АТГ-ын мөрдөн шалгах хэлтсийн дарга Э.Амарбат өнгөрөгч долоо хоногт сэтгүүлчидтэй уулзаж, олны анхаарлыг татаад байгаа зарим хэргүүдийн мөрдөн шалгах ажиллагаа ямар түвшинд байгаа тухай мэдээлэл өгсөн. Түүний дотор Эдийн засгийн хөгжлийн яам, хөгжлийн банкны эрх бүхий албан тушаалтнуудтай холбоотой асуудлаар “Эдгээр албан тушаалтнууд Халзан Бүргэдэйгээс Солонготын даваа чиглэлийн 100 км авто замын гүйцэтгэл нь 38 орчим хувьтай байхад уг газарт шинээр зам тавих гэж байгаа мэт ойлголтыг Засгийн газарт төрүүлж, дахин тогтоол батлуулан 46.3 тэрбум төгрөгийг Монроуд компаний дансанд шилжүүлсэн байгаа юм. Мөн Замын-Үүд боомтын шалган нэвтрэх цогцолборт 8.7 км автозамыг 20 тэрбумаар барьж болох ТЭЗҮ гарсан байхад 33 тэрбум төгрөг болгон нэмж Хятадын хөрөнгө оруулалттай компанид уг санхүүжилтийг олгосон. Энэ хоёр шийдвэр Засгийн газрын нэг хуралдаанаар зэрэг гарсан нь сэжиг бүхий байна.” гэж мэдэгдсэн билээ.

    Ийнхүү ЭЗЯ, Хөгжлийн банкны удирдлагууд хуулийн хайчинд өртөх нь тэр. Ногооноороо шахуу хурган дарга нар сайдын зааваргүй ийм зүйл хийнэ гэдэг эргэлзээтэй. Гэтэл ЭЗЯ-ны сайд Н.Батбаярыг дээрхи 20 тэрбумын асуудлаар АТГ-аас ямар нэгэн шалгах ажиллагаа явагдаагүй гэж мэдэдсэн. Улиг болсон Н.Батбаярын яриаг түр орхиод өөр нэгэн сэдэвт анхаарлаа хандуулах цаг нь болжээ.

    Халзан Бүргэдэй- Солонготой даваа чиглэлийн замын ажлыг УИХ-ын гишүүн Б.Гарамгайбаатарын “Монроуд” компани гүйцэтгэж ирсэн. Бүхэл бүтэн 38 хувьтай явж байгаа ажлын явцыг тэр  мэдэхийн дээдээр мэднэ. Тэр ч бүү хэл компанийх нь дансаар шинээр тавигдах замын нэрээр 43.3 тэрбум төгрөг орж байхад санаандгүй өнгөрнө гэж байхгүй нь мэдээж. Энэ бүхнээс үүдэж түүнийг Н.Батбаяр болон Хөгжлийн банкны удирдлагуудтай нийлж Засгийн газрыг хууран мэхэлсэн гэж хардах хангалттай үндэслэл байгаа юм.

    Гэтэл улсаас их хэмжээний мөнгийг хууран мэхлэх замаар сул авчихсан, өнөөг хүртэл будлиан хутгасан компаниа хөрөнгө орлогын мэдүүлэгтээ тусгадаг Б.Гарамгайбаатарыг хууль хяналтынхан яагаад шалгахгүй байна вэ? гэсэн асуулт өөрийн эрхгүй төрөн гарч байгаа юм.

    Б.Гарамгайбаатартай холбоотой будлиан ганцаар тогтохгүй. Тэрээр өнгөрсөн 10 жилийн хугацаанд томхон гэж болох хамаг замын тендерийг хуу хамж ирсэн ба чанаргүй барьсан замынх нь улмаас амь нас эрүүл мэндээрээ хохирсон олон арван хүн түүний тухай гомдол мэдүүлж байсан ч тэгс хийгээд чимээгүй болдог нь сонин. Мөн Анод банкыг дамдуурахад гол үүрэг гүйцэтгэсэн эрхэм гэдгийг ч эх сурвалжууд хэлдэг. Тэрээр үйл ажиллагаа нь хүндэрсэн банкнаас нийт 13 тэрбум төгрөгийг зээлээд авчихсан байсан бөгөөд энэ мөнгөө цөмийг нь замын тендертээ оруулсан байдаг.

    Хамгийн сүүлд гэхэд харийнханд газраа эзэмшүүлэх эрх олгосон газрын тухай хуулийн ажлын хэсгийн ахлагчаар ажиллаж, үндсэн хуультай ноцтой зөрчилдсөн, улс үндэстний аюулгүй байдалд заналхийлсэн санал оруулж ирж олон нийтийн шахалтыг улмаас арга буюу татахад хүрсэн. Мөн хэл ам дагуулаад байгаа ашигт малтмалын тухай хуулийн будлианыг ч тэрээр хутгасан. Тодруулбал байгалийн дархан цаазат газраа ухаж төнхөх, ашиглалт, хайгуулын лицензийг хавтгайруулан олгохыг хориглоод байсан шийдвэрийг цуцлах зэрэг олон будлиантай саналыг УИХ-д оруулж олонхиороо батлаад гарсан юм.

    Хууль хяналтынхан шалгадаггүй, хүссэн хэмжээгээрээ замын үнэ ханш тогтоож, Засгийн газрын сайд нарыг атгадаг, эх орноо лиценз нэрээр худалдахыг санаархагч энэ хүн ер нь юу хийгээд яваад байгаа юм? Ямар ашиг сонирхолд хөтлөгдөж, хэний төлөө ажиллаж байгаа юм бэ? Гэдгийг түүний сонгогчид тунгааж эхлэх цаг болжээ. Харин АТГ хөгжлийн банкны жижиг жараахайнуудаар зугаацаж байхаар Б.Гарамгайбаатар мэтийн бурхинуудаа номхотгох хэрэгтэй мэт.