5 сарын 9 өдөр эхэлсэн “ЭЗЭН-100” хөтөлбөр энэ бүтэн сайн өдөр дуусах гэж байна. 100 хоногийн хугацаанд эдийн засгаа эрчимжүүлнэ гэсэн амлалт өгөөд эрх баригчид  эхэндээ сайхан л байлаа. Харин хөтөлбөр дуусах дөхөөд ирсэн энэ үед бүгд л “ЭЗЭН-100”-гаасаа бултацгаав. Тэгээд ч “ЭЗЭН-100” засгийн газрыг хөдөлгөх нэг хөшүүрэг болоод хувирчихав. Учир нь 100 хоногийн хугацаанд эдийн засаг эрчимжсэнгүй. Харин ч эдийн засгаа самарч орхилоо.

Тиймээс “ЭЗЭН-100” хөтөлбөрийнхөө талаар эрх баригчид хэрхэн юу ярьж байсныг түүвэрлэн хүргэе. Бизнес эрхлэгчдийг төлөөлүүлж Ж.Оджаргал, Н.Дашзэвэг нарын үгийг оруулав. Бусад нь бүгд эрх баригчдын байр суурь билээ. Харин сөрөг хүчин шүүмжлэлтэй хандах учраас оруулсангүй.

“Ам алдвал барьж болдоггүй” гэсэн ардын сайхан үг бий. 100 хоногт амласнаа эрх баригчид 3 хоногийн дараа тайлагнах нь гарцаагүй. Тэр үед юу гэж хэлэхийг ард түмэн харж байгаа.

Ерөнхий сайд асан Д.Бямбасүрэн: Хоёр жил хийж чадаагүй ажлаа 100 хоногт хийнэ гэж юу байхав. Наадах чинь тогтворгүй болсон Засгийн газраа энэ үед түр торгоох гэсэн амиа аргацаасан заль. medee.mn. 2014.05.13





АН-ын бүлгийн дарга Д.Эрдэнэбат: Хэрэв 100 хоногийн дараа эдийн  засагт эерэг үр дүн  гарахгүй бол олонх өөрсдөө Засгийн  газраа яахыг шийдэж хариуцлага тооцно.  "Өнөөдөр" сонин. 2014.05.14.





Ерөнхий сайд Н.Алтанхуяг: 100 хоногийг үхлийн тоолуур мэтээр ярьж байна. Тийм биш. 100 хоногийн хугацаанд ид шидийн юм бүтээгдэхгүй.  Shuud.mn. 2014.05.29.





ШӨХТГ-ын дарга О.Магнай: Намайг засгаас чи дэндүү их юм шалгаад байна. Эдийн засгийг хөгжүүлэх 100 хоногийн хүрээнд битгий шалга гэсэн. Заримдаа яг өөрийнхөөрөө ажиллахад хэцүү байна. 24tsag.mn. 2014.06.03.





БШУ-ны сайд Л.Гантөмөр: Шударгаар бизнес эрхлэх хөрсийг бүрдүүлэх ажлыг бид 100 хоногт хийнэ. "Open door" сонин. №05. 2014.06.06.





УИХ-ын гишүүн Х.Баттулга: 100 хоногт улсын эдийн засаг битгий хэл, хувийн компанийн эдийн засаг ч босдоггүй л байхгүй юу. Энийг юм хийж, юм бүтээж үзсэн хүмүүс л ойлгоно.  "Үндэсний шуудан" сонин. №112. 2014.06.12.





Сангийн сайд Ч.Улаан: Эдийн засгийн эрчимжүүлэлтийг нэмэгдүүлэх 100 хоногийн аян бол цоо шинэ бодлого гаргаж, бүх зүйлийг өөрчилнө гэсэн үг биш. "Өдрийн сонин" 2014.06.24






Сингапур улс дахь онц бөгөөд бүрэн эрхт элчин сайд Б.Дэлгэрмаа: 100 хоногийн дотор эдийн засгаа сэргээх гэж байна гээд хаанаас ч юм  вагон дүүрэн доллар орж ирээд улс орноо худалдчих вий гэдэг болгоомжлол байна. Үүнээс л би хамгийн их айж байна даа. "Open door" сонин. №07. 2014.06.20-27.






MCS группын ерөнхийлөгч Ж.Оджаргал: Эдийн засгийг 100 хоногт өргөс авсан мэт эрүүл болгоно гэж байхгүй. "Зууны мэдээ" №148. (4775) 2014.06.27.







Эдийн засагч Н.Дашзэвэг: Сохор нохой дүүвэйнээр хуцдаг гэдэг. “Эзэн-100” гэж хуцлаа. Сайн үр дүн горьдож хүлээх боломжгүй. "Улс төрийн тойм" сонин. №132. (1096) 2014.07.23.






