Монгол Улсын Ерөнхийлөгч асан Н.Энхбаяр өнгөрсөн сарын сүүлээр Монголд ирэх төлөвлөгөөтэй байсан. Харамсалтай нь тэрээр хэлсэн хугацаандаа ирж чадаагүй. Түүний шалтгааныг тодруулахаар МАХН-ын Ерөнхий нарийн бичгийн дарга Г.Шийлэгдамба БНСУ-ыг зориод ирлээ. Тэрээр “Н.Энхбаяр дарга онцгой шалтгаанаас болоод ирэх хугацаагаа хойшлуулсан зүйл байхгүй. Би сая очиж уулзахдаа эмч нарынх нь дүгнэлтийг харлаа. Өдийн хүртэл эмчлүүлсэн хүний хувьд эцсийн үр дүнг нь баталгаажуулсныхаа дараа нааш цаашаа явах асуудлаа шийдэх хэрэгтэй гэдэг дүгнэлтийг эмч нар нь гаргасан юм байна. Байгаа орчноо өөрчилснөөр эмчилгээний дэглэм алдагдах эрсдэлтэй. Тиймээс хэсэг хугацаанд эмч нарын зөвлөмжийг дагуу байх нь зөв гэж үзсэн юм билээ. Ийм шалтгаанаар ирэх хугацаагаа хойшлуулсан. Цаашид багагүй хугацаанд эмчилгээгээ үргэлжлүүлэх байх” хэмээн тайлбар хийлээ. Өөрөөр хэлбэл Н.Энхбаяр ерөнхийлөгч эмч нарын дүгнэлтээс болоод ирж чадахгүй байгаа аж. Тэр ч бүү хэл цаашид багагүй хугацаанд эмчлүүлэх шаардлага байгаа гэнэ. Тиймээс Монгол Улсын Ерөнхийлөгч Н.Энхбаяр энэ жилдээ эх орондоо ирэх бодолгүй байгаа гэсэн эх сурвалжийн мэдээлэл үнэн болж таарлаа.