Хүн амын хөгжил, нийгмийн хамгааллын сайд С.Эрдэнэ “Оюутолгой”-н гэрээг луйврын гэрээ болсон гэж хэлэв. Мөн тэрбээр Монголын гол боломжоор тоглосон хариуцлагагүй гэрээг үзэглэсэн нөхдүүдийг буруутгажээ.

Тиймээ. Толгойтой хүн бүр Оюутолгойн гэрээг ашиггүй гэрээ гэж ярьдаг. Нэн ялангуяа туршлагатай улс төрчид болоод эдийн засагчид тус гэрээг одоо ч шүүмжилсээр байгаа юм. Гэхдээ С.Эрдэнэ сайд Оюутолгойн асуудлаар цагаа олж дуугарсангүй. Тэр ингэж ярьсанаараа өөрийн ажиллаж буй Засгийн газраа нэгдсэн бодлогогүй гэдгийг дахин баталлаа. Шинэчлэлийн Засгийн газар Эдийн засгийг эрчимжүүлэхийн тулд тал бүрийн ажлыг эхлүүлж буй. Тэр дундаа уул уурхайн салбарт гадны хөрөнгө оруулалтыг татах, томоохон ордуудаа эдийн засгийн эргэлтэд оруулах нь нэн чухал тулгамдсан асуудал болоод байгаа юм.

Тиймээс ч Ерөнхий сайд Рио Тинтогийн захиралд захидал илгээж далд уурхайн бүтээн байгуулалтыг аль болох түргэн хугацаанд үргэлжлүүлэхийг хүсч буйгаа илэрхийлсэн. Ерөнхий сайд Н.Алтанхуяг яагаад “Рио Тинто” руу захидал бичих болсон шалтгааныг ойлгоход түвэгтэй биш. Өнгөрсөн оны 7 дугаар сард “Эрдэнэс Оюутолгой” компанийн Гүйцэтгэх захирал асан Ц.Сэдванчиг  далд уурхайн санхүүжилтийг зөвшөөрөх боломжгүй хэмээн “Рио Тинто”-д захидал бичээд буруудсан удаатай. Тиймээс Ерөнхий сайд өөрийн биеэр захидал илгээж далд уурхайн санхүүжилт хойшилсон нь Засгийн газраас хамаараагүй, далд уурхайн санхүүжилтийг дэмжиж байсан шүү гэдэг мессежийг урьтаж өгсөн юм.

Ерөнхий сайд гадны хөрөнгө оруулалтыг татахын тулд үйлээ үзэж, үсээ зулгааж, Рио тинтогийн захирал руу захидал хүртэл илгээгээд удаагүй байтал Уул уурхайн сайд нь Оюутолгойн далд уурхайн санхүүжилтийг дэмжихгүй, ярилцана гэх мэтийн зүйлийг ярьсан. Гэтэл одоо Хүн амын хөгжил, нийгмийн хамгааллын сайд нь Оюутолгойн гэрээг луйврынх хэмээн хэвлэлээр ярьж явна.  Оюутолгойд хөрөнгө оруулалт татах нэгдсэн бодлого  энэ Засгийн газарт байна уу. Уг нь Засгийн газар нэгдмэл бодлоготой байж ажил нь урагшилна. Гэтэл сайд нар нь дур зоргоороо улс төрийн эрх ашигтай холбоотой мэдэгдэл хийгээд явах юм. Тэдний ярьж хэлж буй зүйлүүд манайд хөрөнгө оруулах гэж буй газруудад хэрхэн тусах вэ гэдгийг бодолцох хэрэгтэй баймаарсан.

Төрөөс төмөр замын тээврийн талаар баримтлах бодлогын хувьд ч ялгаагүй. Зам тээврийн яамны сайд нь  Засгийн газраас өргөн барьж буй төмөр замын бодлогоо дэмжихгүй хэмээн гүрийж, Ерөнхий сайд нь гуйгаад сууж байх жишээтэй.

А.Гансүхийн хувьд төмөр замын царигийг өргөн тавих ёстой гэсэн байр суурьтай байгаа бол Засгийн газраас нарийн цариг тавина хэмээн талцаад сууж байна. Мөн хэдхэн сарын өмнө Засгийн газрын сайд байсан хүн захиалгат нэвтрүүлэг хийн телевизээр цацаж, монголчуудыг хоёр хуваагаад байж байх жишээтэй.

Ер нь энэ Засгийн газарт нэгдмэл бодлого байна уу?