Монгол Улсын гурав дахь Ерөнхийлөгчийн шинэ залилан зөвхөн Монголоор тогтохгүй тив дэлхий дамжин цуурайтахаар боллоо. Учир нь түүнд саяхан хоёр асуудлаар эрүүгийн хэрэг үүсгэн шалгаж эхэлсэн билээ.

    Тэрээр МАХН-ын одоогийн байрыг 1.5 сая ам.доллараар аваад 1 сая ам.долларыг нь өгөөгүй гэж хэвлэлүүд шуугих болсон. Тэгвэл Н.Энхбаярт залилуулсан А.Гинсбург нь АНУ-ын томоохон бизнесмен гэнэ. Тэрээр АНУ-ын тэргүүн хатагтай асан дараагийн Ерөнхийлөгчийн сонгуульд өрсөлдөхөөр бэлтгэж байгаа Хиллари Клинтоны төрсөн дүү Келлигийн нөхөр аж. Тэгэхээр АНУ-ын Ерөнхийлөгч асан Билл Клинтоны базыг залилсан болж таарч байна. Энэ мэдээллийг сонссон зарим хүмүүс “Томчууд том залилдаг, АНУ-ын Ерөнхийлөгч асаны базыг, Ерөнхийлөгч болох гэж байгаа хүний төрсөн дүүгийн нөхрийг залилах зүгээр, Н.Энхбаяраас өөр ингэж тив дэлхий дамжин, дэлхийн хамгийн том хүчирхэг гүрний удирдагч байсан хүний дүүг залилах аавын хүү Монголд ховор шүү” гэж ирээд бахархах хүмүүс цөөнгүй байна. МАХН-ын зарим гишүүд ч зориуд иймэрхүү хөөрүү ч юмуу бахархсан шинжтэй мэдээллиийг тарааж явна.

    А.Гинсбург нь АНУ-ын “CED” группийн гүйцэтгэх захирлаар ажилладаг бөгөөд Монголд үйл ажиллагаа явуулдаг “Империал Гоулд” ХХК-ийг үүсгэн байгуулагч гэж цагдаагийн эх сурвалж мэдээлэв. А.Гинсург нь Монголд казино байгуулахын төлөө тууштай лоббидогчдын нэгэн аж. Түүний лоббигоор Монголын парламент хэд, хэдэн удаа казиногийн хуулийн төслийг хэлэлцэх гэж байсан удаатай юм.

    Харин Н.Энхбаярын зүгээс цагдаагийн байгууллагад өгч байгаа мэдээллүүд ихээхэн анхаарал татна. Учир нь Н.Энхбаяр нэгэн гэрээ гаргаад ирж. Уг гэрээгээр бол одоогийн МАХН-ын байрыг 1.5 сая ам.доллараар биш 500 мянган ам.доллараар өгч авалцана гэж тохиролцжээ. Тэгээд гэрээний дагуу 500 мянган ам.доллараа төлсөн байна. Тиймээс ноён А.Гинсбургтай ямар нэгэн мөнгө төгрөгний өгөө, аваа байхгүй гэжээ. Харин А.Гинсбург нь 500 мянган ам.доллараар гэрээ хийсэн. Харин аман тохироогоор 1 сая ам.доллар өгнө гэсэн. Аман тохирооны мөнгөө өгөхгүй байна гэж гомдоллоод яваа бололтой.

    Эндээс нэг сая.ам долларыг яагаад гэрээнд тусгаагүй вэ? гэдэг асуудал анхаарал татаж байна. Уг асуудлыг сөхөхөөр Н.Энхбаяр анхнаасаа л нэг сая ам.долларыг тусад нь өгье. Шууд гэрээнд тусгаад, өгөөд явахаар авлигалын мөнгө мэтээр буруугаар ойлгоно гэж элдэв янзаар тайлбарлаад Хиллари Клинтоны нөхрийг онхолдуулсан бололтой. Америк ингэж мэдүүлсэн сураг гарлаа. Харин хуулийнхан Хиллари Клинтоны хүргэн дүүгийн мэдүүлэг дээр үндэслэн Н.Энхбаярт эрүүгийн хэрэг үүсгэн шалгаад байгаа аж. Үйл явдал иймэрхүү зүйлээс улбаатай гэж эх сурвалж мэдээллээ.