Сүүлийн үед илт бяр нь амтагдах болсон хүмүүс бол “Ардчилсан хүчний холбоо”-ныхон юм. Тэднийг хүчирхэг болгоход АН доторх өнөөгийн нөхцөл байдал голлон нөлөөлөлж байна. Тиймээс нэгэн цагт “Алтангадас” руу хуйлардаг байсан АН-ын жирийн гишүүд одоо “Ардчилсан хүчний холбоо”-ныхонд найдлага тавих болсон.

Саяхан энэ холбооныхон зүүн бүсийн чуулга уулзалтаа “Буйр нуур”-т хийсэн. Тэгвэл өнгөрсөн долоо хоногийн тав дахь өдөр Си Зиньпин даргын айлчлалтай зэрэгцэн “Зүүний хүчний холбоо”-ны гол хүмүүс яаран сандран ОХУ явцгаажээ. Тэд Буриад-Монголын парламентын бүлгэмийн шугамаар явж байгаа гэсэн албан тодотголтой.

Албан нэртэй парламентын энэхүү танилцах ажилд УИХ-ын дэд дарга Л.Цог, гишүүн Н.Энхболд, С.Одонтуяа, Г.Баярсайхан, Д.Арвин, сайд С.Эрдэнэ нар явжээ. Эндээс харвал тун сонин бүрэлдэхүүн гэдэг нь ойлгогдоно. Л.Цог, Н.Энхболд хоёр бол албан ажилд оролцох үүрэгтэй хүмүүс. Харин нөгөөдүүл нь буюу С.Эрдэнэ, С.Одонтуяа, Г.Баярсайхан, Д.Арвин дөрөв бол З.Энхболдын тэргүүлдэг “Ардчилсан хүчний холбоо”-ны тархи болсон хүмүүс. Тэгэхээр З.Энхболд дарга өөрсдийн багийн хүмүүсээ зориуд бөөнөөр явуулсан нь ойлгогдоно. Эх сурвалжийн мэдээлж байгаагаар бол “Ардчилсан хүчний холбоо”-ны эдгээр удирдлагууд дараагийн Засгийн газрын асуудлыг амрангаа ярилцах, төлөвлөгөө боловсруулах албан бус даалгавартай яваа гэнэ.