Өнгөрсөн хаваржин МАН-ынхан “Чингис” бондын мөнгөөр улстөржсөн. Түүнээс өмнө “Чингис” бондын мөнгөөр гудамж, талбай засаад их бүтээн байгуулалт хийж байгаа гэж олон нийт ам сайтай байлаа. Харин хавраас асуудал нэг л биш болоод эхэлсэн. МАН-ынхан ч элдэв олон асуудлыг сөхөж гаргаж ирсэн. Тиймээс “Чингис” бондын мөнгө Засгийг зовоосон нэг том асуудал болов. Дээр нь “Чингис” бондын мөнгийг мэдэж байсан Хөгжлийн банкны захирал Н.Мөнхбатад эрүү үүсгээд шалгаж эхлэв. Үүнтэй зэрэгцээд ээлжит бус чуулган хуралдвал МАН-ын болоод УИХ-ын дарга З.Энхболдын шаардлагын дагуу “Чингис” бондын мөнгөний үлдэгдлийг улсын төсөвт тусгахаар төлөвлөж байгааг Сангийн сайд тайлбарласан.

    Эрх баригч АН-ынхан “Чингис” бондын мөнгөний зарцуулалтаас болоод ихээхэн маргаантай хэвээр байна. Нэг үе “Чингис” бондын мөнгөнөөс болоод Хотын дарга Э.Бат-Үүл, Эдийн засгийн хөгжлийн сайд Н.Батбаяр хоёр бараг л зодоон дээрээ тулсан гэж хэвлэлүүд мэдээлж байсан. Тэгвэл саяхан УИХ-ын гишүүн М.Зоригт “Чингис” бондын мөнгөний зарцуулалтыг ихэд шүүмжлэв. Олон жил бизнес хийж алдаж, асгаж, олж бүтээж явсан хүний хувьд тэрээр “Чингис” бондын мөнгөний зарцуулалт буруу гэдгийг нотлоод өгөв. Энэ тухайгаа М.Зоригт гишүүн “Чингис бондын зарцуулалтыг УИХ тэр ч бүү хэл бүлэг дээр оруулж шийдүүлээгүй. Ашиг сонирхолын зөрчилтэй хүмүүсээс бүрдсэн Бодлогын зөвлөл гэдэг бүтэц бий болгоод түүгээрээ шийдүүлсэн. Би хотын дарга Э.Бат-Үүл ахыг хүндэлдэг. Гэтэл Э.Бат-Үүл ах тэр зөвлөлд нь сууж байгаа байхгүй юу. Тэр хүн бондын мөнгөнөөс Улаанбаатартаа ахиухан шиг юм авч байвал болоо гэсэн л бодолтой байгаа ш дээ. Зам тээврийн сайд А.Гансүх бас тэр зөвлөлийн гишүүн. Зам тээврийнхээ салбарт ахиухан хөрөнгө авчих юмсан гэсэн бодолтой л тэр зөвлөлийн хуралд оролцоно. Үүн дээр цөөнхийн бухимдаж байгаа нь зөв ш дээ. Цөөнхийн гишүүд байтугай эрх барьж байгаа намын гишүүн Зоригтын саналыг ч аваагүй байхгүй юу” хэмээн байр сууриа илэрхийлэв.

    Эндээс дүгнэж үзвэл эрх баригч АН-ын гишүүд “Чингис” бондын мөнгөний зарцуулалтыг анхнаасаа УИХ-аар битгий хэл бүлэг дээрээ яриагүй. Эрх ашиг, сонирхолын зөрчилтэй хэдэн нөхөд дур мэдэн хувиарлацгаасан гэдгийг ярьж эхлэв. Хэзээ нэгэн цагт хариуцлага ярих үед “манай бүлэг шийдээгүй. Эрх ашиг сонирхолын зөрчилтэй хэдэн нөхөд шийдсэн” гээд тэднийгээ бариад өгөх бололтой.  Анхнаасаа мөнгөний төлөө улайрсан нөхөдүүдийг тэгж барьж өгөхөөс өөр яахав дээ. Өмнөөс нь хариуцлага хүлээлтэй нь биш. МАН-ын “Чингис” бондын мөнгөний зарцуулалтын талаарх шүүмжлэлийг АН-ын зарим гишүүд илэрхий дэмжиж байгаа аж. Ийнхүү МАН-ын гишүүд дээр АН-ын зарим гишүүд нэмэгдэж “Чингис” бондын зарцуулалтыг шударга бус, хэрэгтэй зүйлд зарцуулаагүй гэж үзэх болов. Бас хуулийн байгууллагаар ч шалгуулах нь зүйтэй гэж санал нэгдэв.

    Энэ бүхнээс дүгнэж үзвэл Шинэчлэлийн Засгийн газар “Чингис” бонд гэсэн олсыг хүзүүндээ сайтар углаж олон түмэн түүнээс нь татан чангалах болсон дүр зураг ажиглагдаж эхлэв.