УИХ-ын чимээгүй гишүүдийн нэг Б.Болор хааяа час хийсэн яриа өгдөг. Тэр энэ уламжлалаа хадгалж саяхан нэлээд бухимдсан өнцөгөөс асуудалд хандав.

АН-ын залуу гишүүдийг төлөөлдөг тэрээр өөрсдийн байгуулсан шинэчлэлийн гэх Засгийн газартаа ихэд сэтгэл дундуур болсон байна. Өмнө Шинэчлэлийн Засгийн газар шиг сайн ажиллаж байгаа газар байхгүй гэж зарлаж явсан гишүүний байр суурь 360 градусаар эргэжээ. Энэ тухай эрхэм гишүүн “Эрүүл ухаанаар бодсон ч тэр яаж ч хичээгээд 100 хоногийн дотор эдийн засгийг босгож чадахгүй. Гэхдээ бид 100 хоногийн хууль эрх зүйн орчныг сайжруулж эдийн засгаа босгох ажлуудыг эхлүүлнэ гэсэн зорилготой гэж би ойлгож байгаа. Тэгэхдээ эдийн засаг намар гэхэд ямар ч өөрчлөлт гараагүй цаашлаад УИХ-аас өгсөн үүрэг даалгаварын хэрэгжилт муу байгаа тохиолдолд бид Засгийн газартай хариуцлагын асуудлыг ярихаас өөр аргагүй. Ер нь Эдийн засгийг эрчимжүүлэх 100 хоногийн тогтоолын төслийн жагсаалтад Засгийн газар бүтцээ зөв болгох гэсэн заалт орсон байгаа. Үүний дагуу Засгийн газар бүтцээ эргэж харах цаг нь болсон. Энэ Засгийн газар бол улс төрийн намуудаас нэг нь ч олонх болж чадаагүй нөхцөл байдалд байгуулсан” гэжээ. АН доторх залуучуудын бүлэглэлийг ахалж байгаа түүний үгнээс нилээд олон ноцтой зүйл илэрч байна.

Нэгдүгээрт: 100 хоногт эдийн засгаа сэргээж чадахгүй бол Засгийн газартай хариуцлага тооцох ёстой гэж байр сууриа илэрхийлсэн АН-ын хоёр дахь гишүүн болж байна. Өмнө АН-ын бүлгийн дарга Д.Эрдэнэбат яг ийм байр суурийг илэрхийлсэн.

Хоёрдугаарт: Эрүүл ухаанаар бодсон ч тэр яаж ч хичээгээд 100 хоногийн дотор эдийн засгийг босгож чадахгүй гэжээ. Засгийн газар л эрүүл ухаанаар чадна гэж УИХ-д оруулсан. УИХ-ын гишүүд ч эрүүл ухаанаар баталсан байх. Эсвэл УИХ-ын “өвчтэй” гишүүд баталсан юм болов уу? Эцэстээ 100 хоногийн төлөвлөгөөг эрүүл бус хүмүүс баталсан болж таарах нь. Тэгээд эрүүл бусаар хандаад 100 хонолоо. Одоо эрүүлээр хандъя гэж “нохойтож” мэдэх нь л дээ. Ер нь 100 хоног үлгэр байсан гэж хожим хэлж магадгүй боллоо.

Гуравдугаарт: Засгийн газарт бүтцийн өөрчлөлт хийх ёстой гэж байр сууриа илэрхийлжээ. Төрийн данхар бүтэц, олон яам, эдийн засгийн хямралын үеийн их зардал ард түмнийг бухимдуулах болсон. Тийм учраас бүтцийн өөрчлөлт хийхээр АН дотооддоо ярьж эхэлснийг гадагшлуулсан байна.

Дөрөвдүгээрт: Сүүлийн үед АН-ынхан өөрсдийгөө 2014 оны УИХ-ын сонгуулиар олонх болж чадаагүйг онцлох болсон. Өмнө бол манай нам ялсан л гэдэг байсан. Харин энэ хавраас УИХ дахь намуудын аль нь ч олонх болоогүй. Олонх болоогүй нам цөөнхтэй нийлж засаг байгуулсан гэх болов. Эдгээр тайлбарууд хоёр утгыг агуулж байгаа. Нэгдүгээрт олонх болоогүй учир хариуцлага хүлээхгүй шүү гэсэн үг. Ард түмэн хариуцлага хүлээх хангалттай суудал өгөөгүй. Тиймээс хариуцлагаас бултана гэсэн санаа. Нөгөөдөх нь олонх болоогүй юм чинь олонх болоогүй намтайгаа нийлж дахин хамтарсан Засгийн газар байгуулья хэмээх бодлого ард нь байгаа. Ийм яриа ч эрчимжиж эхлэв.

Ийнхүү УИХ дахь АН-ын гишүүдийн байр суурь эдийн засгийн хямрал, 100 хоногийн том амлалтаас болж ихэд өөрчлөгдөв. Ялангуяа залуучуудын фракцыг төлөөлдөг гишүүний үг олон давхар санааг илэрхийлж байна. Ардчилалын залуус ах нартаа сэтгэл дундуур болов. Энэ нь Засгийн газрын хувь заяаг улам л хэврэг болгож эхлэв.