УИХ-ын гишүүн Б.Болор: Эрүүл ухаанаар бодсон ч тэр яаж ч хичээгээд 100 хоногийн дотор эдийн засгийг босгож чадахгүй. Тэгэхдээ эдийн засаг намар гэхэд ямар ч өөрчлөлт гараагүй цаашлаад УИХ-аас өгсөн үүрэг даалгаварын хэрэгжилт муу байгаа тохиолдолд бид Засгийн газартай хариуцлагын асуудлыг ярихаас өөр аргагүй.  "Улс төрийн тойм" сонин. №133. (1097)  2014.07.24.




УИХ-ын гишүүн Ц.Цолмон: Иргэдэд “100 хоногийн дотор эдийн засгийг сайжруулна” гэдэг амлалт өгсөн. Тиймээс энэ нь иргэдэд үнэхээр 100 хоногийн дотор бүх юм сайхан болох юм шиг итгэлийг төрүүлж, хүлээлт үүсгэсэн. Гэвч 100 хоногийн дотор бүхнийг сайхан болгож чадахгүй шүү дээ. Анхнаасаа тодорхой зүйл дээр ийм амлалт өгөөд хэрэггүй байсан юм. Өдрийн сонин. №178 (4818) 2014.07.28.


УИХ-ын гишүүн Ц.Оюунбаатар: Засгийн газар энэ  100 хоногийн хугацаанд бодлогын түвшинд асуудлыг ярих ёстой байсан ч түүнийхээ хажуугаар валютын хяналтгүй өсөлт, бараа бүтээгдэхүүний өсөлт зэргийг тодорхой хэмжээнд хязгаарлах ёстой байсан. Гэвч тэгж чадсангүй. Тиймээс Засгийн газарт шүүмжлэлтэй хандах нь зөв. "Улс төрийн тойм" сонин. №136 (1100)  2014.07.30.



Хөрөнгө оруулалтын газрын дарга С.Жавхланбаатар: Засгийн газрын хувьд "ЭЗЭН-100"-гийн хүрээнд хурдацтай ажиллаж байгаа. Шаардлагатай сайд нарыг дуудаж уулзаж чиглэл өгөх ажлуудыг хийж байгаа юм билээ. Энэ хөтөлбөрийн хүрээнд хийгдэх ажлууд 100 хоногтоо хэрэгжээд үр дүнгээ өгнө гэж байхгүй. "Үнэн" сонин. №142. (22654) 2017.07.30.


УИХ-ын гишүүн Р.Амаржаргал: Эдийн засгийг эрчимжүүлэх 100 хоног гэгчийг анх санаачилж, Засгийн газарт “худалдсан” хүн бол ер нь Засгийн газрыг дээд зэргээр хорлоё гэсэн хүн л байсан байх. “Open door” сонин. 2014. №11.




УИХ-ын гишүүн Б.Гарамгайбаатар: УИХ эдийн засгийг идэвхижүүлэх тогтоолын төслийг баталж гаргасан. Төсөлд “ЭЗЭН-100” ч гэдэг юмуу нэр өгсөн юм байхгүй. Энэ бол Засгийн газраас гарсан яриа. Өнөөдөр бүх хүний амнаас 100 хоног гэсэн үг гарч байна. Тиймээс тогтоолын төсөлтэй холбоотой ажлыг Эдийн засгийн байнгын хороо, УИХ намрын чуулганаараа ярих байх. Өдрийн сонин. №191 (4831) 2014.08.12.




МАХН-ын Ерөнхий нарийн бичгийн дарга Г.Шийлэгдамба: Эхлээд Засгийн газар 100 хоногийн тайлангаа гаргах байх. Улмаар сөрөг хүчин тайланд үнэлэлт дүгнэлтээ өгнө гэж бодож байна. Үүний дараа бид бас байр сууриа илэрхийлнэ. "Улс төрийн тойм" сонин. №145 (1109)  2014.08.13.



Эдийн засгийн хөгжлийн дэд сайд О.Чулуунбат: Эдийн засгийг эрүүлжүүлэх, уналтыг зогсооно гэдэг өөрөө маш том ажил. Удаан хугацаанд хэрэгжих, үргэлжлэх ажил. Түүнээс 100 хоногийн дотор өргөс авсан мэт өөрчлөгдөхгүй, эдгэрэхгүй. Миний хувьд 100 хоногт улсын эдийн засгаа байтугай зуслангийнхаа байшинг засч амжихгүй байна. "Зууны мэдээ" сонин. №183. (4810) 2014.08.13.




УИХ-ын гишүүн Д.Арвин: “ЭЗЭН-100” хөтөлбөрийг дүгнэх цаг ирнэ. Эдийн засгийг эрчимжүүлэх 100 хоногоо намын бүлгүүд эхлээд ярих шаардлагатай. Энэ бол Их хурал шууд хэлэлцээд явчих зүйл биш. Ээлжит бус чуулган хуралдуулна гэж ард түмнийг самруулж байх цаг өнөөдөр биш гэдгийг хэлмээр байна. Өдрийн сонин. 2014.08.14. №193 (4833)