Наадам, хөлбөмбөг гээд улс төр нам гүмхэн болов. Харин АН-ынхан нам гүм болж чадахгүй байна. Харин ч бужигнаж эхлэв. Улс орны эдийн засгийн нөхцөл байдал өдөр бүрээр дордох болов. Үүнийг дагаад АН-ынхан төр барьж чаддаггүй гэдэг имиж баталгаажиж байна. Олон түмэн ч АН-ыг МАН-аас илүү ажиллана гэж итгэлээ өгсөн. Харин одоо МАН-аа л сонгодог байж хэмээн харамсах иргэдийн тоо нэмэгдэх боллоо. Энэ бүхнээс үүдэн ард түмний итгэлийг хэн нь алдсан, төрийг хэн нь дампууруулж байгаа, төсөл тендерийг хэн замруулж байгаа гэх мэт олон асуултанд эзэн олохын тулд ардчилагчид шаргуу ажиллаж байна. Тийм ч учраас АН-ын дотоод дахь бүлэглэл, фракцийн зөрчил гүнзгийрэн өтгөрлөө.

    Хэрэв энэ байдал удаж улс орны эдийн засаг хүндэрч, ард түмний итгэл алдарсан хэвээр байвал ирэх 2016 онд АН ялна гэж санасны гарз болно гэж өөр хоорондоо ярилцах болжээ. Ингээд “АН-аа аврах”, буруутнуудтай хариуцлага тооцох шинэ аянг наадам, зугаалга гэж назгайралгүй эхлүүлэхээр болжээ. Тэдний энэ үйлдлээс харвал өөрсдийн үйл ажиллагаандаа гэмшиж эртнээс засах гэж оролдож байгаа бололтой.

    Ийм зорилгоор хийгдсэн Ерөнхийлөгчийн өргөө дэхь АН-ын МоАХ, “Шонхор” фракцийн нууц уулзалт гэрэл цохиулав. Эх сурвалжийн мэдээлж байгаагаар бол Ерөнхийлөгч Ц.Элбэгдорж АН-ын рейтинг унаж, төрийн завхарал гүнзгийрэх болсонд ихээхэн санаа зовж зарим бодлогын ажиллагаануудад оролцож, зааж зөвлөх болсон гэнэ. Тийм ч учраас МоАХ, “Шонхор” хоёрыг нэгтгэх гэсэн бодлого санал болгов, МоАХ-аас Ш.Түвдэндорж, Д.Ганбат тэргүүтэй олон гишүүд гарч З.Энхболд, Н.Алтанхуяг хоёрыг бараадах болжээ гэсэн мэдээлэлүүд цуварсан нь том задралын эсвэл их нэгдэлийн эхлэл байсан бололтой.

    Эх сурвалжийн мэдээлж байгаагаар бол Их тэнгэрт болсон нууц уулзалтаар МоАХ-г “Шонхор”-т нэгтгэх бодлогыг үндсэнд нь шийджээ. Ингэх зорилгоор “Шинэ МоАХ”-ийг байгуулахыг дэмжжээ. Угаасаа ийм байгууллага гараад ирсэн л дээ. Мөн Х.Баттулгыг МАН-ын удирдлагатай уулзаад байна гэж харджээ. Тиймээс түүнээс яаж эвтэйхэн салахыг ярилцсан байна. Х.Баттулга гэж “Эрэл”-ийн намаас орж ирсэн нөхөрт ардчилалаа самруулж, МоАХ-гаа алдсан байснаа ойлгож авцгаажээ. Тэр ч бүү хэл Х.Баттулгын эсрэг С.Эрдэнэ сайдыг хөдөлгөх тактикийг боловсруулснаа ярилцсан байна. Хэрэв энэ үнэн бол Х.Баттулга, С.Эрдэнэ гэсэн хоёр зоригтой эр намраас тулалдах шинэ үзэгдэл тавигдана. Х.Баттулгыг ард түмэн, МАН-ынхан дэмжинэ. С.Эрдэнэ сайдыг АН-ын удирдлага, төрийн бүх аппарат дэмжинэ. Ялалт хэнийхээр нь өндөрлөхийг хэлэхэд эрт юм.
  
     Энэхүү уулзалтаар яригдсан өөр нэг нууц асуудал нь УИХ-ын дарга З.Энхболдын рейтинг ард түмний дунд өндөр байна. Асуудалд шударга, зөв байр сууринаас ханддаг учир сөрөг хүчин болох МАН-ынхан ч дэмждэг болсон гэсэн дүгнэлт хийжээ. Тэгээд МоАХ, “Шонхор”, “Зүүн хойд Ази”, “Ардчилсан хүчний холбоо” зэрэг фракцийг нэгтгэн удирдаж “Алтангадас”-тай тулалдаж чадах цорын ганц хүн нь З.Энхболд гэсэн гаргалгаанд хүрсэн байна. “Нэг ардчилал” клубын гишүүдээс ч урвуулах тактик ярилцсан гэсэн мэдээлэл түгж эхлэв.

    Бас хаврын чуулган АН-ын хувьд хүнд чуулган болсон. МАН-ынхан санасандаа хүрч сайн ажилласан. Шинэчлэлийн Засгийн газрын бүх бодлого унасан. Цаашид энэ чигээрээ яваад байж болохгүй. МАН-ынхан улам чангарч, нягтарч, нэгдэж байгаад дүгнэлт хийх ёстой ч гэж ярилцахаа мартаагүй аж.

    АН-ын нууц уулзалтаар иймэрхүү асуудалууд яригдсан гэж эх сурвалж тайлбарлав. Тэд дараагийн уулзалтаа наадмын дараа салхинд гарангаа хийх тов тогтсон гэнэ.