АН засаг барьсанаас хойш авлигачдыг цээрлүүлнэ гэдгээ дуу нэгтэйгээр хэлсэн. Үүнийхээ ч  дагуу зарим улс төрчдийг шалгуулж, шалгаж эхлээд байгаа. Улмаар МАН нөлөө бүхий улс төрчдийг ч яллаа.

Тэгвэл МАН-аас ял авсан хийгээд мөрдөн байцаалтын шатанд хэрэг нь яваа эрхмүүдийг нэрлэж байна.

    АМГ-ын дарга асан Д.Батхуяг шүүхээс 6.6 жилийн ял авсан
Д.Батхуягийн шүүх хурал гурван өдөр үргэлжилж байж нэг тийш болж байсан. Түүнийг 2009, 2010 онуудад албаны эрх мэдэл буюу албан тушаалын байдлаа урвуулан ашиглаж, Ашигт малтмалын тухай хуулийн холбогдох заалтуудыг зөрчин, сонгон шалгаруулалтаар олгох ёстой нийт 108 ширхэг тусгай зөвшөөрлүүдийг бусдад сонгон шалгаруулалтгүйгээр олгож, төрийн байгууллагын /АМГазар/  хуулиар хамгаалагдсан эрх ашигт хүнд хор уршиг учруулсан хэмээн буруутгаж, Эрүүгийн хуулийн 263 дугаар зүйлийн 263.2, 268 дугаар зүйлийн 268.2 дахь хэсэгт зааснаар төрийн албанд ажиллах эрхийг гурван жилээр хасч, таван сая төгрөгний эд хөрөнгө хурааж, 6 жил 6 сар хорих ял оногдуулж,  хорих ялыг чанга дэглэмтэй хорих ангид эдлүүлэхээр шийдвэрлэсэн юм. Тэрбээр хэрэгт холбогдох үе буюу 2012 онд УИХ-ын сонгуульд МАН-аас Хөвсгөл аймгаас нэр дэвшихээр бэлтгэлээ базааж байсан. Гэвч хуулийн байгууллагаар шалгагдаж хоригдсон Д.Батхуягаас намынхан нь нүүрээ бууруулж, Хөвсгөл аймагт нэр дэвших орных нь хүнийг сонгож, сонгуулийн ажлаа эхэлсэн байдаг. Д.Батхуягийг Ерөнхий сайд асан С.Баярын хүн гэдэг. Тиймдээ ч уг хэргийн цаана С.Баяр бий. С.Баяр Д.Батхуягаар “туг тахилаа” гэх хүмүүс ч цөөнгүй байдаг билээ.

    Д.Дондог 60 шахсан насан дээрээ 10 жилийг чангад өнгөрөөхөөр болов
Дүүргийн нэгдүгээр прокурорын газраас УИХ-ын гишүүн асан Д.Дондог, иргэн Д.Сайнбаяр, А.Батбилэг, Д.Ширнэндорж, А.Ариунболд нарт Эрүүгийн хуулийн 148.3, 148.4, 149.3 дах хэсгүүдэд заасан гэмт хэрэгт тус тус яллах дүгнэлт үйлдсэн. Улмаар УИХ-ын гишүүн асан Д.Дондогт бусдын эд хөрөнгийг залилан мэхэлж авах гэмт хэрэг буюу ЭХТА-ийн 148.4 дэх хэсэгт заасан гэмт хэргийг үйлдсэн гэм буруутайд тооцож, 500.000 төгрөгтэй тэнцэх хэмжээний эд хөрөнгө хурааж, 10 жил 1 сарын хорих ялыг чанга дэглэмтэй хорих ангид эдлүүлэхээр болсон юм. Д.Дондогийн хувьд МАН-аас УИХ-д нэр дэвшиж байсан. МАН Бага хурлын гишүүн байжээ.

    Хотын дарга асан Ц.Батбаяр 2.1 жилийн ялыг чанга дэглэмтэй хорих ангид эдлэнэ
Ц.Батбаяр нь Нийслэлийн Засаг дарга болон Өмч хувьчлалын комиссын даргаар ажиллаж байхдаа албан тушаалаа урвуулан ашиглаж, улсад онц их хэмжээний хохирол учруулсан гэх хэрэгт шалгагдаж эхэлсэн. Улмаар Ц.Батбаяр шүүхээс Ц.Батбаяр 2.1 жил, харин бусдынх нь хэргийг хэрэгсэхгүй болгосон юм. Тодруулбал, Өмч хувьчлалын даргаар ажиллаж байхдаа албан тушаалаа урвуулсан гэх Ц.Батбаярт шүүхээс чанга дэглэмтэй хорих ангид 2.1 жил хорих шийдвэрийг гаргасан бол НИТХ-ын дарга асан Т.Билэгтийг гэм буруутайд тооцсон ч 2009 оны өршөөлийн хуульд хамруулж хэргийг хэрэгсэхгүй болголоо. Түүнчлэн уг хэрэгт холбогдоод байсан Нийслэлийн өмчийн харилцааны газрын Өмч хувьчлалын хэлтсийн дарга Г.Маналжав, Ц.Батбаярын төрсөн дүү Ц.Чанцал нарын хоёр хүнийг шүүхээс хэрэгсэхгүй болголоо.

