УИХ-д ИЗНН-аас сонгогдсон С.Дэмбэрэл, АН-аас сонгогдсон М.Зоригт хоёр ээлжит бус чуулган хуралдахыг шаардаж уриалга гаргалаа. Уг уриалгадаа “Өнөөгийн байдлаар валютын ханшийн өсөлт, инфляцийн түвшин манай улсын нийгэм эдийн засагт тэр дундаа ард иргэдийн амьдралд сөргөөр нөлөөлөх нь улам бүр нэмэгдсээр эдийн засгийн хямралт байдал, амьжиргааны хямралд орлоо. Ийм үед УИХ амраад байж хэрхэвч таарахгүй. 2014 оны хагас жилийн статистикийн үзүүлэлт зэрэгцүүлсэн үнээр ДНБ-ний өсөлт 5.3 хувь гарсан нь УИХ болон Засгийн газар ирэх саруудад онцгой хариуцлагатай ажиллах цаг үе ирсэн гэдгийг харуулж байна. Тиймээс намрын ээлжит чуулганыг хүлээлгүй ажилдаа орж шаардлагатай хууль тогтоомжийг шуурхай хэлэлцэж, улс төр эдийн засгийн оновчтой шийдвэр гаргахыг ард иргэд хүлээж байна” хэмээн бичлээ.

Эдгээр гишүүд өнөөдөртөө багтаж энэхүү уриалгаа албан тоот болгон бичээд УИХ-ын дарга З.Энхболдын нэр дээр илгээх гэнэ. Өмнө УИХ-ын дарга З.Энхболд хүндэтгэлийн болон ээлжит бус чуулган хуралдуулна хэмээн ярьж байсан. Харин УИХ-ын гишүүн Р.Амаржаргал ээлжит бус чуулган хуралдаад асуудлыг шийдэж чадахгүй гэж мэдэгдсэн. Ийнхүү эрх баригч намын гишүүд зөрүүтэй байр суурьтай байна.