УИХ-ын Хууль зүйн байнгын хороо өчигдөр хуралдаж, Байнгын хорооны даргад нэр дэвшигчийн тухай асуудал хэлэлцэв. Тус байнгын хорооны даргад нэр дэвшигч УИХ-ын гишүүн Д.Ганбатыг байнгын хорооны хуралдаанд оролцсон гишүүдийн олонх нь дэмжиж, энэ тухай санал, дүгнэлтээ чуулганы нэгдсэн хуралдаанд орууллаа. Харин чуулганы хуралдаанаар УИХ-ын Хууль зүйн байнгын хорооны даргад нэр дэвшигчийн тухай асуудлыг хэлэлцэж, тус байнгын хорооны даргаар УИХ-ын гишүүн Д.Ганбатыг томилох тухай Хууль зүйн байнгын хорооны дүгнэлтийг гишүүдийн олонхи дэмжсэн юм. Ингэснээр Д.Ганбат Хууль зүйн Байнгын хороог удирдахаар боллоо.

 Мөн Аюулгүй байдал, гадаад бодлогын байнгын хорооны хуралдаанаар Тусгай хяналтын дэд хорооны бүрэлдэхүүнд өөрчлөлт оруулах тухай УИХ-ын тогтоолын төслийг хэлэлцэв.

  УИХ дахь МАХН-МҮАН-ын “Шударга ёс” эвслийн бүлгээс Тусгай хяналтын дэд хорооны бүрэлдэхүүнд УИХ-ын гишүүн Ц.Цолмонг нэр дэвшүүлснийг байнгын хорооны гишүүд дэмжлээ.