Х.Баттулгын захиалсан "Зуун чухал сэдэв" нэвтрүүлгийг бэлтгэн хүргэсэн “Херо энтертаймент”-ын уран бүтээлчдэд эрүүгийн хэрэг үүсгэсэн талаар Тагнуулын Ерөнхий газраас өчигдөр мэдээлсэн. Хэрвээ буруутай нь тогтоогдвол 5-10 жилийн хорих ялаар шийтгэхээр байгаа юм.Тэгвэл энэ талаар Ерөнхийлөгч Ц.Элбэгдорж өөрийн байр суурийг илэрхийллээ.
Тэрбээр “Үндэсний эв нэгдэлд харш байж болох зүйл гарвал тухайн үед нь Ерөнхийлөгч анхааруулж хэлэх үүрэгтэй. Манай аюулаас хамгаалах байгууллагууд ч анхааруулах үүрэгтэй юм. Гэхдээ хүмүүсийг айлгаж эрүүгийн хэрэг үүсгэнэ гэж болохгүй. Энэ бол хуулиар хориотой. Иргэд үзэл бодлоо илэрхийлж болно. Тэр эрх нь үндсэн хуулиар заагдчихсан. Уран бүтээлч ч үзэл бодлоо чөлөөтэй илэрхийлэх эрхтэй. Хамгийн гол нь хариуцлагатай, нэвтрүүлэг бичсэн хүмүүсийнх нь нэр нь тодорхой байх ёстой. Үүнээс өөр зүйл шаардаагүй. Тус нэвтрүүлэгт тодорхой улс төрийн албан тушаалтан оролцсон бол Ерөнхийлөгч хүлээн авч уулзаж хэлж байгаа зүйл шүү дээ. Үүнээс болж иргэдэд эрүүгийн хэрэг үүсгэж болохгүй. Би 25 жил улс төрийн үйл ажиллагаанд оролцож явахдаа нэг ч иргэний эсрэг хууль хяналтын байгууллагад хандаж үзээгүй. Намайг яаж ч гүтгэж, доромжилж байсан би тэдний эсрэг ханддаггүй. Сэтгүүлчид, уран бүтээлчдийг ч мөн адил. Би ийм зүйлийг хатуу баримталдаг. Хууль хяналтын байгууллагууд ч энэ зарчмыг баримтлах ёстой. Аюулаас хамгаалах байгууллагууд зүгээр л анхааруулах ёстой. Үндэсний эв нэгдэлд харшлахаар зүйл байвал анхааруулаад л өнгөрнө үү гэхээс биш эрүүгийн хэрэг үүсгэнэ, шоронд хийнэ, ачиж явна гэдэг зүйл хэлж болохгүй. Хэрвээ ийм зүйл хийж байвал анхааруулж байна гэж ойлгоорой”
Т.Энхэлээ
Сэтгэгдэл (18)