Ер нь Бондын асуудал ард иргэдийн, зарим эрх баригчдын санааг зовоосоор байгаа. Энэ тал дээр нэрт эдийн засагчаас нь эхлээд эрхэм түшээд, УИХ-ын гишүүд ч өөрсдийн байр сууриа илэрхийлсээр байна. Хамгийн сүүлд л гэхэд О.Баасанхүү гишүүн бондын асуудлаар хатуухан хэдэн үг чулуудаад орхив. Тэрбээр хуульч хүний хувьд энэ асуудлыг сайн мэдэж байгаа хүмүүсийн нэг юм.

Тэрбээр "Эцсийн эцэст энэ бондыг  2017 оноос байна уу даа  эргэн төлж эхлэх ёстой. Тэр үед мөнгө хаачсан бэ гэдэг асуултыг хүн бүр эрхэм түшээдүүдэд тавьж таарна. Хэн нэгэнд  мөнгө өгсөн бол эргээд тэр мөнгө юу болсон бэ гэдгийг харах ёстой. Гэтэл төсөл хөтөлбөр биш зүгээр л тавиад туучихсан. Бонд зээл хоёр тусдаа ойлголт. Зээл байсан бол “Эдийн засаг хямарсан,  хэцүү байна” гээд төлөх боломжгүй байна гэж тайлбарлаад хойшлуулах, хүүгээ хөнгөлүүлж болох бол бондын мөнгийг үг дуугүй л төлөх  үүрэгтэй. Тэгэхээр өнөөдрийн үүссэн нөхцөл байдал ямар байна гэхээр нөхдүүд бондын мөнгөний тодорхой хувийг банкинд аваачаад хийчихсэн.  Гэхдээ зүгээр биш, нөгөө банкаа аварч байгаа маягаар аваачаад хийчихсэн.  Доллар хямд байхад төгрөг болгосон. Бид доллароор өрөө төлөх ёстой. Энэ бондын мөнгөний зарцуулалтын талаар бидэнд тайлан мэдээ  гэж маш зузаан материал ирсэн. Хэдийгээр би эдийн засагч биш ч эдийн засгийн зөвлөх болон бусад хүмүүсийнхээ хамт харахад маш хариуцлагагүй тайлан харагдаж байсан.  Товчхондоо, энэ бондын асуудал нэг л өдөр чих халууцуулж эхлэхийг үгүйсгэхгүй. Бондын асуудлаар цөөнгүй хүн шоронд суух байх гэж харж байгаа. Шудрага ёс гэж байдаг бол баттай сууна гэдэгт ч итгэлтэй байна" гэв.

Д.Ундрах /24tsag.mn/