Чуулганы хуралдаанаар “УИХ-ын 2014 оны намрын ээлжит чуулганаар хэлэлцэх асуудлын тухай” УИХ-ын тогтоолын төслийг хэлэлцээд баталлаа. Энэ үеэр УИХ-ын нэр бүхий гишүүд УИХ-ын дарга З.Энхболдод хандан гомдол гаргав.

Тухайлбал түүнийг УИХ-ын гишүүдэд ялгавартай хандаж санаачилсан хуулийн төслийг нь хүлээж авахгүй байгаад тайлбар хүссэн юм.

УИХ-ын гишүүн Л.Эрдэнэчимэг “Миний санаачилсан Архины хяналтын тухай хуулийн төслийг хүлээж авахаас удаа дараа татгалзсан. Санаачилсан хуулийн төслийг маань хэзээ хүлээж авах вэ” гэсэн бол Д.Батцогт гишүүн “Миний санаачилсан 10 гаруй хуулийн төслийг удаа дараа янз бүрийн шалтгаанаар хүлээж авааагүй. УИХ-ын дарга бол УИХ-ын гишүүдийн ажлаа хийх нөхцлийг бүрдүүлж өгөх ёстой хүн. УИХ-ын Нийгмийн бодлого, боловсрол, соёл, шинжлэх ухааны байнгын хорооноос нийт арван төслийг намрын чуулганаар хэлэлцүүлэхээр санал өгсөн ч ердөө хоёрыг оруулж... Хаврын чуулганы хугацаанд багтаагаад Эмийн талаар төрөөс баримтлах бодлогыг батлах боломжтой байсан, эцсийн хэлэлцүүлгийг хийхээр байнгын хороо санал дүгнэлтээ боловсруулчихсан байтал УИХ дахь гурван намын бүлгийн даргын тааллаар хэлэлцэх асуудлын дарааллаас хассан байх юм. УИХ, Байнгын хороогоор хэлэлцэх асуудлыг гурван намын бүлгийн дарга шийддэг юм бол УИХ-ын 76 гишүүн байхын хэрэг байна уу. Төрөөс эмийн талаар баримтлах бодлогын эцсийн хэлэлцүүлгийг хийхэд 5 хан минут л хангалттай. Үүнд Байнгын хорооны даргаас хариулт хүсч байна” гэсэн юм.

УИХ-ын гишүүн З.Баянсэлэнгэ ч мөн “Шударга ёс” эвслийн бүлгийн гишүүдийн өргөн барьсан “Өршөөлийн тухай” хуулийг одоо болтол хэлэлцэхгүй байгааг буруутгаж УИХ-ын даргад гомдол мэдүүлллээ. Тэгвэл УИХ-ын гишүүн Л.Энх-Амгалан “Эрүүл мэндийн даатгалын тухай хуулийн төслийг УИХ-аас баталчихвал иргэдэд их хэрэгтэй байгаа. Энэ хуулийг баталж байж эрүүл мэндийн салбарт шинэчлэл хийгдэнэ. Гэтэл яагаад энэ хуулийн төслийг намрын чуулганаар хэлэлцэх асуудлын дараалалд багтаасангүй  вэ, хуулийн төслийн хэлэлцэх эсэхийг дэмжсэн байхад. Мөн малчдыг Нийгмийн даатгалд хамруулах, НДШ-ийг нь нөхөн төлүүлэх хуулийн төслийг нэр бүхий гишүүдийн хамтаар санаачлан УИХ-д өргөн мэдүүлээд жил гаруйн хугацаа өнгөрлөө. Энэ бас чухал хуулийн төсөл, намрын чуулганы хэлэлцэх асуудлын дараалалд яагаад багтаасангүй вэ” гэдэгт хариулт хүслээ.

Энэ мэт санаачилсан хуулийн төслийг нь дэмжихгүй байгаад УИХ-ын гишүүд ихээхэн гомдолтой байгаагаа хэлсэн юм.. Харин Төрийн байгуулалтын байнгын хорооны даргын зүгээс энэ хавар хэлэлцэж чадаагүй хуулийн төслүүдийг ирэх намрын чуулганаар хэлэлцэнэ гэсэн хариултыг өглөө.