Монгол бөхөд хоёр Мөнхийн, хоёр Эрдэнийн үе гэж байсан. Түүн шиг улс төрд Энхболдуудын эрин үе эхлэхэд бэлэн боллоо. Сүүлийн үед улс төрийн намууд БНХАУ, дарга, ОХУ-ын Ерөнхийлөгчийн айлчлалын өмнө эв нэгдэлтэй байцгаая хэмээн гар барилцаж байна. Энэ үйл явдал, зөвшилцөл нь их тулааны өмнө нам гүм гэдгийг санагдуулав. Үндсэндээ тохироо хийгдчихээд, түүндээ салхи орчих вий гэж эмээсэндээ зарим улс төрчид хэлэлцээрүүдээ нууцгаалаа. Монголд нууц юм ховор болохоор Энхболдуудын тохироо ч “гэрэл цохиулав”.

    Энэ жилийн наадмын дараа УИХ-ын дарга З.Энхболд ээлжийн амралтаа авахдаа М.Энхболдыг орлон гүйцэтгэгчээр томилсон нь ихээхэн анхаарал татсан юм. Уг нь УИХ-ын дэд дарга Р.Гончигдоржид үүргээ шилжүүлнэ гэж саарал ордныхон ярьж байв. Гэвч УИХ-ын даргын сонголт өөр байсан юм. Тэгээд л энэ зунжин МАН-ын дарга М.Энхболд УИХ-ын дэд даргын хувьд саарал ордонд ажиллаж парламентын ажлыг хийсэн. Энэ завсараараа бүлгийн гишүүд, ажлын албаа ажиллуулан, албан уулзалтууд хийж “МАН-ынхан л ажиллаж байна” гэж шоудахаа мартаагүй. Үүний цаана том тохироо, том бодлогууд явагдаж байсан нь илэрч эхлэв. Өөрөөр хэлбэл М.Энхболд жинхэнэ дарга болох бэлтгэлээ базааж байсан ажээ.

    Учир нь З.Энхболд, Х.Баттулга, Р.Амаржаргал гурав нам дотроо томоос том бүлэглэл болон нэгдэж эхэлсэн. Тэд олон жил дарлуулж ирсэн “Алтангадас” фракциасаа салах түүхэн боломж гэж харах болсон тухай хэвлэлүүд шуугисан. Угаасаа “Алтангадас”-ынхан 1990 оноос хойшх хамтарсан засгийн газруудын хамгийн өөдтэй өнгөтэй гэсэн албан тушаалуудыг МАН-ынхантай нийлж байгаад хуу хамцгаасан. Харин одоо байрлал солигдож “Ардчилсан хүний холбоо”-ныхон нэгдүгээр эгнээн дээр гарч ирэх боломж тохиолоо. З.Энхболд, Х.Баттулга, Р.Амаржаргал нарын нэгдэл ойлголцол дээр МАН-ын дарга М.Энхболд нэмэгджээ. Тэдний зунжин хийсэн яриа тохироо Шинэчлэлийн Засгийн газрын “хойдохыг унших”-д чиглэгджээ. Эх сурвалжийн мэдээлж байгаагаар бол дараагийн Ерөнхий сайд З.Энхболд шүү гэдэг дээр санал нэгджээ. Харин парламентад 26 суудалтай МАН-ын дарга М.Энхболд УИХ-ын дарга болохоор тохироо хийгджээ. Өөрөөр хэлбэл АН эдийн засгийн одоогийн хүндрэлээс гарахын тулд, МАН-ыг засагтаа урьж оруулахын тулд УИХ-ын даргын суудлаа бэлэглэж байгаа аж. Дээр нь шинээр бүрдүүлэх Засгийн газрынхаа гишүүдийн 45 хувийг МАН-ынханд өгнө гэж эхний хувилбараар яригдсан сураг гарлаа. Энэ тохироо дэд сайд, төрийн нарийн бичгийн дарга, агентлагуудад яг ижил зарчимаар хуваагдана. Харин нийслэл, аймгуудад ямар нэгэн хувиарлалт хийгдэхгүй. Одоогийнхоороо байна гэж яригдсан мэдээлэл түгж байна. Угаасаа ингэхгүйгээр МАН-ынхан засагт орохгүй гэж хатуу шийдсэн аж. Зарим эх сурвалжийн мэдээлж байгаагаар бол МАН-ынхан Засгийн газар, агентлаг, дэд сайд, төрийн нарийн гэсэн албан тушаалуудын харьцаа 50:50 гэсэн тохиолдолд л засагт орж болох юм гэж гэдийж байгаа гэнэ.

    Эдийн засгийн хүндрэлээс гарахын тулд, улс эх орноо бодвол үүнээс өөр олигтой гарц байхгүй гэж дээрх хүмүүс ярилцсан бололтой. Мөн Р.Амаржаргалыг Сангийн эсвэл Эдийн засгийн хөгжлийн сайд болж улс орноо хямралаас гаргахын тулд ажиллах ёстой гэж хамтрагчид нь тулгаж байгаа гэнэ. Харин Х.Баттулга дараагийн Засгийн газарт орохгүй гэж хэлсэн мэдээлэл ирэв.

    Түүнээс гадна “Ардчилсан хүчний холбоо”-ны хурал саяхан Буйр нуурт болсон. Уг хуралд оролцсон АН-ын гишүүд “манай З.Энхболд дарга үнэхээр бяртай болсон нь анзаарагдсан”, “АН-аа аварч үлдэхийн тулд та дараагийн ерөнхий сайд шүү гэсэн үгийг ч зарим хүмүүс амнаасаа цухуйлгасан” гэх мэтээр өөр хоорондоо ярилцсан мэдээлэл түгсэн.

    Ийнхүү Н.Алтанхуягийн Засгийн газрын хувь заяаг УИХ-ын дарга, Зүүний хүчний холбооны тэргүүн З.Энхболд, УИХ-ын дэд дарга, МАН-ын дарга М.Энхболд хоёр нийлээд шийдэж байх шиг байна. Хэрэв тэдний шадарлах болсон мэдээлэл үнэн бол “Энхболдууд”-ын эрин үе эхлэхэд бэлэн боллоо. Тэд ганцхан тааламжтэй цагийг л хүлээж байна.