Н.Батбаярыг авч үлдэх нь л дээ” гэв.

Түүнтэй Эдийн засгийн байнгын хорооны дарга Б.Гарамгайбаатар санал нэгтэй байна гээд "Газрын тосны тухай хуулийн төслийг яаран баталж болохгүй" гэсэн юм.  Ингээд уг хуулийн төслийг хэлэлцэхийг хойшлууллаа.

УИХ-ын гишүүн Ц.Нямдоржийн хувьд Газрын тосны тухай /шинэчилсэн найруулга/ болон холбогдох бусад хуульд өөрчлөлт оруулах хуулийн төслийг боловсруулах ажлын хэсгийг ахалж байгаа аж.