Ард түмэн бухимдахын хэрээр УИХ-ын гишүүд маш их бухимдалтай болов. Эрх баригч АН-ын гишүүд ч, сөрөг хүчин МАН-ынхан ч, Засгийн хамтрагч “Шударга ёс” эвсэлийнхэн ч  бухимдлаа нууж ядаж байна. Тэд ирэх намрын чуулганыг тэсч, ядан хүлээж байна. УИХ-ын гишүүдээс эхлээд эдийн засагчид хүртэл байр сууриа өргөн хэмжээгээр илэрхийлэх болов. Амралт үргэлжилсэн зуны налгар өдрүүдэд ингэж их улс төржиж байсан түүх ховор. Энэ жилийн налгар зун улс төр ихтэй дуусч байна.

Хамгийн сүүлд УИХ-ын гишүүн Г.Уянга засаг төр, эдийн засгийн хямрал, намын дотоод асуудлаар байр сууриа илэрхийлэв. Тэрээр “Шударга ёс” эвсэлийнхээ үйл ажиллагаанд сэтгэл ханамжтай байдаггүйгээ ил тод зарлав. Тэр ч бүү хэл “Шударга ёс” эвсэл эрх барьчихаад “Монголоо аврах хувьсгал”-ын бодлогоо хэрэгжүүлээгүйг зарлав. Сонгуулийн бүрэн эрхийн хугацаа талдаа орж байхад, эрх барьчихаад амлалтаа хэрэгжүүлэхгүй байна гэдэг ирээдүй нь тун бүрхэг болохын илэрхийлэл л дээ.

УИХ-ын гишүүн Г.Уянга уул уурхайн лицензүүдийг хавтгайруулан олгохыг хэзээнээс эсэргүүцэж байсан. Энэ байр сууриа ч хадгалсан хэвээр байна. Уул уурхайн лицензийг хавтгайруулан олгож баялагаа цөлмөх нь хөгжлийн гарц биш гэж үзсээр ирсэн. Энэ тухайгаа “Манай либералууд одоо юу гэж ярьж байна гэхээр “бүх лицензээ нээ, бүгдийг нь ухуул, тэгээд энд тэндээс мөнгө цуглахаар нь түүгээрээ үйлдвэр хөгжүүлдэг” гэцгээх юм” хэмээн учирлав. Бүр “Либералчилж байна гээд хамгаа дэлгэсэн янхан шиг аашилсан 24 жилээс сургамж авсангүй” хэмээн бухимдав. Ямар ч байсан цаашид уул уурхайн лицензүүдийг хавтгайруулан олгохыг эсэргүүцсээр байх аж.
Мөн Монгол банкны удирдлагыг Г.Уянга тэргүүтэй гишүүд огцруулах ёстой гэж хавраас шаардсаар ирсэн. Тэдний дунд бие даагч гурван гишүүн ч орсон юм. Харамсалтай нь тэдний шаардлагыг УИХ-ын дарга хүлээн аваагүй. Ирэх намрын чуулганаар ч энэ асуудлаа сөхөж тавих гэнэ. Магадгүй намар тэдний санаачилгыг илүү олон гишүүн дэмжиж, Монгол банкны удирдлагыг солих нь гарцаагүй гэж олон эх сурвалж мэдээлэх болсон. Хэрэв Монгол банкны удирдлагыг олонх хамгаалаад үлдвэл унаж байгаа нэр хүндээ улам л шороотой хутгана гэсэн үг л дээ.

УИХ-ын гишүүн Г.Уянгын бодлоор бол Шинэчлэлийн Засгийн газрыг огцруулбал Н.Алтанхуягийг огцруулж байгаа биш системээ унагаж байгаа хэрэг болох гэнэ. Учир нь тэрээр асуудал хүндээ биш системдээ байна гэж үзээд байх шиг. Тийм л учраас Үндсэн хуулийн нэмэлт өөрчлөлтийг уриалаад байгаа аж. Тэгээд ч өнөөгийн засаг төрийн удирдлагууд өнгөрсөн 24 жилийнхээ алдаа, онооноос сургамж аваагүйд сэтгэл дундуур явна. Өчигдөр л гэхэд УИХ-ын гишүүн Ж.Батзандан намын даргынхаа эсрэг өнгө аястай олон зүйлийг эргүүлэн сануулж эхлэв. Энэ бүхэн ирэх намрын халуун өдрүүдийн өнгө аясыг илэрхийлж байна.