    Газрын тосны газрын дарга асан Д.Амарсайхан шалгагдаж байхдаа амиа алдав
Засгийн газрын хэрэгжүүлэгч агентлаг Газрын тосны газрын даргаар ажиллаж байсан Д.Амарсайхан агсан, "Тэнгри" холдингийн захирал Х.Анхбаяр, түүний туслах А.Чандмань, Н.Отгонболд нарт холбогдох шүүх хурал болж өнгөрсөн. Талийгаачийн хэргийг эдгээрээс тусгаарлан шалгахаар болсон ч албаныхан хийгээд иргэд эзэн нь байхгүй шүүх хурал гэж юу байдаг юм хэмээн эсэргүүцсээр байгаа. Юутай ч талийгаач энэхүү хэрэгт холбогдон шалгагдан хоригдож байхдаа харамсалтайгаар хорвоог орхисон юм.
Д.Амарсайхан агсаныг авлига авсан. "Тэнгри" холдингийн захирал Х.Анхбаярыг авлига өгсөн. Талийгаачийн ахынх нь хүү Ц.Чандманийг халхавч болсон. Н.Отгонболдыг дамжуулагч хийсэн гэдгээр сэжигтнээр татсан байдаг.

    Ч.Хоролсүрэн 13.1 жилийн ял авсан
МИАТ ТӨХК-ны гүйцэтгэх захирлаар ажиллаж байсан Ч.Хоролсүрэн Өвөрхангай аймгаас МАН-н бага хурлын гишүүнээр сонгогдож байсан. МАН-ын бага хурлын гишүүн юм.
“Дайны эрсдлийн даатгалын төлбөр”  нэрээр  их хэмжээний мөнгийг гадаад дахь зохиомол компанийн данс руу шилжүүлж, мөнгө угаасан гэх олон холбогдогчтой энэхүү хэргийг Шүүх бүрэлдэхүүн хэлэлцээд, МИАТ-ийн захирал асан Б.Эрдэнэбилэгт 14 жил нэг сар, Б.Бат-Эрдэнэд 12 жил нэг сар, Ц.Орхонд 11 жил, дэд захирлаар ажиллаж байсан Ч.Хоролсүрэнд 13 жил нэг сар, Ч.Хоролсүрэнгийн дүү, "Монголиан эйрлайнс" группын захирал асан Ч.Суурьтогтоход 10 жил нэг сар, 1997-2007 онд “Голомт” банкны зургадугаар салбарын захирлаар ажиллаж байсан Г.Саранчимэгт 11 жил нэг сарын хорих ял тус тус оноосон байдаг.

    Г.Буяндоржийн хэрэг шүүхийн шатанд явж байна
Цаашлаад “Ноёд” грүппийн тодотголтой, МАН-ын бага хурлын гишүүн Г.Буяндоржийг яллах гэж байна. Түүний шүүх хурал одоогоор мөрдөн байцаалтад буцсан.  Тэрбээр Сэлэнгэ аймгаас бага хуралд сонгогдож байсан билээ.

Г.Буяндоржийг хэд, хэдэн зүйл ангиар багагүй хугацаанд шалгаж байгаа юм.

    Ё.Отгонбаярт холбогдох хэргийг үргэлжлүүлэн шалгаж байна
Мөн УИХ-ын гишүүн Ё.Отгонбаярт холбогдох авлигын хэргийг УМБГ-ын Эдийн засгийн гэмт хэрэгтэй тэмцэх хэлтсээс АТГ руу шилжүүлсэн  байдаг. Тэгвэл түүнийг шалгаж ажил үргэлжилж байна. Хамгийн сүүлийн мэдээллээр АТГ-т Татварын байгууллагаас Ё.Отгонбаярын хэрэгтэй холбоотой материалууд ирсэн байна. Өөрөөр хэлбэл, энэ хэрэгтэй холбоотой холбогдох шалгалтуудыг хийгээд материалаа АТГ-т ирүүлжээ.

    Ё.Отгонбаярыг хоёр жилийн өмнө Налайх дүүргийн харьяат, “Тавин лан” компанийн захирал Х.Цогнойжамцыг дарамтлан “Ланд круйзер-200” маркийн автомашиныг нь дээрэмдэж, хахууль авахыг завдсан хэрэгт буруутгасан.