УИХ дахь сөрөг хүчний дарга С.Бямбацогт өнгөрсөн долоо хоногт “МАН-ын бүлгийн гишүүд энэ зун амрахгүй ажиллана. Эрх баригчид 1996-2000 оны алдаанаасаа сургамж авсан байх. Хамтарсан Засгийн газарт ажиллаж байсан түүхээсээ туршлагажсан байх гэж бид бодсон. Харамсалтай нь тэгсэнгүй. Алдаагаа давтсаар байна. Тиймээс улс эх орныхоо эрх ашгийн үүднээс эрх баригчдад туслахгүй бол болохгүй нь. Энэ зун Засгийн газрыг шахаж “ЭЗЭН 100” хөтөлбөрт нь хяналт тавих болно” гэж хэлсэн.

Тэгвэл энэ удаа тус намын Ерөнхий нарийн бичгийн дарга Ж.Мөнхбат мөн МАН-ыг энэ зун амрахгүй тэр бүү хэл ээлжит бус чуулганыг хуралдуулахыг шаардаж, парламентыг тараах асуудлыг хөндөнө гэдгээ мэдэгдлээ.

Тэрбээр энэ талаар “Сөрөг хүчний хувьд нэг зүйлийг шулуухан хэлэх нь зөв байх. Бид эдийн засгийг эрчимжүүлэх 100 хоногийн төгсгөл дээр ажлыг нь дүгнэх ээлжит бус чуулган хуралдуулах шаардлага тавина. Өнөөдөр Монголын төрд засаглалын хямрал бодитойгоор нүүрлэчихлээ. Төр засаг дампуурлын ирмэг дээр ирчихсэн байна. Хуулийн засаглал гэж үгүй болсон. Тийм учраас Засгийн газартайгаа хариуцлага тооцож чаддаггүй, шахаж шаардаж чаддаггүй байдал үүссэн. Тэр байтугай улс орны амин чухал асуудал ард түмнийхээ хувь заяагаар дэнчин тавиад өр зээл авсан. Энэ олон бондын зарцуулалтыг хянаж чаддаггүй, тайланг нь сонсч чаддаггүй энэ УИХ Монголын түүхэнд байгаагүй хариуцлагагүй парламент болж байна. Манай намын бүлгийн Б.Бат-Эрдэнэ, Ж.Энхбаяр нарын гишүүд парламентыг тараах асуудлыг хөндсөн. Саяын жишээ л гэхэд нэг сайдын асуудалд хариуцлага яръя гэхэд намрын чуулганаар хэлэлцэнэ гээд л өнгөрөөлөө. УИХ өөрөө ийм унхиагүй байх юм бол энэ УИХ-ыг тараах асуудлыг ярихаас өөр арга байхгүй. Нийгэм ч үүнийг хүсч байгаа. Энэ бүхнээс дүгнэхэд УИХ-ын сонгуулийг дахин явуулах ч шаардлага гарч болно” гэж хэлэв.

Мөн тус нам Засгийн газартай ч хариуцлага тооцох асуудлыг хөндөж магадгүй аж. Тодруулбал Засгийн газраас хэрэгжүүлж буй эдийн засгийг эрчимжүүлэх ажил үр дүнгээ өгөөгүй, дорвитой ахиц дэвшил гарч чадаагүй, эрчимжүүлж чадаагүй бол Засгийн газартай хариуцлага тооцох асуудлыг тавихаар бэлтгэж байгаа юм байна.

Юутай МАН-ынхан энэ зун улс төрийг амраахгүй нь. Энэ нь тус намын УИХ дахь бүлгийн дарга болоод Ерөнхий нарийн бичгийн даргын үгнээс мэдэгдэж байна. Тус нам наадмын дараанаас УИХ-д сэлэм эргүүлэхээр төлөвлөж байгаа нь тодорхой. Засгийн газар, УИХ-ыг тараана хэмээн мэдэгдэж бүр дахин сонгууль хүртэл явуулна гэж хэлж буй нь нилээн шийдэмгий алхам хийхээр бэлтгэж буйн дохио биз.