УИХ-ын Эдийн засгийн байнгын хороо өнөөдөр /2014.06.30/ хуралдан Газрын тосны тухай /шинэчилсэн найруулга/ болон холбогдох бусад хуулийн төслүүдийн эцсийн хэлэлцүүлгийг хийлээ.

Хуулийн төслийг эцсийн хэлэлцүүлэгт бэлтгэх ажлын хэсгээс зарчмын зөрүүтэй 15, найруулгын шинжтэй 19 саналыг хуралдаанд танилцуулсан бөгөөд эдгээр саналаар санал хураалт явуулах тухай горимын саналыг хуралдаанд оролцсон гишүүдийн гуравны хоёроос илүү нь дэмжсэн учир санал тус бүрийг уншиж танилцуулан санал хураалт явуулан чуулганы нэгдсэн хуралдаанд танилцуулахаар тогтлоо хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.