УИХ-д суудалгүй намуудын төлөөлөл Засгийн газрыг огцрохыг шаардаж өнөөдөр мэдээлэл хийсэн. Тэд Шинэчлэлийн Засгийн газрыг нэн даруй буюу БНХАУ-ын дарга Си Зиньпинийг манай улсад айлчлахаас өмнө огцрох ёстой гэж байгаа юм. Энэ асуудлаар Хамуг Монгол Хөдөлмөрийн намын дарга Ц.Шинэбаяраас зарим зүйлийг тодрууллаа.

-Засгийн газрыг огцруулах асуудлаар удаа дараа хандаж байгаа. Хөдөлгөөн гэж ойлгож болох уу?

-Хөдөлгөөн явуулж байгаа зүйл биш. Улс төрийн нөхцөл байдал хүнд байдал руу явчихаж байгаа үед үүнийг парламентад суудалгүй намууд шударга ёсыг эрхэмлэж энэ асуудлыг ил гаргаж тавьж байгаа нь зүй ёсны асуудал. Байдал хүндрэх тусам чимээгүй сууж байдлыг улам хүндрүүлэх муухай бодол саналтай хүн байхгүй болов уу гэж бодож байна. Тийм учраас бид яаралтай улс орны нөхцөл байдлыг зөв голдирол руу нь эргүүлэх, уналтыг эцсийн цэг дээрээс нь зогсоогоод буцаад яаж өөд нь татах вэ гэдэг дээр л асуудлыг тавьж байгаа болохоос биш Н.Алтанхуяг гэдэг хүний мууг үзэх гэж шүүмжилж байгаа юм биш. УИХ, Засгийн газар ажлаа дүгнүүлэх хугацаа өнгөрчихлөө. Хоёр жил гаруйн хугацаанд хийсэн ажлын үр дүн муу байсан учраас өнөөдөр ийм байдал үүсчихлээ. Муу дүн тавиулсан учраас зайгаа тавьж өгөх ёстой. Дараагийн дөнгүүр ажилтай хүн гарч ирээчээ гэж хэлмээр байна.

 -Удахгүй хоёр хөршийн төрийн тэргүүн айлчлах гэж байна. Айлчлалаас өмнө Засгийн газар огцрох ёстой гэж та бүхэн үзээд байдаг. Хэрвээ огцрохгүй бол жагсаал, цуглаан зохион байгуулна гэдгээ ч мэдэгдлээ. Харин айлчлалын үеэр жагсаал зохион байгуулна гэсэн мэдээлэл гарсан байна. Энэ үнэн үү?

 -Айлчлалын үеэр жагсаал зохион байгуулахгүй. Манай авлигалд идэгдсэн Засгийн газар дахиад биднийг ийм хүнд байдалд битгий оруулаасай гэсэндээ бид анхааруулга өгч байгаа юм.

-Хэрэв Засгийн газар огцорлоо гэхэд дараагийн Засгийн газрыг хэрхэн бүрдүүлэхээр харж байгаа вэ? -Ардчилсан нам УИХ-д олонхи байгаа. Дараагийн Засгийн газраа гаргаж ирэх нь олонхи байгаа намын хийх ёстой ажил байх. -Эвсэх асуудал гарах болов уу?

-Эвсэх эвсэхгүй нь Ардчилсан намын л гаргах ёстой шийдвэр. Ямар ч байсан өнөөгийн эдийн засгийн уналтыг зогсоож, ард түмний амьдралыг өөд нь татах хэрэгтэй байна.