Эдийн засгийн хямрал төрийн хямрал болон хувирч байна. Төрийн албаны завхарал бүх түвшинд яригдах нь. Хамгийн сүүлд л гэхэд ГХЯ-ны дуулиан хэвлэлээр гарч эхлэв. БХЯ-ын сайд байхдаа асуудал тарьж өнөө хир нь дуусаагүй балгийг тарьсан Л.Болд ГХЯ-ыг бас л самарч байгаа сураг гарлаа.

    Мэргэжлийн дипломат байгууллага одоо Л.Болд гэдэг хүний үзэмжээр шийдэгддэг болсон бололтой. Хамгийн сүүлд л гэхэд ГХЯ-ны төрийн нарийн бичгийн дарга Г.Цогтсайхан ажлаас чөлөөлөгдөх өргөдлөө өгчээ. Түүнийг эрүүл мэндийн шалтгаанаар ийм шийдвэр гаргасан гэсэн яриа бий бол өөр эх сурвалжууд АН-ын бүлэглэлүүдийн зөрчил гэж тайлбарлаж байна. Аль нь ч байсан ГХЯ-ны Төрийн нарийн бичгийн дарга энэ сардаа багтаад ажлаа өгөөд мөрөө хөөх бололтой. Түүний дараагийн хүн хэн бэ гэдэг асуудал урган гарч ирэх нь ойлгомжтой. Энэ асуудлаас болоод ГХЯ-ныхан ихээхэн маргааныг дотооддоо өрнүүлжээ. Эцэстээ ТНБ-ийн дарга болох хамгийн өндөр магадлалтай байсан ТЗУГ-ын дарга С.Сүхболдыгоо ажлаас нь чөлөөлж, хэвлэлээр баахан муулах ажиллагааг явуулав.  Түүний оронд С.Баярын үед ХХЗХ-ны даргаар томилогдож байсан Б.Болдбаатарыг томилсон юм. Б.Болдбаатар нь "Непко" ХХК-д нэгэн том алба хааж байсан бөгөөд Баабарын баруун гар гэгддэг. Тэгэхээр ГХЯ-ны ТЗУГ-ын даргыг Баабар өөрийн хүнээр томилсон гэж хэлэх хардагсад байна.

    Харин ГХЯ-ны ТНБ-ийн даргаар хэнийг болгох вэ гэсэн дараагийн асуудал дээр АН-ынхан "зодолдож" байна. Уг асуудлыг АН-ын бүлгийн хаалттай хуралдаанаар ч ярьж хүрээг нь өргөтгөжээ. ГХЯ-нд өөрийгөө нөлөөтэй гэж ярих дуртай УИХ-ын гишүүн Б.Болор нэгэн эрхэмийг зүтгүүлжээ. Мэдээж Л.Болд зөвшөөрөөгүй байна. Ер нь Л.Болдыг ажлаа явуулахад Б.Болорын гэгдэх хүмүүс олон удаа тээг тавьж хүнд байдалд оруулдаг байжээ. Тиймээс Л.Болд нэг нэгээр нь чөлөөлсөөр өнөөг хүрсэн гэж эх сурвалж мэдээлэв. Харин одоо өөрийн хүнээ ТНБ-ийн дарга болгоно гэдэгээ ил тод тунхаглаж яваа сураг гарав. Эх сурвалжийн мэдээлж байгаагаар бол нэгэн нэртэй хуульчийн хүүг ТНБ-ийн дарга болгоно гэж хэлсэн гэнэ. Тэр эрхэмийн нэр нууц байгаа аж.

    Мөн Л.Болд ГХЯ-ны сайд болсноор салбарын олон дүрэм журам зөрчигдөж эхэлсэн гэж эх сурвалж мэдээллээ. Тийм ч учраас мэргэжлийн олон дипломатч нэгдэж тун удахгүй Л.Болдын эсрэг хэвлэлийн хурал хийж, зарим мэдээллийг ил болгохоор зохион байгуулалтад орж эхэлсэн сураг гарлаа. Тэд ГХЯ-ыг улс төржүүлж болохгүй гэж үзэж байгаа бололтой. Бас Л.Болдыг сайд болсноос хойш хэн хаашаа томилогдсон, юу хийгдсэн гэх мэтийн талаар тодорхой мэдээллийг өгөх гэнэ.

    Ийнхүү Монголын толгой яамдын нэг ГХЯ-ныхан нилээд асуудалтай байна. Тэдний дотоод асуудал задарч удахгүй олон түмний хүрээг хамрах бололтой болоод явчихлаа.