Цаг үеийн асуудалтай холбогдуулан Эдийн засгийн хөгжлийн сайд Н.Батбаяраас зарим зүйлийг тодрууллаа.

- Таныг огцруулах асуудал яригдаад сар гаруйн хугацаа өнгөрлөө. Огцруулах үндэслэлийг та хэр бодитой гэж дүгнэж байгаа вэ?

- Өнөөдөр их билэг дэмбэрэлтэй сайхан өдөр байна. Азийн хөгжлийн банктай их том гэрээнд гарын үсэг зурлаа. Гэр хорооллын дахин төлөвлөлтийн ажлын хөрөнгө оруулалтын асуудлаар гэрээ хийгдлээ. Нийтдээ 300 сая долларын гэрээ юм. Сөрөг хүчний зүгээс огцруулах асуудлыг хөндөн тавьсан. Хуулийнхаа дагуу шийдэгдэх биз. Маш олон ажлуудыг хийгээд явж байна. Сайдын хувьд ямар ч нөхцөлд хүлээлэгдсэн ажлуудаа хийгээд явах ёстой. Цаашдаа ч ажил явагдана.

- Сөрөг хүчний тавьж буй үндэслэлийг хүлээж авах уу. Эдийн засаг хүнд байна шүү дээ? Цаашид ямар ажлууд хийгдэх юм?

- Эдийн засагт сайн, саар ч зүйл бий. Эдийн засгийн сайн талуудыг та бүхэн мэдэж байгаа. Их хэмжээний бүтээн байгуулалтууд хийгдэж байгааг та бүгд харж байгаа шүү дээ. Зам, барилга, Улаанбаатар хот, хөдөө орон нутгаа хар.  Валютын ханшийн өсөлттэй холбоотой саар зүйл ч байгаа. Нэг үеэ бодвол бидний хэрэгцээ том болчихож. Харамсалтай нь дэлхийн зах зэл дээр түүхий эдийн үнэ ханш буурснаас болж мөн Оюутолгойн хөрөнгө оруулалтын хэмжээ буурсантай холбогдуулаад валютын тодорхой хэмжээний хомсдол үүссэн. Үүн дээр дөрөөлсөн үнийн өсөлт байгаа. Гэхдээ үүнийг шийдэх ёстой. Шийдэхийн тулд дараа, дараагийнхаа Оюутолгойг бий болгох ёстой юм.  "Талын зам" хөтөлбөрийн хүрээнд таван шугам хоолойг барих гэж байна. Энэ нь тус бүрдээ таван Оюутолгой хөтөлбөрийг хэрэгжүүлж байна гэсэн үг. Тэгэхээр энэ ажлуудыг хийгээд ирвэл хүндрэлтэй асуудлууд өргөс авсан мэт арилах нөхцөл бүрдэх юм. Мэдээж ажил хийж байгаа хүн алдаа гаргасан байхыг үгүйсгэхгүй. Гэхдээ ололт амжилтаа бататгаж, алдаагаа засч урагш харж явах ёстой. Эцсийн дүндээ цөөхөн монголчууд эвтэй байж өнөөгийн нөхцөл, байдалд дүгнэлт хийгээд хөгжлийнхөө төлөө хамтдаа хувь нэмрээ оруулах хэрэгтэй гэж үзэж байна. 

- Долларын ханш буурах уу?

- Долларын ханш буурна. Бууруулахын тулд Талын зам, хийн хоолой гэх мэт ажлуудаа хийх ёстой. Ингэснээр гадны хөрөнгө оруулалт орно. Тэр хэрээр валютын нөөц нэмэгдэх юм.

- Эдийн засгийн хүндрэлээс болж ард иргэдийн амьдрал туйлдаж байна. Та улс төрийн зориг гаргаад ажлаа өгчихгүй юм уу?

- Би өөрийгөө ажлаа хийж чадахгүй байна гэж үзээд огцрох өргөдөл өгөхгүй. Намайг буруу зүйл хийсэн гэж үзээд УИХ огцруулбал бүрэн эрхийнх нь асуудал. Би улс төрд 20 гаруй жил зүтгэж байна. Энэ ч үүднээсээ улс орныхоо хөгжилд хувь нэмрээ оруулна. Оруулж ч ирсэн. Түүнээс хэн нэгний дайрсан үйлдлийг өөгшүүлэхгүй. Эцсийн эцэст үнэн ялна. Хэн ажил хийж байгаа нь хүмүүсийн хэл аманд өртдөг. Та бүхэн мэдэж байгаа. Монголд орон сууцны моргейжийн зээл бий болоосой гэж ард түмэн олон жил хүлээсэн. Бид орон сууцны зээлийг хөтөлбөрийг гаргаж чадсан уу чадсан ш дээ. Олон замыг ашиглалтад орууллаа. ТЭЦ 3 ашиглалтад орлоо. Богино хугацаанд бид тэдгээрийг ашиглалтад орууллаа. Учир нь бидэнд мөнгө нь байсан учраас богино хугацаанд амжуулсан юм. Хөтөлийн цементийн үйлдвэр ашиглалтад орсон. Түүнд ч мөн Чингис бондын мөнгө орсон байгаа. Энэ жил ТЭЦ 4 болон Амгалан дулааны станцыг ашиглалтад оруулах гэж байна. Бодитой ажлууд хийгдэж байна. Бид алдаагаа засаад цааш явах хэрэгтэй. Тийм ч учраас бид үр ашигтай, гадаадын хөрөнгө оруулалтыг татсан гэрээнүүдийг хийж эхлээд байна.

- Чингис бондын зарцуулалттай холбоотойгоор Хөгжлийн банкны болон Гудамж төслийн захиралд хэрэг үүсгэжээ. Таныг ч мөн АТГ-ас шалгаж эхэлсэн гэх мэдээлэл байна. Энэ үнэн үү?

- Надад хэрэг үүсгээгүй. Учир нь би хууль зөрчиж, хулгай хийгээгүй. Тийм учраас тайван байж болно. 

- Та толгойд төрсөн бодлоо цаасан дээр буугаагүй байхад ингэж ярьдагаа хэзээ болих вэ?

- Аливаа зүйл хамгийн эхэнд хүний оюун санаанд орж ирдэг юм. Дараа нь албан бичиг баримтад тусдаг. Эцэст нь ажил болж бүтдэг юм. Энэ бол хорвоогийн жам.