УИХ дахь МАН-ын бүлгийнхэн ууртай байна. МАН-ын дарга М.Энхболд өнөөдөр Төрийн байгуулалтын байнгын хорооны хуралдаан дээр орж ирээд "УИХ дахь МАН-ын бүлгийн 26 гишүүн Эдийн засгийн хөгжлийн сайд Н.Батбаярт хариуцлага тооцох асуудлыг өргөн барьснаас хойш сар болох нь. Хуулиараа эл асуудлыг өргөн барьснаас хойш УИХ 14 хоногийн дотор шийдвэрээ гаргах ёстой. Тийм учраас хаврын чуулганы хугацаанд багтааж хэлэлцүүлээрэй. Гадна талд эдийн засаг, санхүүгийн байдал амаргүй байгаа, олонхиороо хүч түрээд аваад үлдчихнэ гэж бодож байгаа бол таарахгүй шүү. Сүүлийн үед эрх баригч хүчин , Д.Эрдэнэбат дарга өөрсдөд нь таалагддаггүй асуудлыг чуулган дамнуулж, дэгд байдаггүй арга хэрэглэдэг боллоо. УИХ-ын намрын чуулганыг өнгөрсөн өвөл хоёрдугаар сарын 18-ныг хүртэл хуралдуулах ёстой байсан ч арав хоногийн өмнө буюу нэгдүгээр сарын 30-нд завсарлуулсан. "Давхар дээл"-ийг тайлах хуулийн төслийг шийдвэрлэх болоход завсарлага аваад чуулганыг хаасан. Уг нь намрын чуулганы хугацаанд УИХ нийт 36 хууль, тогтоолын төсөл хэлэлцэх ёстой байсан ч ердөө 19-ийг л хэлэлцэн, ажлаа ч дуусгалгүй хүчээр хаасан. Одоо яг тэр аргаа хэрэглэх нь. Нэг аргыг олон удаа хэрэглэх нь улс төрд их муухай харагддаг юм. Үүнийг байнгын хорооны дарга, бүлгийн дарга бодож үзээрэй. Энэ бол УИХ-д суугаа зүгээр нэг 26 гишүүний гарын үсэг биш шүү. Монголын ард түмэн яг энэ шийдвэрийг харж байгаа. Олон бизнес эрхлэгчид бухимдалтай байна. Иргэдийн амьдрал сайнгүй байна. Гэтэл наадмаар тав хоног амарна, чуулганаа хаанаа гэж хүч түрж болохгүй. Энэ 26 гишүүн Монголын ард түмний 40 хувийн санал авсан гишүүд. Олонх та бүхэн өндөр сэнтийд суучихаад хүнтэй уулзах цаг зав гарахгүй хэцүү байгааг ойлгож байгаа ч  бидний үгийг сонсох ёстой" гэсэн юм.

Мөн өнөөдөр үдээс өмнө МАН-ын бүлэг хуралдаж хэд, хэдэн шийдвэрт хүрчээ. Тус бүлэг УИХ-ын хаврын чуулганыг ирэх долоо хоногт завсарлуулахыг эсэргүүцсэн байна. Учир нь эдийн засаг хүндэрч буй энэ үед шаардлагатай хуулийн төслүүдээ батлах ёстой гэж үзжээ. Ялангуяа Эдийн засгийг эрчимжүүлэх 100 хоногийн төлөвлөгөөнд орсон хэлэлцэх шаардлагатай маш олон хууль байгаа. Тиймээс хаврын чуулганыг наадам хүртэл сунгах ёстой гэж тус бүлэг үзэж байгаа юм байна.

Хэрвээ хаврын чуулганыг ирэх долоо хоногт буюу долдугаар сарын 1-ны өдөр завсарлуулбал Эдийн засгийн хөгжлийн сайд Н.Батбаярт хариуцлага тооцох асуудал намрын чуулган хүртэл хэлэлцэгдэхгүй болох юм. Учир нь энэ асуудлыг өчигдөр чуулганаар хэлэлцэх болоход АН-ын бүлэг завсарлага авсан. Завсарлагын хугацаа тав хоног учраас ирэх долоо хоногийн пүрэв гаригт дуусна. Харин хаврын чуулган түүнээс хоёр хоногийн өмнө буюу мягмар гаригт өндөрлөхөөр байгаа. Тиймээс цөөнхийн бүлэг дээрх асуудлыг хаврын чуулганаар багтаан шийдвэрлэх ёстой гэдэг дээр нилээн хатуу байр суурьтай байгаа аж.