МАН-ын бүлэг хаврын чуулганы үр дүнгийн талаар мэдээлэл хийлээ. Мэдээллийг бүлгийн дарга С.Бямбацогт, УИХ-ын гишүүн Д.Дэмбэрэл, Ж.Батсуурь нар өгөв. УИХ дахь МАН-ын бүлгийн дарга С.Бямбацогт "МАН-ын бүлэг УИХ-ын хаврын чуулганд нэг багын зарчимаар ажилласан. Бүлгийн гишүүд маань бүхий л хуулийн төслүүд дээр санал бодлоо илэрхийлж идэвхитэй ажилласан. Эрх баригчид 1996-2000 оны алдаанаасаа сургамж авсан байх. Хамтарсан Засгийн газарт ажиллаж байсан түүхээсээ туршлагажсан байх. Манай намын туршлагаас суралцсан байх гэж бид их бодсон. Харамсалтай нь тэгсэнгүй. Алдаагаа давтсаар байна. Тиймээс улс эх орныхоо эрх ашгийн үүднээс эрх баригчдад туслахгүй бол болохгүй нь. Улс эх орныхоо нийтлэг эрх ашгийн төлөө зөвлөж, тусалж ажиллана. Хөрөнгө оруулагчдын итгэлийг сэргээхийн төлөө МАН хичээнэ. МАН санаачилгатай ажиллана. Манай намд хандах иргэд, байгууллагын тоо огцом нэмэгдэж" байна хэмээн хурлын эхэнд байр сууриа илэрхийлэв.
МАН-ын бүлэг хаврын чуулганы хугацаанд ямар ажлыг амжуулав
МАН-ын бүлэг хаврын чуулганы хугацаанд нийт 18 удаа хуралдаж, 19 ажлын хэсгийг байгуулан ажиллажээ. Мөн 71 албан бичгийг холбогдох албан тушаалтнуудад илгээж 19 газраас хариу авсан байна. Есөн асуулга тавьснаас гуравт нь хариу авсан байна. Энэ нь эрх баригчид сөрөг хүчинтэйгээ хэрхэн харьцаж буй талаарх үзүүлэлт гэж МАН-ын бүлгийн дарга С.Бямбацогт хэллээ. Мөн Газрын тухай хууль, Эдийн засгийн ил тод байдлын тухай хууль, Өрийн удирдлагын тухай хууль гэх мэт алдаатай, ард түмний эрх ашигт халдсан хуулиудыг буцаан татуулж чадсан гэв.
Хаврын чуулганы хугацаанд өргөн барьсан хуулийн төслүүд
1. Нийгмийн даатгалын сангаас олгох тэтгэвэр, тэтгэмжийн тухай хуульд нэмэлт өөрчлөлт оруулах 2. Нийгмийн даатгалын тухай хуульд нэмэлт, өөрчлөлт оруулах тухай
3. Малчны тэтгэврийн даатгалын шимтгэлийг нөхөн төлүүлэх тухай
4. Худалдааны тухай
5. Монголын УИХ-ын чуулганы хуралдааны дэгийн тухай хуульд нэмэлт өөрчлөлт оруулах
6. Нэмэгдсэн өртөгийн албан татварын тухай хуульд нэмэлт өөрчлөлт оруулах гэх мэт хуулийн төслүүдийг өргөн барьжээ. Харин эрх баригчдын зүгээс МАН-ын бүлгийн гишүүдийн санаачилсан хуулийн төслүүдийг хүлээж авдаггүй, авсан ч хэлэлцэхгүй буцааж байсан гэдгийнг тус бүлгийн гишүүд энэ үеэр хэлсэн юм.
Намрын чуулганаар өргөн барихаар бэлтгэж байгаа хуулиуд
1. Ач санах тухай хууль
2. УИХ-ын 2012 оны 52 дугаар тогтоолд өөрчлөлт оруулах тухай
3. Хөдөлмөрийн хөлсний доод хэмжээний тухай хуульд нэмэлт өөрчлөлт оруула тухай
4. Нийгмийн халамжийн тухай хуульд нэмэлт өөрчлөлт оруулах тухай
5. Хүүхэдтэй гэр бүл, өнчин хүүхэд, залуусын дэмжих тухай
6. Газар тариалангийн даатгалын тухай
7. Багшийн мэргэжлийн үнэлэмжийг дээшлүүлэх тухай
8. Бүсийн нэмэгдлийн тухай хуулийн төслүүдийг өргөн барьж хэлэлцэн шийдвэрлүүлнэ.
9. Ажилгүйдлийг бууруулах талаар төрөөс баримтлах бодлого
10. Залуучуудын талаар төрөөс баримтлах бодлого
11. Оюутны хөдөлмөр эрхлэлтийг дэмжих тухай тогтоолын төсөл
12. ЕБС-ийн техник хэрэгслийг шинэчлэх тухай тогтоолын төслүүд зэрэг бодлогын баримт бичгүүдийг өргөн барихаар бэлтгэж байгаа аж.
МАН-ын бүлгийн гишүүд энэ зун амрахгүй ажиллана
МАН-ын бүлгийн гишүүд энэ зун амрахгүй ажиллана гэж тус бүлгийн дарга хэллээ. Учир нь Засгийн газрын ажилд хяналт тавьж ажиллахаар болсон байна. Тодруулбал улс орны хөгжил, эдийн засгийн нөхцөл байдалтай холбогдуулан ажлын хэсэг гаргаж тодорхой санаачлагуудыг Засгийн газарт санал болгох юм байна. Мөн тус бүлгийн гишүүд тойрогтоо ажиллаж ард иргэдийн амьдралтай танилцахаар төлөвлөж байгаа аж. Засгийн газрыг 100 хоногийн дотор Эдийн засгийг эрчимжүүлж чадахгүй бол МАН-ын бүлэг хариуцлага тооцох асуудлыг ярина гэв.
Хаврын чуулганд МАН-ын бүлгийн өгсөн дүгнэлт
МАН-ын бүлгээс хаврын чуулганыг сайн ажилласан гэж дүгнэхгүй байгаа аж. Харин зорьж байсан хуулиудаа баталсан хэмээн үзэж байна. Тухайлбал УИХ-ын хаврын чуулганаар 24 хууль батлах зорилт дэвшүүлснээс 10 бие даасан хуулийг баталжээ. Мөн Засгийн газраас өргөн барьсан батлуулах ёстой нэн тулгамдсан хуулиудыг бүрэн баталж чадаагүй гэлээ. Мөн хариуцлагагүй ажилласан сайд нартай хариуцлага тооцох асуудлаар УИХ хугацаа их алдсан гэж МАН-ын бүлэг үзэж байгаа аж. Учир нь сайдыг огцруулах асуудлыг хуулийн дагуу долоо хоногийн дотор байнгын хороо, УИХ-ын чуулганаар хэлэлцэх ёстой. Гэтэл Эдийн засгийн хөгжлийн сайд Н.Батбаярыг үүрэгт ажлаас нь чөлөөлөх асуудлыг 33 хоног, Хууль зүйн сайд Х.Тэмүүжинг огцруулах асуудлыг 38 хоног зэргээр сунжруулсан байна. Мөн давхар дээлийг тайлах хуулийн төслйийг 5 сар хэлэлцсэн гэв. Хаврын чуулганы хугацаанд эдийн засаг хүндэрсэн гэж МАН-ын бүлэг үзэж байна. Мөн дарга нарын тансаг хэрэглээ хэрээс хэтэрсэн гэж тус бүлэг дүгнэж байгаа аж.
Т.Энхэлээ
Сэтгэгдэл (5)