УИХ дахь МАН-ын бүлэг өчигдөр хаврын чуулганы хугацаанд хийсэн ажлаа тайлагнав. Тайлангийн мэдээллийг МАН-ы бүлгийн дарга С.Бямбацогт, УИХ-ын гишүүн Д.Дэмбэрэл, Ж.Батсуурь нар хийсэн. С.Бямбацогтын мэдээллээр бол МАН-ын бүлгийн гишүүд атгасан гар шиг нэгдмэл байж чуулганы нийт хуралдаанд хамгийн өндөр ирц, идэвхитэй байжээ. МАН-ын бүлэгийн дарга С.Бямбацогт "1996-2000 онд өнөөдрийн эрх баригчид дангаараа засгийн эрхийг барьж байсан. Тэр үед эдийн засаг хэрхэн унаж, ард иргэдийн амьдрал яаж доройтож байсныг олон түмэн мэдэж байгаа.  Тиймээс АН дээрх алдаанаасаа сургамж авч  2012 онд Засгийн эрхийг олигтойхон аваад явчих байх гэж харж байлаа. Гэтэл үгүй юм байна.  2008-2012 онд Ерөнхий сайд Н.Алтанхуяг тухайн үед Тэргүүн шадар сайдаар ажиллаж байсан.  Тэр үед төр барих, түмнээ сайхан амьдруулах, эдийн засгийг дээшлүүлэх асуудлын талаар их судалсан байх гэж харж байсан.  Харамсалтай нь тэд эрх баригч шиг ажиллаж чадсангүй.  Улс орон, эдийн засгийг улам доройтуулах юм байна гэдгийг мэдэрлээ.  Бид сануулж, хэлж, шүүмжилж байсан боловч тоогоогүй. Тиймээс эрх барьж чадахгүй байгаа улстөрийн хүчинд туслах талд анхаарахгүй бол болохгүй нь.  МАН хариуцлагатай, тулхтай туршлагатай улстөрийн хүчний хувьд үлдэж байгаа хугацаанд эрх барьж чадахгүй байгаа эрх баригчдыг дэмжиж ажиллана” гэсэн юм.
    Харин УИХ-ын гишүүн Д.Дэмбэрэл “УИХ-ын хууль тогтоох үйл ажиллагаа их зүдэргээтэй явагдаж байна. Тиймээс яагаад ийм байдалтай байна гэдэгт дүгнэлт хийх ёстой.  Ямар хууль гаргаж байна гэхээсээ илүүтэй яаж ажиллаж байна гэдэг дээр анхаарах цаг болсон. Өөрөөр хэлбэл, хуулийн төслийг түүхий, муу боловсруулснаас асуудал үүсч эхэллээ.  Ялангуяа Засгийн газрын өргөн мэдүүлсэн төслүүд гологддог, буцаж байгаа тохиолдол нэлээн хэд гарлаа.  Заримыг нь татаж авч буй нь нэг зүйлийг хэлээд байгаа юм.  Үүнээс гадна эргэлзээтэй үзэл баримтлалтай хуулийн төсөл оруулж ирж байгаа нь парламентын үйл ажиллагаанд муу нөлөөтэй. Үүнээс болж УИХ дахь намын бүлгүүдийн хооронд зөрчил маргаан их гарч байна.  Үүний нэг жишээ бол Газрын тухай хууль. Эдийн засгийн өршөөлийн хуулийн тухайд гэвэл эдийн засгийн ил тод байдлыг бий болгож байгаа мэт боловч хөшигний цаана юу явж байгааг сайн анзаарах хэрэгтэй. Үүнд жирийн бизнес эрхлэгчийн өршөөлийн тухай асуудал биш голдуу улс төрийн хүрээнийхний хууль зөрчсөн буруутай үйл ажиллагааг хаах, өршөөл үзүүлэх гэсэн оролдлого юм. УИХ, Засгийн газрын гишүүний хууль бус санхүүгийн асуудлыг өршөөгөөд зогсохгүй, дахин сөхөж ярихгүй гэдэг зүйл анхаарал татаж байгаа.  Мөн дахин сөхөж ярьсан хэвлэл мэдээллийн ажилтнуудад арга хэмжээ авна гэж байгаа. Тэгээд баримтуудыг устгана гэх жишээний.  Ингэж улстөрчид өөрсдөдөө өршөөл үзүүлж болохгүй. Ерөнхийдөө энэ удаагийн чуулганы бас нэг дутагдалтай тал нь иргэдийн амьжиргаатай холбоотой асуудал хөндөгдөхгүй өнгөрлөө. Цалин, тэтгэвэр, малчдын нийгмийн даатгалыг хөнгөлөх гэх зэрэг манай бүлгийн гишүүдийг өргөн мэдүүлсэн хуулийн төслүүд хойшоо сууж байна. Одоогийн батлагдаад байгаа хуулиуд бол зайлшгүй батлах ёстой хуулиуд гэж харж байгаа” гэлээ.