УИХ-ын гишүүн “ нэрт улстөрч” Д.Арвин өдөр тутмын нэгэн хэвлэлд арвин асуудлаар ярилцлага өгчээ. Намаа сольсноор удаан хугацаанд дуугүй суусан түүний ярилцлага зарим нэг хүнд сонин санагдах нь дамжиггүй. “АН-д элссэнээр даралтны эм ууж бухимдаж суух хэрэггүй болсон” гэж хэлснээс хойш сураг ажиг тасраад байсан тэр үнэхээр амар амгалангийн туйлд хүрч гэгээрлийг олж байгаа бололтой. Хуучнаа ор тас мартжээ.

    Ярилцлагын эхэнд тэрээр “Ардчилсан хүчний холбооны гишүүний хувиар” зүүн бүсийн хуралд оролцоод ирлээ гэдгээ онцолсон юм.  Зарим эх сурвалж ардчилсан хүчний холбооныхон Н.Алтанхуягийн Засгийн газрын хувь заяаны асуудлыг хэлэлцсэн гэж мэдээллэж байгаа. УИХ –ын гишүүдийн зүгээс ч ээлжит бус чуулган хуралдуулахыг уриалах болсон. Энэ талаар тэрээр “Ардын намынхан үргэлж ингэж улстөржих  юм. Ингэснээр Монгол Улсаар удаа дараа тоглож байна.  УИХ Ардын намын хүсэлтээр хуралдах ёстой юмуу? ” гэж ярьжээ. Урьд өмнө огт Ардын намын гишүүн байгаагүй мэт, ерөөс Ардын намын сүүдрээр ч эргэлдэж үзээгүй хүн лугаа адил гэгээрсэн зүйлийг хэлжээ. Угтаа бол улс орноор удаа дараа тоглосон гэх Ардын намаас дөрвөн удаа УИХ-д сонгогдсон хүн нь тэрээр мөнөөсөө мөн. Улс орноор удаа дараа тоглосон гэвэл тэгж тоглоход нь арвин үүрэг гүйцэтгэсэн хүний нэг л болж таарна.

    Мөн валютын ханшийн талаар хэний ч хэлээгүй, хэлж ч мэдэхгүй зүйлийг ярьж өглөө. Түүний хэлсэнчлэн “Монголчууд ухаантай хүмүүс” учраас үүнийг заавал ойлгоно. Ойлгохгүй бол “даган хийсэгч” болох тул савсагнуур болчихгүй тулд заавал ойлгох хэрэгтэй юм байна. Ерөөс дэлхий нийтээр валютын ханш өсөөд байгаа аж. Доллар, Рубль, Юаны ханш дээшилж дэлхий нийтээрээ вальютын ханшийн өсөлтөнд туйлдаж байна. Үүнийг бид яах ч аргагүй, ханш биднээс шалтгаалахгүй /биднээс гэдэг нь АН-ынханыгаа хэлж буй бололтой сур./ өсч байна гэдэг дүгнэлтийг хийжээ.

    Америкын төв банк мөнгөний хатуу бодлого баримтлаж, долларыг дотооддоо татах интервенци хийж байгаа нь үнэн. Гэлээ гээд Доллартай харьцах голлох валютын ханш дээд тал нь 5 функтээр л суларсан гэдгийг ном сонин эргүүлээд ойр зуурын мэдээ уншдаг хэн ч гэрчилж чадна. Ухаантай ард түмнээ тэрээр юм уншдаггүй гэж боддог бололтой. 40 хувь хүртлээ унаад байгаа төгрөгийн ханшинд тэрээр огт санаа зовохгүй байгаа бөгөөд сэтгэлээ аргамжлан туйлын амар амгалангаар давахыг санал болгож байна. Тодруулбал тэрээр “Бид валютын ханшийг өсгөхгүйн төлөө байгаа бүхнээ тавих ёстой юмуу? Монголын төр валютын ханшийн үнэ цэнэтэй юм уу?” гэж мөр холбон цэцэрхэжээ. Валютын ханшинд дарлуулж орлоггүй болж байгаа үндэсний үйлдвэрлэгчид, цалингаа авч чадахгүй байгаа ажилчид, ард иргэддээ тун соёлтойгоор “хохь нь ээ хохь нь, бид нар юу ч хийхгүй” гэж байгаатай ижил үгийг алдарт улстөрч маань хэлжээ.

    Энэ бүхний эцэст жиргээний ертөнцийг донсолгосон “баавартай” мэдэгдэл хийсэн нь олон хүний гайхширлыг барж байна. Тэрээр “Монгол Улсыг дунд хагалдаг, хүмүүсийг дунд яс хаяж хооронд нь муудалцуулдаг бүлэг ажиллаж байгаа нь сайтууд, мөн эрүүл солиотой нь мэдэгдэхгүй твирттерчид байна. Мэдлэггүй, чадваргүй, ажил хийж чадахгүй хүмүүс сайт твиттерт орж сэтгэгдэл бичээд сууж байгаа юм. Өөрсдөө нэг юм зохиож биччихээд доор нь өөрснөө биччихдэг. Ийм зүй бус зүйлээс Монголчууд салах цаг болсон. Тархи нь ажилладаггүй, биеийн хүчний хөдөлмөр хийж чаддаггүй хүмүүс твиттерт хүн доромжилж сууж байна” гэсэн хурц дүгнэлтийг хийжээ. Түүний хэлж байгаагаар Твиттерийн хамгийн их дагагчтай, олон нийттэй санаа бодлоо хуваалцаж мэдээлэл түгээдэг Монгол Улсын Ерөнхийлөгч Ц.Элбэгдорж, өөрийнх нь хамгаас хайртай УИХ-ын дарга З.Энхболд болон танхимынх нь нөхөд тархи нь ажилладаггүй, биеийн хүчний хөдөлмөр эрхэлж чаддаггүй хүмүүс болж таарч байгаа юм. Хагаралдуулж, талцуулцах гэсэнгүй, өөрийнх нь хэлсэн үгэн дээр дүгнэлт хийхэд ийм байна.

    “Өнгөрсөн оны Ерөнхийлөгчийн сонгуулиар МАХН бие даан оролцож АН-г ялахад маш том үүрэг гүйцэтгэсэн” хэмээн хээвнэг шударга мэдэгдсэн анхны хүн нь мөн тэр боллоо. Сонгуулийн хуйвалдааныг илчлээд зогсохгүй өөр намын нэр дэвшигчийг Ерөнхийлөгч болгохын төлөө сонгуульд оролцсон МАХН-ынханыг анхаанаасаа зөв байгуулагдсан эвсэл гэж дүгнэж байна. Энэ бүхэн бол амны солио нь арилаагүй жаахан хүүхдийн яриа биш “нэрт улстөрч” парламентад дөрвөн удаа сонгогдсон арвин туршлагатай УИХ-ын гишүүний яриа билээ.