Эдийн засгийн хямрал эрх баригчдын сандаргаж, улс төрийн бүхий л намуудыг хөдөлгөөнд оруулж байна. АН-ын гишүүд ҮЗХ-ны хурлаа зарлахыг шаардах болсон. Хэрэв хурал болвол дүрэмд өөрчлөлт оруулах, намын даргаар Н.Алтанхуягийг байлгах эсэх хоёр асуудлыг хэлэлцэхээ зарлаад байгаа. Тэгвэл энэ амралтын өдрүүдэд Дорнод аймгийн Буйр нуурт Ардчилсан хүчний холбооны зүүн бүсийн хурал болохоор товлогджээ. Уг хуралд оролцохоор УИХ-ын дарга З.Энхболд Дорнод аймгийг зорьжээ. Түүнээс гадна сайд С.Эрдэнэ, гишүүн Ж.Батзандан, Д.Арвин, Г.Баярсайхан, Р.Бурмаа, Д.Ганбат зэрэг нилээд олон гишүүд очихоор явсан гэж эх сурвалж мэдээлэв. Ардчилсан хүчний холбооны Зүүн бүсийн чуулган нэртэй уг уулзалтаар Н.Алтанхуягийн Засгийн газрын асуудлыг чухалчилан ярихаар товлогдсон гэж саарал ордныхон ярилцаж байна.

Одоогоос яг нэг жилийн өмнө Ерөнхий сайд Н.Алтанхуяг Буйр нуурт эхнэртэйгээ амарч, зугаацаж байгаа зураг хэвлэлээр гарсан. Тэгвэл яг жилийн дараа тэр газарт нь Ардчилсан хүчний холбооныхон чуулахаар болов. Мөн Ардчилсан хүчний холбооны хурал болох Буйр нуурт МАН-ын зарим гишүүд очсон байгаа гэнэ. Мэдээж тэд уулзалдах зорилго, төлөвлөгөөтэй болзоо тохирсон байгаа. Ийнхүү Буйр нуурт Н.Алтанхуягийн хувь заяа шийдвэрлэгдэх бололтой.