Монгол Улсын Ерөнхий сайд Н.Алтанхуяг АТГ-ын эсрэг хоёр дахь сумаа тавилаа. Өнгөрсөн намраас эхлээд Ерөнхий сайдын охин, хүргэн, туслах, зөвлөх, хамаатан гээд олон хүнийг хууль хүчний байгууллагынхан сонирхох болсон юм. Ерөнхий сайдын ойрын хүрээллийн ийм олон хүнийг шалгасан түүх Монголд байтугай дэлхийд байхгүй биз. 1912 онд Монголын анхны Ерөнхий сайдаар Т.Намнансүрэнг томилсон байдаг. Түүнээс хойшхи хугацаанд нийт 28 Ерөнхий сайдыг томилжээ. Бас цөөнгүй хүн улиран сонгогдсон юм. Тэдгээрийн хэнийх нь ч ойрын хүрээллийг ингэж өргөн фронтоор шалгаж байсангүй. Харин Н.Алтанхуягийнхныг л шалгаж байна. Тийм учраас Ерөнхий сайд Н.Алтанхуяг өнгөрсөн хавар “МАН, АТГ хоёр ажил хийлгэхгүй байна” хэмээн хэвлэлээр зарлаж “дайснуудаа” дуудан эхний сумаа тависан юм.

Тэгвэл гурав хоногийн өмнө Ерөнхий сайдын ахлах зөвлөх Л.Гансүхийг АТГ-аас цагдан хорилоо. Үүнтэй холбогдуулан Ерөнхий сайд Н.Алтанхуяг яаран сандран мэдэгдэл гаргалаа. Монголын түүхэнд төрсөн 28 Ерөнхий сайдаас хэн нь ч хууль хүчний эсрэг мэдэгдэл гаргаж байсан түүхгүй. Н.Алтанхуяг бас л анхдагч боллоо.

Ерөнхий сайдын мэдэгдлээс харвал айсан, сандарсан өнгө аяс илэрхий харагдаж байна. Ерөнхий сайд Н.Алтанхуяг “Нүүрс хөтөлбөр иргэдийн талархал хүлээсэн, нүүрсийг хямдруулсан, амжилттай хэрэгжсэн” гэх мэтээр мэдэгдэв. Тэр ч бүү хэл “нүүрс хөтөлбөрийг зогсоох гэсэн, Засгийн газрын нэр хүндийг унагах гэсэн, хорлон саатуулах үйлдэл” мэтээр дэмийрлээ. Хуулийн байгууллага “Нүүрс” хөтөлбөрөөс мөнгө идсэн байж магадгүй гэж шалгах нь яахаараа “хорлон саатуулах” ажиллагаа болдог билээ? Ингэж яривал АТГ-ын хийсэн бүх ажиллагаа “хорлон саатуулах” ажиллагаа байсан уу? Эсвэл Ерөнхий сайдын ойрын хүрээллийг шалгах нь “хорлон саатуулах” ажиллагаа болдог уу? Монгол Улсын Засгийн газрын тэргүүн хүн ийм болчимгүй мэдэгдэл хийж болох уу даа? Тэр үнэхээр их айжээ. Уг нь хамтрагч л биш бол юундаа айхав дээ? Харин ч “сайн шалга, асуудал байвал гаргаад ир, итгэл даагаагүй наад нөхрийг чинь халаад өгье” гээд сууж байх ёстой биз дээ?

Эсвэл Л.Гансүх “Ерөнхий сайдаа та намайг хамгаалахгүй бол хөтлөлцөөд аавынх руу явна шүү” гэж Засгийн тэргүүнийг минь дарамталсан юм биш байгаа? Ийм өнгө аяс Ерөнхий сайдын мэдэгдэлээс ч харагдаж байна. Тухайлбал “Нүүрс хөтөлбөр олон хүний хичээл зүтгэлээр амжилттай хэрэгжсэн бөгөөд үүнд зохицуулагчаар ажилласан Ерөнхий сайдын ахлах зөвлөх Л.Гансүхийн үүрэг оролцоо өндөр байсан юм” гэж Л.Гансүхийгээ өмөөрөв. Эсвэл өмөөрч байгаа дүр эсгэв үү? Засгийн газрын тэргүүн ингэж нэр заан өмөөрөөд байгаагийн цаана нэг учиг зангилаа байна АТГ-ынхаан! Ард түмэн ингэж хардаж байгаа тухай яриа өчигдөр тасарсангүй.

Ер нь АТГ бол “Нүүрс” хөтөлбөрөөс албан тушаалтнууд 3.6 тэрбум төгрөг завшсан байж магадгүй л гэж шалгасан. Түүнээс биш Н.Алтанхуягийн хэлээд байгаа шиг нүүрсийг хямдруулсан, иргэд талархасан, сайн арга хэмжээ болсон гэдгийг шалгаж тогтоох гээгүй шүү дээ. Тэгээд ч “Нүүрс” хөтөлбөр үр дүнтэй хэрэгжсэн эсэх нь АТГ-д бараг л падлийгүй асуудал. Үүнийг Ерөнхий сайдад хэлээд ойлгуулаад өгөх хүн байна уу? Авлигачид олны дэмжлэг авсан арга хэмжээгээр дамжуулж мөнгө угаахдаа тун гаргуун болсон. Тэр нарийн арга “Нүүрс” хөтөлбөр дээр л хэрэгжсэн бололтой. Түүнийг Ерөнхий сайд нэр төрөөрөө дэнчин тавин хамгаалж “хорлон саатуулагчидтай хатуу тэмцэх болно” хэмээн мэдэгдэхийн цаана ямар айдас байгааг бас шалгамаар байна!